ទឹកចិត្តម្ដាយធំប៉ុនមហាមេឃ ឃ្មឹប បញ្ជាក់ លែងទៅណាចោលកូនហើយ ទោះកូនកំពុងជាប់ឃុំក្ដី!(វីដេអូ)

2017-05-19 05:19:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ឡើងពីជាយដែនមកទាំងតក់ក្រហល់ ដំបូងឡើយអតីតតារាកំប្លែង រ៉េន្ម សុធារី ហៅ ឃ្មឹប ប្រាប់ថា គោលបំណងតែមួយគត់របស់នាង គឺមកចង់ជួបមុខកូនប្រុស ក្រៅពីនេះមិនបានគិតអ្វីឡើយ។ ប៉ុន្តែក្រោយបានជួបហើយ នាងអះអាងថា លែងទៅណាចោលកូនហើយ។

នៅក្នុងបទសម្ភាសន៍ថ្មីៗនេះជាមួយសារព័ត៌មាន ឃ្មឹប នឹងបន្តនៅភ្នំពេញនេះដោយស្នាក់នៅជាមួយប្អូនស្រី រកការងារធ្វើ ពិសេសការងារសិល្បៈ ដោយមិនវិលត្រឡប់ទៅខ្ទមនៅក្បែរជើងភ្នំធំ ជាទីដែលនាងជ្រកកោនចិញ្ចឹមជីវិតដោយស៊ីឈ្នួលគេជាច្រើនឆ្នាំនោះទេ។

អតីតតារាកំប្លែងក្នុងក្រុមនាយ កុយ រូបនេះ បញ្ជាក់ថា បំណងរបស់នាង គឺគ្រាន់តែនៅជិតកូន បើទោះពេលនេះកូនប្រុសកំពុងតែមានទោសជាប់ខ្លួនក៏ដោយ។ "ឃើញកូនអញ្ចឹង មួយជីវិតនេះ ខ្ញុំពិតជាក្ដុកក្ដួលក្នុងចិត្តខ្លាំងណាស់ ដូច្នេះហើយ ខ្ញុំមិនអាចត្រឡប់ទៅខេត្តវិញបានទេ ខ្ញុំនឹងនៅភ្នំពេញនេះ ហើយរកការងារធ្វើ ងាយស្រួលធ្វើបាយធ្វើទឹកយកទៅឲ្យកូនប្រុសខ្ញុំ!" ឃ្មឹបពោលទាំងទឹកភ្នែក។

ក្ដីបំណងធំតែមួយគត់របស់ ឃ្មឹប ពេលនេះ គឺគ្រាន់តែចង់នៅកៀកនឹងកូនប្រុស ងាយនឹងឡើងចុះជួបកូនមុខកូន ផ្ដល់បាយទឹក ខណៈជាច្រើនឆ្នាំមកហើយ នាងបានឃ្លាតឆ្ងាយពីកូន ធ្វើឲ្យកូនបាត់ភាពកក់ក្ដៅ ហើយនេះក៏ជាមូលហេតុមួយដែលនាងយល់ថា បានធ្វើឲ្យកូនប្រុសជ្រុលខ្លួនដើរខុសផ្លូវដែរ។ ដូច្នេះហើយ នាងចង់ប៉ះប៉ូវខ្លះនូវចន្លោះប្រហោងកាលពីពេលមុន។

ទន្ទឹមនឹងការសម្រេចចិត្តមិនត្រឡប់ទៅខេត្តវិញនេះ ឃ្មឹប បញ្ជាក់ថា ពេលនេះ នាងចង់ចូលប្រឡូកការងារសិល្បៈវិញ។ យ៉ាងណា នាងមិនទាន់ដឹងថា ចូលទៅខាងណា ឬធ្វើអ្វីនៅឡើយ។បញ្ហានេះដែរ អតីតភរិយានាយ ហុងដា រូបនេះ បញ្ជាក់ទៀតថា បើទោះពេលនេះ រូបរាងនាងប្រែប្រួលដោយស្បែកសម្បុរខ្មៅស្រអាប់ដោយការងារស៊ីឈ្នួលគេក្រោមកំដៅថ្ងៃក៏ពិតមែន ប៉ុន្តែសមត្ថភាពនាងមិនប្រែស្រអាប់ដូចស្បែកនោះឡើយ។

"ខ្ញុំនៅតែអាចសម្ដែងបានដូចមុន បើបងប្អូនដែលធ្លាប់គាំទ្រខ្ញុំ ឃើញការសម្ដែងខ្ញុំពីមុនយ៉ាងម៉េច ពេលនេះ ខ្ញុំនៅតែអាចសម្ដែងបាន និងព្យាយាមសម្ដែងឲ្យល្អដូចគ្នាអីចឹង!"៕

អត្ថបទ៖ ឆុង ស៊ីណាន