ឆាប់ៗនេះនឹងមានពិព័រណ៍ស្ថាបត្យកម្ម និងដេគ័រធំមួយ មានអ្នកជំនាញចូលរួមច្រើន

2017-05-22 10:12:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិព័រណ៍ពាណិជ្ជកម្មស្ដីពីស្ថាបត្យករនិងដេគ័រ គ្រោងនឹងធ្វើនៅកោះពេជ្រចាប់ពីថ្ងៃទី៨-១០ មិថុនា ខាងមុខនេះ នឹងមានវត្តមានអ្នកជំនាញ និងម៉ាកល្បីៗក្នុងនិងក្រៅស្រុកចំនួន ១៥០ រួមទាំងសិក្ខាសាលាស្ដីពីការអប់រំ ការប្រកួតការរចនារបស់និស្សិត និងការញ៉ាំអាហារពេលល្ងាចដើម្បីបង្កើតបណ្ដោញជាមួយស្ថាបត្យករផងដែរ។

លោក Ajinveat Vhongthong ប្រធានគម្រោងមកពី ICVeX និងជាអ្នករៀបចំកម្មវិធី មានប្រសាសន៍ថា៖ "យើងបង្កើតពិព័រណ៍នេះឡើង ដើម្បីជួយដល់អ្នកជំនាញនានាក្នុងការបង្កើតបណ្ដាញជាមួយអតិថិជន បង្កើតទំនាក់ទំនងថ្មី និងបង្កើនឱកាសថ្មីលើទីផ្សារ"។

លោកបន្ថែមថា៖ "វេទិកានេះអាចធ្វើឲ្យកម្ពុជាទទួលបានប្រយោជន៍ខ្ពស់ ព្រោះអ្នកតាំងពិព័រណ៍យើង ៧០% ជាអ្នកតាំងពិព័រណ៍អន្តរជាតិ ដែលតាំងបង្ហាញពីគំនិតឆ្នៃប្រឌិត និងផលិតផលល្អឥតខ្ចោះ"។

នេះឱកាសល្អសម្រាប់និស្សិតខ្មែរ ដោយព្រឹត្តិការណ៍នេះនឹងប្រមូលផ្ដុំអ្នកជំនាញល្បីៗក្នុងវិស័យទាំងនេះ ដូចជា លោក Tim Beaumont នាយកប្រតិបត្តិក្រុមហ៊ុន The Beaumont Partnership ដែលលោកនឹងចែករំលែកទស្សនៈពីគម្រោងនានាដែលលោកបង្កើតក្នុងតំបន់អាស៊ីអាគ្នេយ៍ និងលោក Adrianta Bin Aziz មកពីវិទ្យាស្ថានស្ថាបត្យកម្មម៉ាឡេស៊ី នឹងបកស្រាយពីសារៈសំខាន់ក្នុងការបន្តការអភិវឌ្ឍជំនាញ។

សមាគមស្ថាបត្យករកម្ពុជាក៏ឆ្លៀតឱកាសរៀបចំការប្រកួតផ្នែករចនារបស់ CSA ២០១៧ ដើម្បីប្រគល់រង្វាន់ដល់អ្នកមានគំនិតល្អបំផុតផ្នែកសិល្បៈ និងស្ថាបត្យកម្មនៅកម្ពុជាផងដែរ។ បេក្ខជនដែលជ្រើសរើសឲ្យទទួលរង្វាន់នឹងត្រូវបង្ហាញអំឡុងពេលតាំងពិព័រណ៍ ហើយកម្មវិធីប្រគល់រង្វាន់នឹងធ្វើឡើងនៅពេលញ៉ាំអាហារពេលល្ងាច។

សម្រាប់ព័ត៌មានបន្ថែម ចូលទៅវិបសាយ www.cambodiaarchitectdecor.com ៕