កម្មវិធីពានរង្វាន់សហគ្រិនវ័យក្មេងកម្ពុជា ២០១៧ នឹងផ្ដល់សារប្រយោជន៍ជាច្រើនដល់សហគ្រិនវ័យក្មេងនានា

2017-05-19 05:00:37
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីប្រកួតប្រជែងពានរង្វាន់សហគ្រិនវ័យក្មេងកម្ពុជា ឆ្នាំ២០១៧ ដែលហៅកាត់ថា CYEA (Cambodia Young entrepreneurs Award) បាន និង កំពុងស្វែងរកសហគ្រិនវ័យក្មេងនានារបស់កម្ពុជាដែលមានគំនិតអាជីវកម្មល្អៗនិង ពោរពេញដោយសមត្ថភាព ដើម្បីគ្រងតំណែងពានរង្វាន់ខុសៗគ្នាចំនួន៥ ប្រភេទសម្រាប់ឆ្នាំនេះ។

ក្នុងឱកាសធ្វើបទបង្ហាញមួយអំពីកម្មវិធីនេះ ទៅកាន់បេក្ខជននានា លោក ឃឹម ប៊ុនឡែន ប្រធានរៀបចំគម្រោងនៃកម្មវិធីបានបញ្ជាក់ថា កម្មវិធីពានរង្វាន់សហគ្រិនវ័យក្មេងកម្ពុជា ២០១៧ ធ្វើឡើងក្នុងគោលបំណងដូចជា៖ ស្គាល់បន្ថែមពីសហគ្រិនវ័យក្មេងថ្មីៗរបស់កម្ពុជា និង ជំរុញលើកទឹកចិត្តដល់អ្នកទាំងនោះ។

មិនតែប៉ុណ្ណោះ គឺចង់ស្វែងរកសហគ្រិនវ័យក្មេងឆ្នើមដែលពោរពេញដោយសមត្ថភាពខ្ពស់ទាំងកម្រិតជាតិ និង អន្តរជាតិ។ លើសពីនេះទៅទៀត សហគ្រិនវ័យក្មេងទាំងនោះ ក៏នឹងអាចទទួលបានឱកាសក្នុងការវិនិយោគពីសំណាក់វិនិយោគិននានាផងដែរ។

លោក ឃឹម ប៊ុនឡែន

ចំណែក លោក ជី សិលា នាយកប្រតិបត្តិនៃក្រុមហ៊ុន Sabay Digital Corporation បានចែករំលែកថា ជាបទពិសោធន៍ផ្ទាល់ខ្លួនរបស់លោក ពេលដែលចាប់ផ្ដើមអាជីវកម្មដំបូងគឺ លោកបានជួបនឹងឧបសគ្គនានាជាច្រើន ដូចជាការខ្វះទំនុកចិត្តពីអតិថិជនជាដើម។ ហេតុនេះហើយទើបលោកបានលើកទឹកចិត្ត និង បំផុសជាគំនិតក្នុងការបង្កើតជាកម្មវិធីប្រភេទនេះឡើង ដើម្បីជួយដល់សហគ្រិនវ័យក្មេងរបស់កម្ពុជាក្នុងការចាប់ផ្ដើមបង្កើតគំនិតអាជីវកម្មល្អៗ និង មានឱកាសធ្វើទំនាក់ទំនងជាមួយសហគ្រិននានាជាដើម។

លោក ជី សិលា

មួយវិញទៀត លោក ឃឹម ប៊ុនឡែន បានរៀបរាប់ថា សម្រាប់ឆ្នាំ ២០១៧នេះ កម្មវិធីមានពានរង្វាន់ទាំងអស់ចំនួន៥ គឺ៖ ពានរង្វាន់សហគ្រិនវ័យក្មេងឆ្នើម ពានរង្វាន់សហគ្រិនស្ត្រីវ័យក្មេង ពានរង្វាន់សហគ្រិនវ័យក្មេងផ្នែកសង្គម ពានរង្វាន់សហគ្រិនវ័យក្មេងផ្នែកបច្ចេកវិទ្យាវ័យឆ្លាត និង ពានរង្វាន់សហគ្រិនវ័យក្មេងកំពុងចាប់ផ្ដើមអាជីវកម្ម។ ចំណែកបេក្ខជនដែលមិនបានទទួលជ័យលាភី ពួកគាត់ក៏នឹងទទួលបាននូវបទពិសោធន៍ល្អៗក្នុងការពង្រឹងអាជីវកម្មរបស់ខ្លួនឲ្យកាន់តែរឹងមាំតទៅមុខផងដែរ។ ព្រោះថាគណៈកម្មការវាយតម្លៃគឺសុទ្ធសឹងជាសហគ្រិនជោគជ័យ និង មានបទពិសោធន៍ខ្ពស់ក្នុងវិស័យជំនួញ ដែលពួកគាត់នឹងអាចផ្ដល់នូវមតិកែលម្អនានាសម្រាប់ការអភិវឌ្ឍន៍ផ្នែកអាជីវកម្មថ្មីថ្មោង។

ចំពោះលក្ខខណ្ឌនៃការប្រកួតប្រជែងគឺ៖ សហគ្រិនត្រូវមានអាយុមិនលើសពី៤៥ឆ្នាំ អាជីវកម្មត្រូវបានបង្កើតនៅប្រទេសកម្ពុជា និង មានភាគហ៊ុនយ៉ាងតិច៥១%គ្រប់គ្រងដោយជនជាតិខ្មែរ។ មិនតែប៉ុណ្ណោះ អាជីវកម្មត្រូវចុះបញ្ជីការត្រឹមត្រូវតាមផ្លូវច្បាប់ និង មានដំណើរការយ៉ាងតិច២ឆ្នាំ។ អាជីវកម្មត្រូវមានបុគ្គលិកអចិន្ត្រៃយ៍យ៉ាងតិច៥នាក់ ហើយ សហគ្រិន ឬ អាជីវកម្មមិនត្រូវបានពាក់ព័ន្ធជាមួយគណៈកម្មការជ្រើសរើស និង ក្រុមអ្នករៀបចំកម្មវិធី។ ជាពិសេសមិនមែនជាប្រភេទអាជីវកម្មបែបល្បែងស៊ីសង អាជីវកម្មខុសច្បាប់ ថ្នាំជក់ និង គ្រឿងស្រវឹងនានាជាដើម។

សម្រាប់សហគ្រិនដែលចាប់អារម្មណ៍ចង់ចូលរួមដាក់ពាក្យប្រកួតប្រជែងនៅក្នុងកម្មវិធីនេះ អាចចូលទៅកាន់វេបសាយ http://cyeaward.com/ ឬ ទាក់ទងមកកាន់ទូរស័ព្ទលេខ ០៦៩ ៥៤៥ ៦៧៨ / ០៩៧ ២៥៧ ៨២៨៦។ ផុតកំណត់ការដាក់ពាក្យនៅថ្ងៃទី៣១ ខែ ឧសភា ឆ្នាំ ២០១៧ ខាងមុខនេះ ហើយការចុះឈ្មោះចូលរួមគឺដោយសេរី និង មិនគិតថ្លៃឡើយ៕

អត្ថបទ៖ ចន្ថា