វិធីសាស្ត្រចាយលុយ ពេលសល់តែ ៥០ដុល្លារ ត្រឹមពាក់កណ្ដាលខែ

2017-05-14 08:43:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាក់ខែតិចក៏ចាយខ្វះ ដល់តែប្រាក់ខែច្រើនក៏នៅតែចាយខ្វះ ហើយឱ្យតែពាក់កណ្ដាលខែអស់លុយ រលីង។ ដូច្នេះតើត្រូវធ្វើដូចម្ដេចទៅ? លុយសល់តែ ២០ម៉ឺន ចំណែកថ្ងៃដែលត្រូវអង្គុយរាប់វិញឡើងនិយាយលែងចេញ។ ប៉ុន្តែកុំបារម្ភ ខាងក្រោមនេះជាការចែករំលែក ពីអ្នកមានបទពិសោធន៍ក្នុងការចាយលុយត្បិតត្បៀត ពេលដាច់លុយម្ដងៗ។

១. លុបចោលរាល់ការណាត់ទាំងអស់

គីមឈុន អ្នកពូកែ ដាច់លុយម្នាក់ប្រាប់ថា ជាធម្មតាឱ្យតែដើមខែ ពេលបើកលុយសឹងមិនទាន់តែងមានណាត់ជាមួយមិត្តភក្ដិ ជាមួយមនុស្សជាទីស្រឡាញ់ ទៅញ៉ាំនេះញ៉ាំនោះ មើលកុន ជាដើម។ ប៉ុន្តែមកដល់ពាក់កណ្ដាលខែ អាចសល់លុយត្រឹម ៥០ដុល្លារ ប៉ុណ្ណោះ ប្រសិនបើនៅតែរក្សាពាក្យសច្ចៈទៀត ប្រាកដជាចុងខែដាច់ខ្យល់មិនខាន។ គីមឈុន ប្រាប់ថា៖ "ការណាត់ដែលនៅសល់ទាំងប៉ុន្មាន ត្រូវប្រញាប់លុបចោលជាបន្ទាន់ អាចនិយាយរកលេសដោះសា ១០០ជំពូកទៅព្រោះ ចុងខែគ្មានអ្នកស្ម័គ្រចិត្តមកចិញ្ចឹមយើងទេ"។

២. លុបចោលរាល់ការចំណាយមិនចាំបាច់

គីមឈុន ដដែលបន្តទៀតថា ត្រូវវិភាគមើលទំហំទឹកប្រាក់ និងរយៈពេលដែលត្រូវបន្តដង្ហើមចង្រិត បើវិភាគទៅឃើញថា លុយដែលនៅសល់ទាំងប៉ុន្មាន អាចចាយមិនគ្រប់ រាល់ការចំណាយមិនចាំបាច់ផ្សេងៗត្រូវលប់ចោលទាំងអស់។ ការចំណាយមិនចាំបាច់ទាំងនោះរួមមាន ទម្លាប់ញ៉ាំបាយក្រៅផ្ទះ មើលកុន ទិញសំលៀកបំពាក់ សម្ភារៈនិយម សេវាអ៊ីនធើណេត ទាំងនេះត្រូវលប់បំបាត់ទាំងអស់។ ដូច្នេះអាចបន្តដង្ហើមចង្រិត ចាំដល់ថ្ងៃបើកលុយ តទៅទៀត។

៣. ស្តុកអាហារសំខាន់ៗទុកដែលអាចកែច្នៃបាន

ចំណែល រមនា និស្សិតបញ្ចប់ការសិក្សានៅសាកលវិទ្យាល័យបៀលប្រាយ វិញលើកឡើងថា អាហារសំខាន់ៗ ត្រូវចាំបាច់ស្ដុកទុក ពេលដឹងជិតដាច់លុយនោះ មានដូចជា ត្រីខ មី សាច់ប្រឡាក់ ត្រីប្រឡាក់ ទិញត្រី ធ្វើងៀតទុក។ ដូច្នេះពេលជិតដាច់លុយក៏មិនសូវព្រួយបារម្ភដាច់បាយដែរ ម្ហូបនៅផ្ទះមានស្រាប់ហើយ ឱ្យតែមានអង្ករច្រកឆ្នាំង។ ក្រៅពីនោះលុយសល់តិចតួចទុកចាក់សាំង ទៅធ្វើការបានហើយ កុំទៅចំណាយអ្វីក្រៅពីនឹងទៀតដាច់ខាត។

៤. កំណត់លុយចាយប្រចាំថ្ងៃឱ្យច្បាស់

ដោយឡែក កញ្ញា រចនា បុគ្គលិកក្រុមហ៊ុន ឯកជនមួយកន្លែងប្រាប់ថា ត្រូវបែងចែកកញ្ចប់លុយសម្រាប់ចំណាយឱ្យច្បាស់លាស់ ត្រូវយកចំនួនលុយ ទៅចែកនឹងថ្ងៃដែលនៅសល់។ រចនា ប្តទៀតថា ប្រសិនបើលុយសល់ ២០ម៉ឺនរៀល ចំណែកថ្ងៃដែលត្រូវចាយគឺ ២០ថ្ងៃ។ ដូច្នេះធ្វើយ៉ាងម៉េច កុំឱ្យចាយលើសពី ១ម៉ឺនរៀលឱ្យក្នុងមួយថ្ងៃ បើមិនដូច្នោះទេ ប្រាកដជាអត់លិឍហើយ៕

អត្ថបទ៖ វឌ្ឍនៈ