ថុល មករា ហត់នឿយតែទ្រាំដើម្បីបទពិសោធន៍និងប្រាក់ចំណូល

2017-05-19 06:00:14
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ដែលឧស្សាហ៍លេចមុខឡើងប្រកួតក្នុងកម្មវិធីនានានៅប្រទេសថៃ ថុល មករា លើកឡើងថាពេលខ្លះមានអារម្មណ៍ហត់នឿយនឹងការជិះរថយន្តទៅប្រទេសថៃដើម្បីប្រកួតដែរ តែធ្វើម៉េចទេមានតែទ្រាំដើម្បីបទពិសោធន៍ ហើយណាមួយក៏បានប្រាក់ចំណូលថែមទៀតដែរ។

កីឡាករ ថុល មករា

កីឡាករ ថុល មករា បានឲ្យដឹងថា បច្ចុប្បន្ននេះក្រៅពីឡើងប្រកួតនៅតាមសង្វៀននានានៅកម្ពុជា គេក៏មានឱកាសបានទៅប្រកួតនៅប្រទេសថៃញឹកញាប់ផងដែរ ដោយសារស្គាល់ម្ចាស់ក្លឹបក៏ដូចជាគ្រូប្រដាល់នៅទីនោះ។ ការពិតទៅនៅថ្ងៃទី២៦ ខែឧសភា ឆ្នាំ២០១៧ខាងមុខនេះ មករាត្រូវទៅប្រកួតនៅប្រទេសថៃជាថ្មីទៀត តែដោយសារមានរបួសបែកមុខដេរអស់១០ថ្នេរ កាលពីប្រកួតនៅសង្វៀន PNN កន្លងទៅនេះទើបត្រូវលុបការប្រកួតនៅប្រទេសថៃនោះចោលវិញ។

កីឡាករ ថុល មករា

អ្នកប្រដាល់ល្បីឈ្មោះនៅប្រទេសថៃរូបនេះបន្តឲ្យដឹងទៀតថា ពេលខ្លះក៏មានអារម្មណ៍ថាហត់នឿយនឹងការឡើងចុះទៅប្រទេសថៃដែរ ព្រោះត្រូវធ្វើដំណើរយូរពេក តែមិនដឹងធ្វើយ៉ាងម៉េចមានតែទ្រាំទៅ។ បើនិយាយពីប្រាក់ចំណូលវិញគឺមិនជាបានច្រើនណាស់ណាទេ គឺបានប្រហាក់ប្រហែលប្រកួតនៅកម្ពុជាដែរ។

កីឡាករ ថុល មករា ជាម្ចាស់មេដាយមាសកីឡាជាតិលើកទី១ ហើយគេប្រកួតចុងក្រោយឈ្នះកីឡាករថៃដោយពិន្ទុកាលពីថ្ងៃអាទិត្យសប្ដាហ៍មុននៅសង្វៀនទូរទស្សន៍ PNN៕

អត្ថបទ៖ នួន ស៊ីណា