ប៉ុន្មានចំណុចនេះ ល្មមដកចិត្តបានពី iPhone 7 Plus រើសយក HTC U11 ជំនួសវិញ
- 2017-05-20 04:05:45
- ចំនួនមតិ 0 | ចំនួនចែករំលែក 0
ប៉ុន្មានចំណុចនេះ ល្មមដកចិត្តបានពី iPhone 7 Plus រើសយក HTC U11 ជំនួសវិញ
ចន្លោះមិនឃើញ
វត្តមាននៃម៉ូដែល U11 បានប្រែក្លាយជាស្មាតហ្វូនកំពូលជំនាន់ចុងក្រោយបង្អស់របស់ក្រុមហ៊ុន HTC ដោយឡែកបើធៀបទៅនឹងគូប្រកួតប្រជែងរបស់វា iPhone 7 Plus របស់ Apple វាក៏មិនណយនោះដែរ។ ថ្ងៃនេះ Sabay លើកយកនូវចំណុចមួយចំនួននៃការប្រៀបធៀបលក្ខណៈសម្បត្តិពិសេសៗ ជាច្រើនចំណុចរវាងស្មាតហ្វូនទាំង ២ ដោយចម្លើយចុងក្រោយហ៊ាននិយាយថា ការជ្រើសរើស HTC U11 ជាជម្រើសល្អជាង។
១.លក្ខណៈសម្បត្តិគ្រឿង: វាងាយណាស់បើយើងលើកយកស្មាតហ្វូនដំណើរការនៅលើប្រព័ន្ធប្រតិបត្តិ Android តែមួយមកប្រៀបធៀបគ្នា ប៉ុន្តែបើជាមួយ iOS នោះអាចជាពិបាកបន្តិច។ U11 បានបំពាក់នូវបន្ទះឈីបជំនាន់ចុងក្រោយ Snapdragon 835 របស់ Qualcomm ដែលមានទំហំ RAM 4GB + ROM 64GB (ទីផ្សារអាមេរិក) និងទំហំ RAM 6GB + ROM 64/128GB (ទីផ្សារសកលលោក) ចំណែកឯ i7 Plus ឯណោះវិញ វាបំពាក់នូវឈីប A10 Fusion របស់ Apple ហើយមាន RAM 3GB និង ROM 32,128,256GB ខណៈដែលវាពុំមានរន្ធដោតបន្ថែម microSD Card ពីខាងក្រៅដូចទៅនឹង U11 ឡើយ។ ចំពោះការប្រៀបធៀបល្បឿនជាក់ស្ដែង តាមពិតទៅវាមិនទាន់មានការលេចចេញជាផ្លូវការនោះទេ ថារវាងស្មាតហ្វូនទាំង ២ មួយណាដំណើរការលឿនជាង ម្ល៉ោះហើយត្រង់ចំណុចនេះ សូមកាត់សេចក្ដីថាស្មើគ្នា។ ២.ការរចនានិងអេក្រង់: iPhone 7 Plus ជាស្មាតហ្វូនមានការរចនាខ្ពស់ក្រោយគេបង្អស់របស់ Apple ចំណែកឯ U11 វាក៏រាងប្លែកជាងត្រកូលមុនៗផងដែរ។ ខ្នងក្រោយរបស់ U11 មានត្រឹមតែ Logo HTC និងកាមេរ៉ាធម្មតា បើនិយាយពីកម្រាស់តួខ្លួន HTC U11 រាងក្រាសជាង iPhone បន្តិច ប៉ុន្តែវាមិនជាបញ្ហាចោទនោះទេ។ យ៉ាងណាមិញស្មាតហ្វូនទាំង ២ ពុំមានរន្ធដោតកាសដូចគ្នា បើអ្នកប្រើប្រាស់ចង់ស្តាប់តន្រ្តី លុះត្រាតែភ្ជាប់ជាមួយកាស Bluetooth ឫតាមខ្សែ USB-C/Lightning ។
បើនិយាយពីអេក្រង់ វាទាំង ២ មានអេក្រង់ ៥,៥ អ៊ីញប៉ុនគ្នា ប៉ុន្តែអេក្រង់ iPhone អន់ជាង U11 ព្រោះវាជាប្រភេទ LCD ធម្មតាខណៈ U11 ជាប្រភេទ S-LCD ហើយកម្រិតរូបភាពច្បាស់ iPhone មានត្រឹមតែ ១០៨០ x ១៩២០ ភីកសែល ដែលមានដង់ស៊ីតេអេក្រង់ 401ppi ហើយ U11 មានដល់ទៅ ១៤៤០ x ២៥៦០ ភីកសែល ដែលមានដង់ស៊ីតេអេក្រង់ 535ppi ។ សរុបមកចំណុចទី ២ នេះ យើងហ៊ានលើកឡើងថា U11 ជាអ្នកឈ្នះ។ ៣.ទំហំថាមពលថ្មនិងការសាក: ចំពោះទំហំថាមពលថ្ម HTC U11 មាន ៣០០០ មីលីអំពែម៉ោង ចំណែកឯ iPhone 7 Plus មាន ២៩០០ មីលីអំពែម៉ោង ដែលមិនជាខុសគ្នាច្រើននោះទេ ប៉ុន្តែរបាយការណ៍ច្បាស់លាស់មួយបង្ហាញថា សម្រាប់ការនិយាយសុទ្ធក្នុងថាមពលថ្មមួយពេញ U11 អាចប្រើបានដល់ ២៤,៥ ម៉ោងខណៈ iPhone 7 Plus បានត្រឹមតែ ២១ ម៉ោងប៉ុណ្ណោះ។ ចំពោះការសាកថ្ម HTC U11 បានបំពាក់នូវបច្ចេកវិទ្យាសាកថ្មរហ័ស Quick Charge ជំនាន់ 3.0 ដែលអនុញ្ញាតឱ្យយើងចំណាយពេលសាកថ្មក្នុងថេរវេលាតិច ជាង iPhone 7 Plus ដែលពុំមានមុខងារសាកថ្មពិសេសអ្វីទាំងអស់។ ត្រង់ចំណុចនេះ ក៏អាចនិយាយថា HTC U11 ឈ្នះទៀតហើយ។ ៤.កាមេរ៉ា: ទាក់ទងនឹងកាមេរ៉ាថតរូបសម្រាប់ត្រកូល iPhone នរណាក៏ល្បីនោះដែរ ដោយឆ្នាំទៅ 7 Plus បានប្រើប្រាស់នូវកាមេរ៉ាភ្លោះពីរគ្រាប់នៅខាងក្រោយទំហំ 12MP ភ្ជាប់មុខងារទប់លំនឹង OIS ហើយមាន Aperture f/1.8 បន្ថែមនឹងមុខងារ Optical Zoom 2x ។ សម្រាប់ HTU 11 មានកាមេរ៉ា 12MP និងមាន Aperture f/1.7 ហើយមុខងារទប់លំនឹងរូបភាព OIS គ្រាន់ថាការរចនា U11 ពុំមានកាមេរ៉ាភ្លោះនោះទេ។ ប៉ុន្តែតាមការឱ្យពិន្ទុនៃការតេស្តមើលផ្នែកកាមេរ៉ាពីក្រុម Dx0Mark ម៉ូដែល U11 ទទួលបានពិន្ទុ ៩០ យកឈ្នះលើ i7 Plus បានពិន្ទុ ៨៦ ដោយការថតរូបនៅទីងងឹត HTC ធ្វើបានល្អជាង។ សម្រាប់កាមេរ៉ាមុខ U11 អាចធ្វើបានល្អជាង ដោយ i7 Plus មានទំហំត្រឹម 7MP Aperture f/2.2 រីឯ HTC U11 មានដល់ទៅ 16MP ឯណោះ។ ត្រង់ចំណុចនេះបើនិយាយជារួម U11 ជាអ្នកឈ្នះ ក្នុងករណីពិសេសមួយចំនួនធំ ប៉ុន្តែ iPhone ក៏ធ្វើបានល្អត្រង់ការរចនាថ្មីនៃកាមេរ៉ាភ្លោះនិងប្រព័ន្ធ Software របស់វា។ ៥.ប្រព័ន្ធ Software: ត្រង់ចំណុចនេះ គឺសំខាន់ទៅលើចំណង់ចំណូលចិត្តរបស់មនុស្សម្នាក់ៗតើពួកគេចូលចិត្តប្រើប្រាស់ iOS ឫ Android? ជាទូទៅយើងច្រើននិយាយថា iOS ងាយស្រួលប្រើជាង Android ប៉ុន្តែបើលើកពីគុណសម្បត្តិនៃតម្រូវការប្រើប្រាស់គឺ Android ប្រសើរជាង។ យ៉ាងណាមិញយើងមិនអាចសន្និដ្ឋានពីការឈ្នះចាញ់បានទេ ប៉ុន្តែគ្រាន់លើកយកពីចំណុចពិសេសរបស់ U11 គឺត្រង់បច្ចេកវិទ្យាពិសេស Edge Sense ដោយនៅពេលអ្នកប្រើប្រាស់ច្របាច់គែមសងខាងនៃអេក្រង់ នោះអ្នកនឹងទទួលបាននូវការប្រើប្រាស់មុខងារមួយចំនួនដូចជាការថតរូប និងមុខងារផ្សេងទៀតទៅតាមប្រភេទកម្មវិធីនីមួយៗ។ ក្រៅពីនោះ U11 មានជំនួយការពិសេសដល់ទៅ ៣ រួមមាន Sense Companion, Google Assistant និង Amazon Alexa ។ សរុបមកចំណុចនេះ យើងចាត់ទុកថាស្មើគ្នាបាន។ ៦.ភាពធន់: U11 បានស្រោបនូវតួខ្លួនប្រភេទកញ្ចក់ រីឯ iPhone 7 Plus មានលោហធាតុដែក ដូច្នេះបើយើងសាកល្បងទម្លាក់ ស្មាតហ្វូនទាំង ២ នោះ U11 មិនអាចតតាំងនឹង iPhone បានឡើយ ។ ក្រៅពីនោះវាមានមុខងារការពារភាពជ្រាបទឹក ស្តង់ដារ IP67 ដូចគ្នា ដែលអាចត្រាំទឹកក្នុងជម្រៅកន្លះម៉ែត្រ រយៈពេល ៣០ នាទី។ សរុបមកចំណុចនៃភាពធន់ សូមនិយាយ iPhone 7 Plus ជាអ្នកឈ្នះ។ ៧.តម្លៃ: iPhone 7 Plus បង្ហាញខ្លួនឆ្នាំទៅ បច្ចុប្បន្នមានលក់នៅលើគេហទំព័រ Apple ផ្ទាល់តម្លៃ ៧៧០ ដុល្លារ រីឯ HTC U11 ការចេញលក់ក្នុងប្រទេសណាខ្លះនោះ គឺពុំទាន់ទទួលដំណឹងច្បាស់ជាក់លាក់នៅឡើយគ្រាន់ថាតម្លៃរបស់វាគឺ ៦៥០ ដុល្លារថោកជាង iPhone 7 Plus ខ្ទង់ ១ សន្លឹកដែរ។ ប៉ុន្តែត្រង់ចំណុចនេះ យើងកុំកាត់សេចក្ដីល្អជាង ម្ល៉ោះហើយដាក់ពិន្ទុថាស្មើគ្នា។
៨.ការសរុប: ជាទីបញ្ចប់ក្រោយការសង្ខេបប៉ុន្មានចំណុចខាងលើ បើនិយាយពីផ្នែកកាមេរ៉ា, ថាមពលថ្ម និងអេក្រង់ ម៉ូដែល U11 គឺធ្វើបានល្អជាង ប៉ុន្តែបើនិយាយពីចំណុចពិសេសនៃភាពធន់គឺ iPhone 7 Plus ជាអ្នកឈ្នះ គ្រាន់ថាត្រឹមចំណុចនេះមួយ វាពិតជាពិបាកប្រៀបធៀបបានទៅនឹង HTC ណាស់។ បន្ថែមពីនេះ ក៏ពុំមានន័យថាអ្នកគួរតែបោះបង់ចោល iPhone 7 Plus តែម្ដងនោះឡើយ អ្នកក៏គួរជ្រើសរើសវា បើអ្នកស្រលាញ់ស្មាតហ្វូនដែលមានការរចនាខ្ពស់និងមានប្រព័ន្ធ Software ដំណើរការបានលឿនរហ័ស (បញ្ជាក់: បើអាចគួររើសយក HTC U11 វាប្រសើរជាង ហើយចំណេញលុយបានជាង ១០០ ដុល្លារទុកទិញអ្វីផ្សេងផង៕