ទោះមានបញ្ហាភ្នែក លោកតាវ័យ ៨៦ឆ្នាំ ជម្នះប្រណាំាងកង់រកថវិកាជួយកុមារក្រីក្រ
- 2017-05-08 02:52:17
- ចំនួនមតិ 0 | ចំនួនចែករំលែក 0
ទោះមានបញ្ហាភ្នែក លោកតាវ័យ ៨៦ឆ្នាំ ជម្នះប្រណាំាងកង់រកថវិកាជួយកុមារក្រីក្រ
ចន្លោះមិនឃើញ
លោកតាវ័យ ៨៦ឆ្នាំម្នាក់បានលេចមុខក្នុងកម្មវិធី Run&Ride ទាំងភ្នែកកំពុងមានបញ្ហា ដើម្បីសប្បុរសធម៌ជួយដល់កុមារក្រីក្រ កំព្រា ព្រមទាំងសាលាខ្វះខាតនៅតាមតំបន់ដាច់ស្រយាល ។
បុរសវ័យចំណាស់មានស្រុកកំណើតមកកពីខេត្តកំពង់ចាមរូបនេះបានឲ្យដឹងថា នេះមិនមែនលើកទី១ ដែលលោកតាចូលរួមជិះកង់នេះទេ។ លោកតាធ្លាប់បានចូលរួមជិះកង់រាប់ភ្លេច មិនតែប៉ុណ្ណោះថែមទាំងធ្លាប់បានពាន ច្រើនលើកច្រើនសារទៀតផង។ ជាក់ស្តែងចូលរួមប្រណាំងកង់លើកនេះ ដើម្បីប្រមូលយកថវិកាជួយជួសជុលហេដ្ឋារចនាសម្ព័ន្ធក្នុងសាលាខ្វះខាតនៅតាមបណ្តាខេត្តមួយចំនួនក្នុងប្រទេសកម្ពុជា
"តា ជិះតាំងពីឆ្នាំ៧០មកម្ល៉េះ ហើយក៏ធ្លាប់ជិះឈ្នះបានពានដែរ និយាយទៅជិះកង់នេះជាកីឡាមួយដែលល្អ និងជួយឲ្យមានសុខភាពល្អ ទៀតផង"។ លោកតា លុយ សុខុម បន្ថែម។
ក្នុងឱកាសចូលរួមព្រឹត្តិការណ៍ Run&Ride កាលពីថ្ងៃសៅរ៍ លុយ សុខុម ជាឈ្មោះបុរសវ័យចំណាស់ បានឲ្យដឹងទៀតថា តាំងពីចាប់ជិះកង់នេះមក របួសច្រើនដង ដួល៦ដង មានម្ដងគេបុកប៉ើងដួលរហូតបាក់កកង់កាលឆ្នាំ២០១៤ ខណៈកំពុងជិះកង់ហាត់ប្រាណធម្មតា។
លោកតាដែលមានកូន៤នាក់នេះ ធ្លាប់បានចេញទៅប្រកួតនៅបណ្ដាប្រទេសជាច្រើននៅលើពិភពលោកដូចជា ឥណ្ឌូណេស៊ី ជប៉ុន អូសាកា ជាដើម ហើយក៏ធ្លាប់បានទទួលពានរង្វាន់ផងដែរ មានលេខ១ លេខ៣ លេខ៤ទូទាំងប្រទេសទៀតផង។
ពីដំបូងឡើយលោកតា ជិះកង់ ហែលទឹក រត់ប្រណាំង ប៉ុន្តែដោយសារជិះកង់មានការរីកចម្រើន គួបផ្សំនឹងការចូលចិត្តផង ក៏សម្រេចយកតែការជិះកង់មួយមួយមុខ សម្រេចបន្តចិញ្ចឹមជីវិត ។ ដើម្បីសុខភាពលោកតាវ័យ ៨៦ឆ្នាំរូបនេះ តែងជិះកង់ហាត់ប្រាណរាល់ថ្ងៃ និងជារៀងរាល់ព្រឹកជាមួយកូន ឬចៅ នៅតាមមុខវាំង មាត់ទន្លេ និងជាយៗក្រុងជាដើម។
កីឡាជិះកង់នេះ ជាថ្នាំមួយដែលពូកែជាងគេ ជួយឲ្យមានសុខភាពល្អ សព្វថ្ងៃលោកតាថាមិនដែលមានជំងឺអ្វីធ្ងន់ធ្ងរអ្វីឡើយ។ កន្លងមកលោកតាធ្លាប់ជិះមាន ២០០គីឡូ ក៏មាន ១៧៥គីឡូក៏មាន តែដោយសារឥឡូវចាស់ហើយ មិនសូវបានជិះ និងចូលរួមប្រណាំងដូចមុននោះទេ។
ចុងក្រោយបុរសចំណាស់វ័យ លុយ សុខុម វ័យ៨៦ឆ្នាំ រូបនេះមានសំណូមពរចង់ឲ្យក្មេងៗ និងយុវវ័យជំនាន់ក្រោយ លេងកីឡា និងហាត់ប្រាណឲ្យបានទៀតទាត់ ព្រោះសុខភាពនេះសំខាន់ណាស់៕