HTC U 11 ទូរសព្ទអាចច្របាច់បាន ចេញជាផ្លូវការហើយ

2017-05-16 08:38:08
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលដើមឆ្នាំ ២០១៧ HTC បានបញ្ចេញស្មាតហ្វូនថ្មីពីរម៉ូដែលគឺ U Ultra និង U Play ប៉ុន្តែហាក់មិនទទួលបានគាំទ្រខ្លាំងឡើយ។ ពេលនេះ HTC បានបញ្ចេញស្មាតហ្វូនមួយម៉ូដែលទៀត HTC U 11 ដែលមានចំណុចពិសេស អាចបញ្ជាមុខងារតាមរយៈការច្របាច់។

ការបញ្ជាតាមការច្របាច់នេះត្រូវបាន HTC ហៅថាមុខងារ Edge Sense ដោយវាអាចធ្វើការបញ្ជាដូចជាការថតរូបតាមរយៈការច្របាច់តួខ្លួន U 11 ជាដើម។ អ្នកប្រើប្រាស់អាចកំណត់បានពីកម្លាំងដែលត្រូវច្របាច់ដើម្បីបញ្ជាដំណើរការអ្វីមួយ។ មុខងារគួរឲ្យចាប់អារម្មណ៍មួយទៀតគឺ U 11 អាចថតសំឡេងជាប្រភេទ 3D បានដោយប្រើប្រាស់រន្ធស្រូបសំឡេងចំនួន ៤ បំពាក់លើទូរសព្ទ។

ការបង្ហាញពី Edge Sense

រូបរាងធ្វើពីកញ្ចក់ និង មានសល់គែមសងខាងច្រើនរបស់ HTC U 11 នេះហាក់មិនមានភាពទាក់ទាញប៉ុន្មានឡើយ ប៉ុន្តែកម្លាំងម៉ាស៊ីនអាចប្រជែងនឹងស្មាតហ្វូនកំពូលដទៃបានដោយ U 11 មានប្រើបន្ទះឈីប Snapdragon 835។

ចំណែក RAM មានប្រភេទ RAM ទំហំ 4 GB/អង្គផ្ទុកទិន្នន័យ 64 GB និង ប្រភេទ RAM ទំហំ 6 GB/អង្គផ្ទុកទិន្នន័យ 128 GB។

បំពាក់ដោយអេក្រង់ទំហំ ៥,៥ អ៊ីញ Super LCD កម្រិត QHD និង មានការពារដោយអេក្រង់ Gorilla Glass ជំនាន់ទី ៥។ កាមេរ៉ាខាងក្រោយមានកម្រិត ១២ MP, Aperture f/1.7, ប្រព័ន្ធរក្សាលំនឹងរូបភាព OIS, Flash ពីរគ្រាប់, អាចថតវីដេអូកម្រិត 4K និង អាចថតវីដេអូ Slow Motion កម្រិត ១២០ ប្លង់ក្នុងមួយវិនាទី។

កាមេរ៉ា Selfie មានកម្រិតធំជាងកាមេរ៉ាក្រោយទៅទៀត ដោយមានដល់ ១៦ MP, អាចថតវីដេអូកម្រិត 1080p Full HD និង អាចថត Selfie ជាលក្ខណៈ Panorama បាន។

HTC U 11 ប្រើរន្ធ USB Type-C និង លែងមានរន្ធដោតកាស 3.5mm ទៀតហើយ។ ថ្មមានទំហំ ៣០០០ mAh ដែលអាចទ្រាំទ្រនឹងបច្ចេកវិទ្យាសាកថ្មបានលឿន Quick Charge 3.0។

មិនតែប៉ុណ្ណោះអាចធន់នឹងទឹក និង ធូលីដីបានដោយមានកម្រិតការពារ IP67 ហើយមានដំណើរការដោយប្រព័ន្ធប្រតិបត្តិការ Android 7.1 Nougat។ U 11 មានជម្រើសពណ៌ចំនួន ៥ មានដូចជា ប្រាក់, ខៀវ, ខ្មៅ, ស និង ពណ៌ក្រហម ដែលមានដាក់លក់ចាប់ពីឧសភានេះ ក្នុងតម្លៃ ៦៥០ ដុល្លារ៕

ប្រភព៖ GSMarena ប្រែសម្រួល៖ សុខហេង