ព្យាយាមគង់បានសម្រេច ទីបំផុតស្រីស្អាតរូបនេះយកឈ្នះបានមែន

2017-05-17 00:01:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវតីវ័យ ២៣ឆ្នាំ មឿង សុភ័ក្រ ដោយសារការតស៊ូចិញ្ចឹមចិត្តស្រឡាញ់សិល្បៈមិនបោះបង់ ថែមទាំងព្យាយាមចាប់ឱកាសម្ដងហើយម្ដងទៀត ទីបំផុតនាងបានសម្រេចបាន ដោយពេលនេះនាងបានក្លាយជាសិល្បការិនីតាមបំណង មានជំនាញជាតារាម៉ូដែល និងសម្ដែង បើទោះមុននេះ ឪពុកម្ដាយមិនពេញចិត្តក៏ដោយ។

សុភ័ក្រ ដែលកើតនៅរាជធានីភ្នំពេញ បានប្រាប់ថា ដំបូងឡើយឪពុកម្ដាយនាងមិនគាំទ្រឲ្យនាងចូលសិល្បៈទេ អីចឹងហើយ ទើបនាងបានបោះបង់ចោលការងារសិល្បៈមួយអំឡុងឆ្នាំ ២០១២ ដែលកាលណោះ នាងបានចូលរួមប្រឡងកម្មវិធី "Khmer Super Model” ក្រោយពីបរាជ័យក្នុងកម្មវិធី "King & Queen” ដែលរៀបចំដោយសាលាភាសាអង់គ្លេសរបស់នាង។

ក្នុងកម្មវិធី "Khmer Super Model” សុភ័ក្រ ប្រាប់ថា នាងបានជាប់ដល់វគ្គ ២០នាក់ចុងក្រោយក្នុងចំណោមបេក្ខជនសរុបប្រមាណ ១៥០០នាក់។ កាលណោះ ដោយសារកម្មវិធីតម្រូវឲ្យធ្វើកុងត្រាផងក្នុងចំណោមអ្នកជាប់ ២០នាក់ ផ្សំនឹងឪពុកម្ដាយមិនចូលចិត្តសិល្បៈ នាងក៏សម្រេចចិត្តដកខ្លួន។ "ដោយសារគេតម្រូវធ្វើកុងត្រាផង ប៉ាម៉ាក់ ក៏បានបញ្ឈប់ខ្ញុំ ហើយខ្ញុំក៏ធ្វើទៅ ព្រោះប៉ាម៉ាក់ខ្ញុំ អត់ចូលចិត្តសិល្បៈ"។

បើទោះយ៉ាងនេះក្ដី និស្ស័យសិល្បៈមិនអស់ នៅឆ្នាំ ២០១៥ ក្រោយមើលទូរទស្សន៍គេផ្សាយកម្មវិធីបង្ហាញម៉ូដ Cambodian Next Top Model នាងក៏បានលួចទៅដាក់ពាក្យប្រឡងទៀតដោយមិនឲ្យឪពុកម្ដាយនាងដឹងឡើយ។ ក្រោយប្រឡងសមត្ថភាពជាច្រើនវគ្គ ស្រីស្អាតរូបនេះ មិនទទួលលទ្ធផលល្អទេ គឺនាងបានត្រឹមវគ្គ ៦នាក់ចុងក្រោយប៉ុណ្ណោះ។

បែបនេះក្ដី លទ្ធផលនេះ ក៏បានសម្រេចក្ដីប្រាថ្នាសិល្បៈរបស់នាងដែរ។ កញ្ញា មឿង សុភ័ក្រ ប្រាប់ថា បន្ទាប់ពីកម្មវិធីនោះមក នាងក៏ត្រូវបានក្រុមហ៊ុននានាហៅថតពាណិជ្ជកម្ម និងដើរម៉ូដមកជាហូរហែ។ សម្រេចបំណងសិល្បៈបាន ឪពុកម្ដាយក៏លែងហាមឃាត់ក្រោយឃើញ ការងារកូនស្រីរីកចម្រើន។

ថ្មីៗនេះទៀត សុភ័ក្រ ទើបបានឈានជើងមកការងារសម្ដែងភាពយន្តទៀតដោយបាន និងកំពុងថតរឿង "បំណុលផ្ទះជំពាក់ស្នេហ៍" ផលិតដោយទូរទស្សន៍ TV8HD ត្រៀមនឹងចាក់បញ្ចាំងក្នុងពេលឆាប់ៗនេះ។ មឿង សុភ័ក្រ មានវ័យ ២៣ឆ្នាំ កើតនៅរាជធានីភ្នំពេញ ព្រមទាំងមានបងប្អូនពីរនាក់ គឺបងប្រុសនាង និងនាងជាកូនពៅ។ ឪពុករបស់ សុភ័ក្រ គឺជាមន្ត្រីរាជការ ឯម្ដាយជាមេផ្ទះ៕