ក្រសួងឆ្លើយតបហើយ រឿងរិះគន់ភាពយន្តថៃ ដាក់រូបអង្គរវត្តខ្មែរក្នុង Poster

2017-05-03 04:42:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងវប្បធម៌ និងវិចិត្រសិល្បៈ នៅព្រឹកនេះ បានឆ្លើយតប ទៅនឹងករណីភាពយន្តថៃមួយរឿង ប្រើរូបអង្គរវត្តក្នុងផ្ទាំងផ្សព្វផ្សាយរបស់ខ្លួន ធ្វើឲ្យមានការរិះគន់ខ្លាំងក្នុងស្រទាប់មហាជនក្នុងប្រទេសកម្ពុជា។

ការរិះគន់ផ្ដើមចេញពីរឿងនេះ ទី១រិះគន់ទៅដល់ភាគីថៃ ក៏ដូចជាផលិតកម្មនៃរឿង "បារមីនាគរាជ" ដែលយករូបប្រាសាទអង្គរវត្តដែលជារបស់កម្ពុជាទៅប្រើក្នុងផ្ទាំងផ្សព្វផ្សាយរបស់ខ្លួន ដែលអាចនាំឲ្យមានការយល់ច្រឡំពីភាពជាម្ចាស់នៃសម្បត្តិបេតិកភណ្ឌ។ ដោយឡែកការរិះគន់ទី២ សំដៅលើក្រសួង ដោយហេតុថា មិនទាន់ឃើញមានសកម្មភាពអ្វីជុំវិញរឿងដែលកើតឡើង ក្រោយរឿងនេះ ត្រូវបានសមាគមសិល្បករខ្មែរលោក សុះ ម៉ាច បានធ្វើរបាយការណ៍ជូនទៅហើយ។

“ខ្ញុំបានធ្វើរបាយការណ៍ជូនទៅក្រសួងកាលពីម្សិលមិញ ជូនក្រសួងជ្រាប និងសុំការពន្យល់ថា រឿងវាយ៉ាងម៉េចៗ ព្រោះលឺថារឿងថតនៅអង្គរវត្ត ខ្ញុំមិនច្បាស់ដែរ គ្រាន់តែលឺអីចឹង អីចឹងសុំការពន្យល់"។ សុះ ម៉ាច ថ្លែង។

ឯកឧត្តម ថៃ នរសត្យា ទីប្រឹក្សាក្រសួងវប្បធម៌ និងវិចិត្រសិល្បៈ បានឆ្លើយប្រាប់ព្រឹកនេះថា ក្រសួងបានឃើញរបាយការណ៍នោះហើយ ហើយឯកឧត្ដម បានថ្កោលទោសចំពោះរឿងដែលកើតឡើង ប្រសិនបើរឿងខាងលើ គឺជារឿងពិត ដែលមិនស្ថិតក្រោមការប្រើបច្ចេកទេសកាត់តណាមួយ។

"ជាការពិត រូបអង្គរវត្តយើងត្រូវបានគេបង្ហោះពាសពេញពិភពលោកទៅហើយ ប៉ុន្តែតែករណីគេមកថត ឬយកទៅប្រើដាក់ក្នុងភាពយន្តអីអីចឹង អាហ្នឹងត្រូវសុំសិទ្ធិពីក្រសួង ឬអាជ្ញាធរអប្សរាហើយ បើយកទៅប្រើដោយអត់សុំការអនុញ្ញាត គឺខុសហើយ!”។

យ៉ាងនេះក្ដី ក្រសួង អះអាងថា ពុំទាន់ប្រញាប់ចេញសកម្មភាព ឬប្រតិកម្មអ្វីនៅឡើយ តែបន្ទាប់ពីទទួលបានព័ត៌មាន ក្រសួងបានចាត់តាំងក្រុមការងារមួយរួចហើយ ឲ្យក្ដាប់ និងអង្កេតសាច់រឿងនេះស៊ីជម្រៅជាមុន មុនចេញប្រតិកម្មផ្លូវការណាមួយ។

“ឥឡូវហ្នឹងយើង កំពុងរង់ចាំសាច់រឿងច្បាស់លាស់សិន ព្រោះទើបទទួលបានព័ត៌មាន តែកាលណាយើងប្រតិកម្មទាំងមិនទាន់ដឹងរឿងថាយ៉ាងម៉េចៗ វាអាចមានបញ្ហា។ យើងបានឲ្យនាយកដ្ឋានភាពយន្តកំពុងធ្វើការរឿងហ្នឹងហើយ ថាវាម៉េចៗ វាជៀសមិនផុតពីការជួបជជែកគ្នាទៀតទេ"។

ពាក់ព័ន្ធនឹងបញ្ហាខាងលើ លោក ស៊ិន ចន្ទសាយ៉ា ប្រធាននាយកដ្ឋានភាពយន្ត និងផ្សព្វផ្សាយវប្បធម៌ ដែលទទួលភារកិច្ចធ្វើកិច្ចការនេះបន្ត មិនទាន់អាចសុំការអធិប្បាយបានទេព្រឹកនេះ ដោយទូរសព្ទរបស់លោកមិនអាចភ្ជាប់ទំនាក់ទំនងបាន។

ប៉ុន្មានថ្ងៃមកនេះ មានការជជែកគ្នាយ៉ាងក្ដៅគគុក បន្ទាប់ពីមានព័ត៌មានថា ភាពយន្តថៃមួយរឿង "បារមីនាគរាជ" ប្រើរូបអង្គរវត្តសម្រាប់ការឃោសនាពីភាពយន្តរបស់ខ្លួន។ រឿងនេះ គឺតំណាលពីស្ដេចនាគរាជមួយ ដែលមានរិទ្ធិអាចក្រឡាខ្លួនជាប្រុសក៏បានស្រីក៏បាន ដែលជាប្រភេទសត្វតំណាង ប្រជាជនថៃគោរពបូជា។

រឿង "បារមីនាគរាជ" គ្រោងនឹងចាក់បញ្ចាំងឆាប់ៗលើកញ្ចក់ទូរទស្សន៍ប៉ុស្តិ៍លេខ៥របស់ថៃ។ យ៉ាងណា ក្រោយពីលេចរូបអង្គរវត្តរបស់ខ្មែរ មហាជន រួមទាំងសិល្បករ ផលិតករផង បានថ្កោលទោសព្រមគ្នា៕

អត្ថបទ៖ ឆុង ស៊ីណាន