មិនទាន់ច្បាំងផង នាវាចម្បាំងអាមេរិក បុកទូកនេសាទកូរ៉េខាងត្បូង
- 2017-05-10 02:59:42
- ចំនួនមតិ 0 | ចំនួនចែករំលែក 0
មិនទាន់ច្បាំងផង នាវាចម្បាំងអាមេរិក បុកទូកនេសាទកូរ៉េខាងត្បូង
ចន្លោះមិនឃើញ
នាវារបស់កងទ័ពជើងទឹកអាមេរិកមួយគ្រឿង បានបុកជាមួយទូកនេសាទកូរ៉េខាងត្បូងមួយគ្រឿង កាលពីថ្ងៃអង្គារ កន្លងទៅនេះ ខណៈពេលដែលនាវាចម្បាំងនោះ កំពុងធ្វើប្រតិបត្តិការនៅក្នុងដែនទឹកអន្តរជាតិ ក្បែរឧបទ្វីបកូរ៉េ។
ទូកនេសាទប្រវែង ប្រហែល២០ម៉ែត្រនោះ បានបុកជាមួយនាវាចម្បាំង ប្រភេទ Ticonderoga-class ឈ្មោះថា USS Lake Champlain មានប្រវែង១៧៣ម៉ែត្រ ដែលស្ថិតនៅជាមួយក្រុមនាវា USS Carl Vinson។
ទោះបីជាយ៉ាងណា មិនមានការរងរបួសណាមួយ ត្រូវបានគេរាយការណ៍ឡើយ ខណៈគេកំពុងធ្វើការវាយតម្លៃ ចំពោះការខូចខាតនៃនាវា និងទូកទាំង២គ្រឿងនោះ។
«វាគឺជារឿងធម្មតាណាស់ ដែលមានទូកតូចចូលមកក្បែរបែបនេះ... ប៉ុន្តែមិនមានកាំភ្លើង ឬសញ្ញាជាក់ស្ដែងនៃចេតនាបង្កហេតុ នៅក្នុងហេតុការណ៍នោះឡើយ»។ នេះបើតាមសម្ដីមន្ត្រីកងទ័ពជើងទឹកអាមេរិក ប្រាប់ទៅកាន់សារព័ត៌មាន CNN។
នាវិកនៅលើទូកនេសាទនោះ ក្រោយមកបានប្រាប់ឲ្យដឹងថា ខ្លួនមិនមានវិទ្យុទាក់ទង ហើយមិនបានឮសំឡេងវិទ្យុរបស់កងទ័ពជើងទឹកឡើយ ទើបបណ្ដាលឲ្យកើតមានរឿងបែបនេះ។
យ៉ាងណាមិញ ឧបទ្ទវហេតុនោះ ត្រូវបានគេលើកជាសំណួរថា តើនាវាបរទេសអាចចូលទៅជិត នាវាកងទ័ពជើងទឹកអាមេរិក ដែលកំពុងប្រតិបត្តិការនៅតំបន់ដែលជួបប្រទះភាពតានតឹងខ្ពស់ រវាងអាមេរិក និងកូរ៉េខាងជើង បានយ៉ាងដូចម្ដេចទៅ?