តើប្រាក់ខែប៉ុន្មានទើបនិស្សិតបញ្ចប់ការសិក្សាថ្មីៗចាយគ្រប់គ្រាន់?

2017-04-27 04:39:02
ចំនួនមតិ 0 | ចំនួនចែករំលែក 0

ចន្លោះមិនឃើញ

កំណើនសេដ្ឋកិច្ចនៅប្រទេសកម្ពុជាកើនឡើងពីមួយឆ្នាំទៅមួយឆ្នាំ ចំណែកកំណើនការងារនៅលើទីផ្សារក៏កើនឡើងគួរឱ្យកត់សម្គាល់។ ទន្ទឹមនឹងនោះ កំណើននិស្សិតដែលបញ្ចប់ការសិក្សាក៏មានចំនួនកាន់តែច្រើនឡើង តែចំពោះបញ្ហាប្រាក់ខែក្នុងទីផ្សារវិញ មាននិស្សិតកម្ពុជាមួយចំនួនគិតថាមិនទាន់សមស្របនៅឡើយទេ។ និស្សិតដែលបានបញ្ចប់ការសិក្សាមួយចំនួនលើកឡើងស្រដៀងគ្នាថា ប្រាក់ខែចាប់ពី៣០០ឡើងទៅបានចាយគ្រាន់។

ជួបជាមួយនិស្សិត សុផល សោម៉ាវត្តី ទើបតែបញ្ចប់ការសិក្សាជំនាញធនាគារ នៅឯសាកលវិទ្យាល័យធនធានមនុស្សលើកឡើងថា បច្ចុប្បន្ននេះប្រាក់ខែត្រឹម ១០០ដុល្លារជាង ចាយមិនគ្រាន់នោះទេ ព្រោះត្រូវចំណាយច្រើន ទាំងថ្លៃសាំង បន្ទប់ស្នាក់នៅ ការហូបចុក។ ដូច្នេះប្រាក់ខែដំបូង យ៉ាងហោចណាស់ត្រឹម ២០០ឡើងទៅទើបសមរម្យ ប៉ុន្តែបើឱ្យនិយាយថា ប្រាក់ខែដែលអាចចាយល្មមគ្រប់គ្រាន់ គឺចាប់ពី ៣០០ ទៅ៤០០ដុល្លារ។ យ៉ាងណាក្ដីនិស្សិតទើបតែទទួលសញ្ញាបត្រថ្មីៗ រូបនេះលើកឡើងថា ប្រាក់ខ្ពស់ឬទាបក៏អាស្រ័យលើសមត្ថភាពនិស្សិតខ្លួនឯងដែរ។

ដោយឡែកនិស្សិត ធឿន ចន្រ្តា និស្សិតទើបតែទទួលសញ្ញាបត្រថ្មីៗ ជំនាញធនាគារ បានលើកឡើងថា បើនិយាយពីប្រាក់ខែគឺអាស្រ័យលើចំណេះដឹងនិស្សិតនោះ ថាតើមានសមត្ថភាពកម្រិតណា។ ចំពោះរូបលោក គិតថា ប្រាក់ខែដែលសមរម្យបំផុតសម្រាប់និស្សិតកម្ពុជា ចន្លោះពី ២៥០ដុល្លារ ទៅ ៣៥០ដុល្លារ ទើបសក្ដិសមជាមួយការចំណាយដ៏ច្រើន។ ប៉ុន្តែចំពោះខ្លួនលោកផ្ទាល់ចង់បានប្រាក់ខែ ៦០០ដុល្លារទៅ ៧០០ដុល្លារ ហើយលោកនឹងខិតខំបញ្ចេញឱ្យអស់នូវសមត្ថភាពដែលខ្លួនមានដើម្បីបានប្រាក់ខែនេះ។

ចំណែកនិស្សិត សុធារ វិញក៏បានលើកឡើងស្រដៀងនិស្សិតទាំងពីរដែរ កញ្ញានិយាយថា ការចំណាយបច្ចុប្បន្នច្រើនណាស់ចំពោះការរស់នៅក្នុងរាជធានីភ្នំពេញ។ ដូច្នេះកញ្ញាគិតថា ប្រាក់ខែចាប់ពី ៣០០ដុល្លារឡើងទៅ ទើបអាចទប់ទល់ឈ្នះ ហើយចំពោះប្រាក់ខែដំបូងគួរចាប់ផ្ដើមពី ២៥០ឡើងទៅ៕

អត្ថបទ៖ វឌ្ឍនៈ