អាជីវកម្មមួយរីកចម្រើនប្រកបដោយស្ថិរភាព តើត្រូវមានកត្តាអ្វីខ្លះ?
- 2017-05-04 09:47:39
- ចំនួនមតិ 0 | ចំនួនចែករំលែក 0
អាជីវកម្មមួយរីកចម្រើនប្រកបដោយស្ថិរភាព តើត្រូវមានកត្តាអ្វីខ្លះ?
ចន្លោះមិនឃើញ
តើត្រូវធ្វើដូចម្ដេចដើម្បីឲ្យអាជីវកម្មរីកចំរើនប្រកបដោយស្ថិរភាព? ការពង្រឹងធនធានមនុស្ស កម្រៃពលកម្ម និង ចំណេះជំនាញ គឺជាកត្តាចម្បង ដែលធ្វើឲ្យអាជីវកម្មរីកចម្រើនប្រកបដោយស្ថិរភាព។ ការលើកឡើងនេះក្រោយពីមានកិច្ចពិភាក្សាប្រចាំខែមេសា ដែលបកស្រាយទៅលើប្រធានបទ “តើត្រូវធ្វើដូចម្ដេចដើម្បីរក្សាការរីកចំរើនរបស់ក្រុមហ៊ុន?”។ កិច្ចសន្ទនាពាណិជ្ជកម្មនេះត្រូវបានធ្វើឡើងនៅផាកកាហ្វេបឹងកេងកងត្រសក់ផ្អែម ចាប់ពីម៉ោង០៥.៣០នាទីល្ងាច កាលពីពេលថ្មីៗនេះ។
លោកជា សារិន អគ្គនាយកក្រុមហ៊ុនចំប៉ីស្ប៉ា ដែលមានបទពិសោធន៍យូរយូរឆ្នាំក្នុងវិស័យសេវាកម្មមួយនេះបានសង្កត់ធ្មន់ថា ដើម្បីធានាអោយមានការរីកចំរើន ក្រុមហ៊ុនត្រូវមានទស្សនៈវិស័យច្បាស់លាស់ ជាពិសេសគួរពង្រឹងអ្វីដែលជាចលករក្នុងការធានាគុណភាពធនធានមនុស្សរបស់ខ្លួនដូចជា កម្រៃពលកម្ម និងចំណេះជំនាញរបស់ពួកគេ ហើយគួរតែស្វែងរកការគាំទ្រហិរញ្ញវត្ថុថ្មី (អាចជាការវិនិយោគថ្មី ឬការចូលរួមជាសម្ព័ន្ធ) ដើម្បីធានាបាននូវសុវត្ថិភាពទុនបម្រុងក៏ដូចជាពង្រីកខ្លួនអោយទាន់តម្រូវការទីផ្សារ។
ទន្ទឹមគ្នានេះដែរ លោកអគ្គនាយកនៃក្រុមហ៊ុនធានារ៉ាប់រង FORTE Insurance យក់ ចំរើនរិទ្ធ ក៏បានចែករំលែកនូវចំនេះដឹងដល់អ្នកចូលរួមអោយបានយល់ពីអ្វីដែលហៅថា (Sustainable Growth) សម្រាប់អាជីវកម្ម។ លោកបានពន្យល់ថា ពាក្យនេះសំដៅទៅលើក្រុមហ៊ុនទាំងឡាយណាដែលបានឈរជើងនឹងក្នុងទីផ្សារ និងមានលទ្ធភាពបន្ថែមទៀតក្នុងការអភិវឌ្ឍន៍ក្រុមហ៊ុននោះអោយរីកចំរើនលើសមួយកំរិតទៀត។ លោកបន្ថែមថា ដើម្បីធានាស្ថិរភាពក្នុងការអភិវឌ្ឍដោយស្ថិរភាពនោះ យើងត្រូវយល់ពីតម្រូវការទីផ្សារអោយបានច្បាស់ និងធ្វើយ៉ាងណាដើរអោយបានពីរជំហ៊ានមុនដែរគូប្រកួតប្រជែង។
គួររំលឹកផងដែរថា កម្មវិធីពិភាក្សាពាណិជ្ជកម្មនេះនឹងត្រូវធ្វើឡើងជារៀងរាល់ចុងខែនីមួយៗ ហើយកម្មវិធីនេះមានគោលដៅដើម្បីចូលរួមបង្កើតឱកាសអោយយុវជន ក៍ដូចជាអ្នកធ្វើអាជីវកម្មអាចជូបគ្នាស្វែងយល់ពីគ្នា និងដើម្បីបង្កើតឱកាសអាជីវកម្មនានាជូនអ្នកចូលរួម និងដើម្បីលើកកម្ពស់ការអភិវឌ្បផ្នែកសហគ្រិនភាពផងដែរ។