ក្តៅៗមានគេសង្ស័យថា Avirl Lavigne ពិតប្រាកដបានស្លាប់ហើយជំនួសដោយមនុស្សថ្មី!

2017-05-16 08:43:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះមានអ្នកវិភាគទ្រឹស្ដី (Conspiracy Theorists) បានសន្និដ្ឋានថាការពិតរបស់អ្នកចម្រៀង Avril Lavigne ពិតជាច្របូកច្របល់ដូចចំណងជើងបទចម្រៀង “Complicated” របស់នាងអីចឹង មិនមែនធម្មតាដូចជាយើងបានឃើញផ្ទាល់ភ្នែកនោះទេ។

បើយោងទៅតាមអ្នកគាំទ្ររបស់នាងមួយចំនួនបានឲ្យដឹងថា តារាចម្រៀងសញ្ជាតិកាណាដារូបនេះបានស្លាប់តាំងពីប៉ុន្មានឆ្នាំមុនមកម្ល៉េះ ហើយនាងមានមនុស្សស្រដៀងនាងម្នាក់ដើម្បីរស់នៅនិងច្រៀងជំនួសនាង។ តារាចម្រៀងវ័យ ៣២ឆ្នាំនេះគឺមិនទាន់ស្លាប់ទេ ប៉ុន្តែនៅតែមានពាក្យចចាមអារ៉ាមនិងទ្រឹស្ដីវែកញែកពីនាងថា នាងបានស្លាប់តាំងពីពេលនាងចេញអាល់ប៊ុមដំបូងកាលពីឆ្នាំ ២០០២ មកម្ល៉េះ ហើយស្រីម្នាក់ដែលមានរូបរាងស្រដៀងនាងឈ្មោះ Melissa Vandella បានរស់នៅនិងច្រៀងជំនួសនាងតាំងពីពេលនោះមក។

ពាក្យចចាមអារ៉ាមនេះបានចាប់ផ្ដើមកើតមាននៅវិបសាយរបស់អ្នកគាំទ្រប្រេស៊ីលតាំងពីឆ្នាំ ២០១៥ មកម្ល៉េះ។ មានអ្នកប្រើប្រាស់ក្នុងវិបសាយនោះម្នាក់បាន បង្ហោះព័ត៌មានសន្និដ្ឋានថាដោយសារតែសម្ពាធពីភាពល្បីល្បាញជាតារា បូករួមជាមួយការស្លាប់របស់ជីតាទៀតនោះ បានធ្វើឲ្យ Avril សម្រេចចិត្តសម្លាប់ខ្លួនខណៈពេលដែលទើបតែចូលសិល្បៈ។ បន្ទាប់ពីនាងស្លាប់ Avril ត្រូវបានគេជំនួសដោយអ្នកថ្មី "New Avril” ដែលជាអ្នកសម្ដែងរឿងម្នាក់ឈ្មោះថា Melissa Vandella ត្រូវបានជួលដោយអ្នកចាត់ចែងរបស់ Avril ចេតនាដើម្បីរកលុយដោយប្រើឈ្មោះនិងរូបរាងតារាចម្រៀងរូបនេះ។

អ្នកវិភាគទាំងនោះចាប់អារម្មណ៍ទៅលើការផ្លាស់ប្ដូរសំខាន់របស់នាង ដូចជាការតែងខ្លួន ប្រភេទបទភ្លេងថ្មីៗរបស់នាងដែលបានបង្ហាញនៅអាល់ប៊ុមទី២នៅឆ្នាំ២០០៤។ ចំណុចដែលគួរឲ្យកត់សម្គាល់ខ្លាំងគឺការផ្លាស់ប្ដូរការស្លៀកពាក់របស់នាងជារបៀបស្រីធម្មតាមិនមែន Rock'n Roll ដូចកាលពីមុននិងចង្វាក់បទភ្លេងរបស់នាងពី Rock មកទៅជាលក្ខណៈ Pop វិញ។

ទ្រឹស្ដីនោះបានបញ្ជាក់ទៀតថា តារាម្ចាស់បទ "Sk8er Boi” រូបនេះចាប់ផ្ដើមត្រូវគេប្រមូលភស្តុតាងដែលបានបង្ហាញពីរូបថតរបស់នាងប៉ុន្មានឆ្នាំក្រោយ បានបង្ហាញថាដៅពីកំណើត រូបសាក់ ត្រូវបានផ្លាស់ប្ដូរទីតាំង ជាពិសេសរូបរាងច្រមុះនិងថ្គាមរបស់នាងគឺប្រែប្រួលយ៉ាងខ្លាំង។ ទោះបីជាការផ្លាស់ប្ដូរនោះ អាចមកពីការវះកាត់កែសម្រស់ ឫក៏បច្ចេកទេសនៃការថតក៏ដោយ ក៏នៅតែមានអ្នកសង្ស័យមិនចេះចប់។

នេះមិនមែនជាលើកទី១ ទេសម្រាប់តារាល្បីដែលត្រូវបានគេសង្ស័យថាស្លាប់ហើយមានមនុស្សជំនួសបែបនេះ តារាល្បីៗដូចជា Prince, Beyonce, និង Paul McCartney ក៏ធ្លាប់ត្រូវគេសង្ស័យដូចគ្នា៕

ប្រភព៖ Dailymail ប្រែសម្រួល៖ ធារ៉ូ