Man of the Match ដែលគ្រូទ័ពពេញចិត្តយប់មិញមិនមែន ច្រឹង ពលរដ្ឋ

2017-05-07 03:24:27
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ទេព ឡុងរចនា គ្រូទ័ពបានបញ្ចេញទស្សនៈថា កីឡាករដែលលោកមើលឃើញជា Man of the Match ក្នុងជំនួបយកឈ្នះភ្នំពេញក្រោន ៣-២ យប់មិញមិនមែន ច្រឹង ពលរដ្ឋ ទេគឺប្រធានក្រុម រ៉ឹង ប៊ុនហៀង ។

លោក ទេព ឡុងរចនា

ជំនួបនៃក្រុមទាំងពីរត្រូវបានក្រុមភ្ញៀវភ្នំពេញក្រោននាំមុខ ២-០ មុន បន្ទាប់មកត្រូវបានខ្សែប្រយុទ្ធសញ្ជាតិកូរ៉េខាងជើង Choe Myon Hoតាមបាន ១-២ និងខ្សែបម្រើ ច្រឹង ពលរដ្ឋ បានទាត់គ្រាប់បាល់ជ័យជម្នះ ៣-២ បន្ទាប់ពី រ៉ឹង ប៊ុនហៀង រកបានគ្រាប់បាល់តាមស្មើ ២-២។ ទោះជាបែបនេះក្ដីលោក ទេព ឡុងរចនា គិតថា ប្រធានក្រុមទ័ពរូបនេះសាកសមជា Man of the Match ព្រោះរូបគេជួយក្រុមបានច្រើន។

គ្រូបង្វឹករូបនេះបន្ថែមថា ពលរដ្ឋ ហាក់មានការមមាញឹកជាមួយការងារថតពាណិជ្ជកម្មនានា ដែលធ្វើឲ្យកម្លាំងរបស់គេមានធ្លាក់ចុះ។ ហេតុនេះទើបលោកសម្រេចទុកគេត្រៀមលេងនៅវគ្គទី២ ប៉ុន្តែដោយសារស្ថានការណ៍កំពុងក្រុមភ្ញៀវនាំមុខទើបលោកបង្ខំចិត្តដាក់ពលរដ្ឋនៅពាក់កណ្ដាលវគ្គទី១វិញ។

ច្រឹង ពលរដ្ឋ

កីឡាករក្នុងក្រុមទាំងមូលលោកមើលឃើញថា មានឆន្ទៈខ្ពស់និងសហការគ្នាបានល្អ។ ប៉ុន្តែលោកយក រ៉ឹង ហ៊ុនហៀង ជាកីឡាករល្អជាងគេក្នុងប្រកួតនេះព្រោះកីឡាកររូបនេះមានឆន្ទៈលេងខ្ពស់ ពិសេសហ៊ានប្ដូរដើម្បីក្រុម។

ក្រោយយកឈ្នះភ្នំពេញក្រោនយប់មិញ ខណៈស្វាយរៀងចាញ់ ណាហ្គាវើល ធ្វើឲ្យក្រសួងការពារជាតិឡើងមកលេខ ១ ជាបណ្ដោះអាសន្នគិតត្រឹមសប្ដាហ៍ទី១០។ ប្រកួតបន្ទាប់ក្រុមនេះ នឹងប៉ះក្រុមចំណូលថ្មីអគ្គិសនីកម្ពុជានៅស្តាតចាស់ម៉ោង ៦ល្ងាចដែលជាការប្រកួតលីគកំពូលសប្ដាហ៍ទី១១៕