G-Devith ចាប់ដៃជាមួយ បូព្រឹក្ស រួចធ្វើបែបនេះចំពោះប្អូនប្រុសនាងទៀត
- 2017-05-03 04:05:39
- ចំនួនមតិ 0 | ចំនួនចែករំលែក 0
G-Devith ចាប់ដៃជាមួយ បូព្រឹក្ស រួចធ្វើបែបនេះចំពោះប្អូនប្រុសនាងទៀត
ចន្លោះមិនឃើញ
"ធម្មតាៗ" ជាបទថ្មីរបស់ ទេព បូព្រឹក្ស និងជាស្នាដៃផលិតទំនុកភ្លេងដំបូងរបស់ប្អូនប្រុសតែម្នាក់គត់របស់នាងឈ្មោះ ទេព និមិត្ត ។ ក្នុងនោះ ទេព និមិត្ត ប្រាប់ Sabay ថាលោកចេះផលិតភ្លេងនេះដោយសារមានការបង្រៀន និងណែនាំពី G-Devith។
"បទនេះ និពន្ធទំនុកច្រៀងដោយខ្ញុំផ្ទាល់ និងសរសេរប៉ារូលដោយបង G-Devith ហើយអ្នកណែនាំធ្វើភ្លេងក៏បង Devith ដែរ និយាយទៅគាត់ដូចគ្រូរបស់ខ្ញុំអីចឹង"។ និមិត្ត ថ្លែង។
ប្អូនប្រុសម្ចាស់បទ “Twerk" បន្ថែមថា ដោយសារខ្លួនមានដុង ឆាប់ចេះ ឆាប់ចាប់បាន និងមានចិត្តស្រឡាញ់ទើបខំរៀន ហើយបើមិនយល់ត្រង់កន្លែងណាលោកតែងតែសុំការណែនាំបន្ថែមពី G-Devith។ លោកអះអាងថា ដៃគូចម្រៀងរបស់បងស្រីរូបនេះ រីករាយនឹងណែនាំគ្រប់ចំណុចខ្វះខាតទាំងអស់ដោយមិនលាក់លៀមអ្វីឡើយ។
"បើគិតពីរយៈពេលខ្ញុំមិនប្រាកដទេ ដឹងតែយូរហើយដែលខ្ញុំខំរៀនធ្វើភ្លេងនេះ ហើយខ្ញុំក៏បានផលិតច្រើនដែរ តែសាកចេញមួយមើលសិនចង់ដឹងថាភ្លេងដែលខ្ញុំធ្វើទៅទទួលបានការគាំទ្រខ្លាំងប៉ុណ្ណា" ។ ទេព និមិត្ត បន្ថែម។
យុវជនរូបនេះ បន្តថា អ្នកផលិតបទភ្លេង ជាអាជីពក្នុងក្ដីស្រមៃរបស់លោក ហើយលោកនឹងព្យាយាមធ្វើវាឲ្យបានល្អ និងចាប់យកអាជីពនេះជាជំនាញផ្ទាល់ខ្លួនក្នុងថ្ងៃអនាគត។
គិតមកដល់ពេលនេះ លោកមិនប្រាកដឡើយថា បទថ្មីរបស់លោកនឹងត្រូវអាចចេញក្នុងផលិតកម្ម ហង្សមាស ឬអត់។ លោកគ្រាន់តែដឹងថា ទេព បូព្រឹក្ស បានផ្ញើបទនោះទៅខាងផលិតកម្មហើយ នៅតែថ្ងៃទាក់ទងទៅថតសម្លេងប៉ុណ្ណោះ។