គីម ហ៊ាង តស៊ូរៀនដល់អស់ថ្នាក់ ដើម្បីបំណងម្ដាយស្លាប់ចោលពី២០ឆ្នាំមុន តែឆ្លងកាត់រឿងនឹកស្មានមិនដល់
- 2017-05-20 03:04:59
- ចំនួនមតិ 0 | ចំនួនចែករំលែក 0
គីម ហ៊ាង តស៊ូរៀនដល់អស់ថ្នាក់ ដើម្បីបំណងម្ដាយស្លាប់ចោលពី២០ឆ្នាំមុន តែឆ្លងកាត់រឿងនឹកស្មានមិនដល់
ចន្លោះមិនឃើញ
លោក គីម ហ៊ាង ប្រធានសមាគមវាយតម្លៃ និងភ្នាក់ងារអចលនទ្រព្យកម្ពុជា ទើបតែបញ្ចប់ការសិក្សាថ្នាក់បណ្ឌិត ដោយជោគជ័យ កាលពីម្សិលមិញនេះ នៅសាកលវិទ្យាល័យអាស៊ីអឺរ៉ុប។ អ្វីដែលគួរឱ្យកោតសរសើរនោះ លោកតស៊ូរៀនរហូតដល់ចប់ថ្នាក់នេះ ព្រោះដើម្បីបំពេញគោលបំណងធំម្ដាយរបស់លោកដែលស្លាប់តាំងពី ២០ឆ្នាំមុន ហើយតែងនិយាយថា "កូនត្រូវរៀនឱ្យចប់ថ្នាក់ ណាកូន"។
ម្ចាស់ក្រុមហ៊ុន KHMER REAL ESTATE Co.,LTD រូបនេះបាននិយាយក្នុងថ្ងៃបញ្ចប់ការសិក្សាថ្នាក់បណ្ឌិតថា៖ "អ្វីដែលជំរុញទឹកចិត្តខ្ញុំ ឱ្យតស៊ូរៀនរហូតចប់ថ្នាក់បណ្ឌិតនោះ ព្រោះចង់បំពេញបំណងដ៏ធំបំផុត របស់ម្ដាយខ្ញុំ ដែលចង់ឱ្យខ្ញុំរៀនឱ្យចប់ថ្នាក់ ប៉ុន្តែគាត់បានស្លាប់ចោលខ្ញុំ ២០ឆ្នាំមកហើយ"។ លោក គីម ហ៊ាង បានរំលឹកទៅកាន់អតីតកាលថា កាលលោកនៅក្មេងជីវភាពគ្រួសារធូរធារណាស់ នៅភូមិបាវិតលើ ឃុំបាវិត ស្រុកចន្រ្ទា ខេត្តស្វាយរៀង តែពេលរៀននៅវិទ្យាល័យ ការរកស៊ីក្នុងគ្រួសារចាប់ផ្ដើមធ្លាក់ចុះ ហើយម្ដាយក៏បានស្លាប់ទៀតក្នុងឆ្នាំ ១៩៩៧ ពេលនោះហើយ អ្វីៗគ្រប់យ៉ាងត្រូវបានផ្លាស់ប្ដូរទាំងស្រុង។
ទោះបីជាជីវភាពគ្រួសារធ្លាក់ចុះ តែលោកមិនដែលបោះបង់ការតស៊ូឡើយ នៅពេលដែលប្រឡងបាក់ឌុបជាប់ក្នុងឆ្នាំ ១៩៩៨ នៅវិទ្យាល័យស្វាយរៀង លោកក៏សម្រេចចិត្តយកជីវិត និងក្ដីសុបិនមកផ្សងព្រេងរស់នៅរាជធានីភ្នំពេញ ដោយចាប់ផ្ដើមធ្វើជាអ្នករត់តុ នៅក្លឹបកម្សាន្តឌីស្កូ និងKTV នៅអគារ Parkway ចាប់ពីម៉ោង៦ល្ងាច ដល់ម៉ោង ២ទាបភ្លឺជារៀងរាល់ថ្ងៃ។
លោកបានបញ្ចប់ថ្នាក់បរិញ្ញាបត្រ នៅសាកលវិទ្យាល័យជាតិគ្រប់គ្រង កំឡុងឆ្នាំ ១៩៩៨-២០០៣ ហើយអ្វីដែលលោកចាំមិនភ្លេច និងបានបញ្ចប់ការសិក្សាថ្នាក់អនុបណ្ឌិត នៅសាកលវិទ្យាល័យបៀលប្រាយរហូតជោគជ័យក្នុងឆ្នាំ ២០០៦។ អ្វីដែលលោកចាំមិនភ្លេចនោះ គឺឪពុករបស់លោកបានយកប្លង់ផ្ទះទៅបញ្ចាំ ដើម្បីយកលុយឱ្យកូនរៀន និងបងប្រុសបង្កើតរបស់លោក បាននិយាយថា៖ "ប្អូនត្រូវខិតខំរៀនឱ្យចប់ រឿងលុយចាំបងជាអ្នករក បងមិនរៀបការទេ ចាំដល់ប្អូនរៀនចប់"។
មកដល់ឆ្នាំ ២០០៧ ដើម្បីសម្រេចបំណងរបស់ម្ដាយ លោកក៏បានបន្តការសិក្សាថ្នាក់បណ្ឌិត នៅសាកលវិទ្យាល័យ អាស៊ីអឺរ៉ុប ខណៈដែលលោកបានក្លាយជាម្ចាស់ក្រុមហ៊ុន KHMER REAL ESTATE Co.,LTD ហើយនោះ។ លោក គីម ហ៊ាង ប្រាប់ទៀតថា ការសិក្សារបស់លោកមិនអាចទៅដោយរលូននោះទេ ព្រោះរវល់ខ្លាំងជាមួយការងារ ប៉ុន្តែយ៉ាងណាក្ដីលោកក៏មិនដែលគិតចង់បោះបង់។
មកដល់ឆ្នាំ ២០១៧ នេះលោកមានវ័យ ៣៨ឆ្នាំ ហើយក៏បានបញ្ចប់ការសិក្សាថ្នាក់បណ្ឌិត ប្រកបដោយភាពជោគជ័យបំផុត។ ប្រធានសមាគមវាយតម្លៃ និងភ្នាក់ងារអចលនទ្រព្យកម្ពុជា ប្រាប់ថា សញ្ញាបត្រថ្នាក់បណ្ឌិតនេះ មិនមែនសម្រាប់តែលោកម្នាក់ទេគឺសម្រាប់ម្ដាយ ឪពុក និងបងប្រុស ដែលតែងផ្ដល់កម្លាំងចិត្តរហូតមក៕