ដាំណាំឈូកមានតម្លៃ និងមានប្រយោជន៍ច្រើនតែពិបាកថែទាំបន្តិច

2017-04-30 15:06:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ឈូកជាប្រភេទរុក្ខជាតិដែលមានប្រយោជន៍ច្រើនយ៉ាងដូចជាក្រអៅអាចយកទៅធ្វើជាបន្លែ ផ្កាឈូកយកទៅថ្វាយព្រះ ស្លឹកយកទៅខ្ចប់នំចំណី ផ្លែខ្ចីហូបឆៅ ផ្លែទុំយកទៅលីងធ្វើគ្រលីងឈូក ដំណាប់គ្រាប់ឈូក ធ្វើបង្អែម និងធ្វើម្សៅឈូកជាដើម។

បច្ចុប្បន្នកសិករនាំគ្នាដាំឈូកច្រើនដោយសារគ្រាប់ឈូកមានតម្លៃថ្លៃ គឺក្នុងមួយគីឡូក្រាមរហូតដល់១ម៉ឺន២ពាន់រៀល (១២,០០០៛)។ ឈូកដែលគេបេះផ្កា យកមកលក់នៅលើទីផ្សារ ភាគច្រើនជាឈូកដែលដុះនៅតាមបឹង ឈូកពូជយកផ្កា ឬឈូកដុះមួល គេបេះផ្កា និងស្លឹកយកមកលក់ ដោយសារទុកផ្លែក៏មិនសូវបានផលប៉ុន្មានដែរ មិនដូចពូជឈូកដែលដាំយកផ្លែនោះទេ ។

កសិករ សុខ ហូយ អាយុ៥២ឆ្នាំ រស់នៅភូមិក្តីកណ្តាល ឃុំសារិកាកែវ ស្រុកល្វាឯម ខេត្តកណ្តាល បាននិយាយពីបទពិសោធន៍ផ្ទាល់របស់គាត់ក្នុងការដាំឈូកថា ពេលមានភ្លៀងធ្លាក់គេត្រូវភ្ជួរដាស់ដីឱ្យបានមុនរដូវទឹកឡើងធ្វើបែបនេះដើម្បីឱ្យស្មៅងាប់ ឬរលួយនៅពេលទឹកឡើង និងងាយស្រួលដល់រដូវទឹកសម្រកដែលត្រូវដាំ គឺស្មៅមិនអាចដុះរួបឈូកបាន។

លោកបន្តថា លុះពេលទឹកចាប់ផ្ដើមស្រកទៅវិញបានត្រឹមជង្គង់ ឬចង្កេះ យើងអាចចាប់ផ្ដើមយកកូនមកដាំបណ្ដេញទឹក ហើយកូនដែលយកមកដាំនោះ ត្រូវផ្សាំទុកនៅក្នុងស្រះមានទឹកនឹង គឺមានន័យថា ទឹកមិនឡើងមិនចុះ រហូតឈូកដុះបែកសន្លឹកអណ្ដែតក្រាលលើទឹកហៅថា សន្លឹកកាក់ ទើបគេយកមកដាំ។

ចំណែកអ្នកស្រី ជុំ ស្រី មានអាយុ ៤៦ឆ្នាំ ជាប្រពន្ធរបស់ លោក សុខ ហូយ បាននិយាយរៀបរាប់ថា កាលណាឈូកចេញសន្លឹកគេដាក់ជីបាញ់ថ្នាំជំនួយដើម និងថ្នាំជំនួយផ្លែ លុះបានពីរខែឈូកចេញស្លឹកពីរទៅបីសន្លឹករួចចេញផ្កា ហើយចន្លោះពីបីទៅបួនខែឈូកចាប់ផ្ដើមផ្លែ ។ បន្ទាប់ពីផ្លែចាស់ទៅតែមួយសប្ដាហ៍ឈូកក្លាយទៅជាគ្រលីងឡើងគ្រាប់ខ្មៅទើបបេះគ្រាប់បាន។

អ្នកស្រី ជុំ ស្រី បន្តថា តំបន់នេះគេនិយមដាំឈូកប្រេងកន្លះ ឬឈូកបាយកន្លះ ដោយដាំរយៈពេលតែ៣ខែ បានផ្លែបេះហើយ តែពូជប្រភេទនេះគេមិនបេះផ្លែខ្ចីលក់ទេ ព្រោះផ្លែវាតូច គឺគេច្រើនទុកឱ្យទុំ។ អ្នកស្រីនិយាយថា ឈូកមានការពិបាកថែទាំដោយសារទីមួយ ពេលឈូកដុះស្លឹកងើបផុតពីទឹកមានក្រាស៊ីស្លឹក និងទីពីរ ពេលផ្កាហើយជ្រុះអស់ចេញជាផ្លែតែមិនទាន់ដាក់គ្រាប់វាអាចមួល.ក ឬស្កកអត់មានគ្រាប់ទេ គឺក្នុងផ្លែអាចមានគ្រាប់ល្អតែ៥ ឬ៦គ្រាប់ប៉ុណ្ណោះ។

អ្នកស្រីបានបញ្ជាក់ថា បើជួបប្រទះជំងឺទាំងអស់នេះនឹងធ្វើឱ្យអ្នកដាំក្នុងមួយរដូវនេះត្រូវខាតបង់ប្រាក់និងកម្លាំងឥតប្រយោជន៍ ហេតុនេះហើយទើបកសិករមួយចំនួនមិនសូវដាំ ។ ទោះបីជាយ៉ាងណា ប្រជាកសិករអ្នកដាំឈូកបានអះអាងថា ការដាំឈូកមិនសូវចុះសោហ៊ុយច្រើនដូចដំណាំស្រូវ តែពិបាកថែទាំជាងដំណាំស្រូវបន្ដិច តែបើផលវិញគឺទទួលបានច្រើនជាងស្រូវ៕

អត្ថបទ៖ ហេង នាង (CCJ)