ជើងខ្លាំងទាំង៣របស់កម្ពុជាកំពុងរវល់បង្ហាត់សិស្សខ្លាំងនៅបារាំង

2017-04-29 03:42:31
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនខ្មែរជួរមុខរបស់កម្ពុជា សេន ប៊ុនថេន ម៉ឺន សុភា និង កីឡាករ វ័យ ក្មេង ឡៅ ចន្រ្ទា កំពុងមមាញឹកបង្ហាត់បង្រៀនសិស្សនៅប្រទេសបារាំង។

ហេ្វសបុក សេន ប៊ុនថេន

បើតាមការឲ្យដឹងពីកីឡាករ សេន ប៊ុនថេន មកពីប្រទេសបារាំងថា បច្ចុប្បន្ននេះពួកគេទាំង៣នាក់ស្នាក់នៅទីនោះគឺសុខសប្បាយជាធម្មតានោះទេ។ តែដោយបច្ចុប្បន្ននេះ សេន ប៊ុនថេន និងកីឡាករ២នាក់ទៀតមានការរវល់បន្តិច ក្នុងការបង្ហាត់កូនសិស្សដែលពួកគេចង់រៀននិងចង់ស្គាល់ក្បាច់គុនដ៏ចំណាស់របស់ខ្មែរមួយនេះ។

ម្ចាស់ខ្សែក្រវាត់ដែលទើបនឹងឈ្នះនៅបារាំងរូបនេះ បន្តឲ្យដឹងទៀតថា ការបង្ហាត់នេះដែរគឺធ្វើឡើងតាមក្លឹបប្រដាល់នានានៅតាមរដ្ឋផ្សេងៗ ហើយចាប់តាំងពីទៅដល់ប្រទេសអឺរ៉ុបមួយនេះ គិតមកដល់បច្ចុប្បន្នពួកគេបង្ហាត់បាន៥ក្លឹបហើយ ក្នុង១ក្លឹបបង្ហាត់ប្រហែល១-២ម៉ោង រីឯចំនួនអ្នកចូលរួមវិញចន្លោះពី៣០នាក់ឡើងទៅ។ នៅសល់តែ២ក្លឹបទៀតទេជើងខ្លាំងរបស់កម្ពុជាទាំង៣រូបខាងលើនឹងបញ្ចប់ការបង្ហាត់ត្រឹមនេះ។

កីឡាករ ម៉ឺន សុភា(ហ្វេសបុក សេន ប៊ុនថេន)

ប៊ុនថេន ក៏ដូចជាកីឡាករដទៃទៀតដែរ កោតសរសើរពីសន្ដានចិត្តលោក ធី ដែលស្រឡាញ់វិស័យប្រដាល់គុនខ្មែរនិងជាអ្នកនាំពួកគេទៅប្រកួតទីនោះ។ កីឡាករទាំង៣ក៏ថ្លែងអំណរគុណដល់អ្នកគាំទ្រប្រដាល់នៅប្រទេសបារាំង ដែលស្វាគមន៍និងរាក់ទាក់ដោយភាពកក់ក្ដៅបំផុត។ រឹតតែពិសេសជាងនេះទៅទៀត កីឡាករដែលតំណាងឲ្យកម្ពុជាទាំង៣ខាងលើ សប្បាយចិត្តដែលបានជួយផ្សព្វផ្សាយពីគុនខ្មែរបន្ថែមទៀតនៅលើឆាកអន្តរជាតិ៕

អត្ថបទ៖ នួន ស៊ីណា