ចាន់ រតនា ហាត់៣សប្ដាហ៍ត្រៀមឡើងប្រកួតវិញក្រោយបាត់មុខ៣ឆ្នាំ

2017-05-23 01:06:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់គុនខ្មែរចាស់វស្សានិងជាជើងខ្លាំងក្បាច់គុនចម្រុះ ចាន់ រតនា ប្រាប់ថាមុនពេលឡើងសង្វៀនប៉ះជាមួយអ្នកប្រដាល់ឆ្លងដែនមកពីប្រទេសថៃថ្ងៃអាទិត្យចុងសប្ដាហ៍នេះ រូបគេបានហាត់ត្រៀមអស់រយៈពេល៣សប្ដាហ៍មកហើយ។

កីឡាករ ចាន់ រតនា

កីឡាករ ចាន់ រតនា បាននិយាយថា លោកឈប់ឡើងប្រកួតប្រដាល់ក្បាច់គុនបុរាណខ្មែរយូរណាស់ដែរហើយ តែនៅចុងខែឧសភាខាងមុខនេះ រូបគេនឹងវិលត្រលប់ចូលសង្វៀនវិញដើម្បីប្រជែងយកជ័យជម្នះលើកីឡាករថៃ។ ចំពោះការប្រកួតនេះដែរគេក៏មានការព្រួយបារម្ភខ្លះៗទៅកម្លាំងស៊ុហ្វ និងកាយសម្បទាស្ពឹកស្រពន់មិនរហ័សរហួនដូចមុន។

អ្នកប្រដាល់ដែលឧស្សាហ៍បង្ហាញមុខក្នុងកម្មវិធី One Championships រូបនេះបន្តទៀតថា បន្ទាប់ពីអ្នករៀបចំកម្មវិធីប្រកួតរបស់សង្វៀនបាយ័ប្រាប់ថាមានការប្រកួតនៅពេលខាងមុខ ជើងខ្លាំងម្នាក់នេះក៏ចាប់ផ្ដើមហាត់ត្រៀមវិញតែម្ដង។ បើគិតទៅការហ្វឹកហាត់ត្រៀមនេះបាន៣សប្ហាហ៍មកហើយ ចំពោះការហាត់នេះផ្ដោតទៅលើបច្ចេកទេសតិចនិកឲ្យមានភាពរហ័សរហួនឡើងវិញ និងមួយទៀតនោះផ្ដោតលើការហាត់យកកម្លាំងស៊ុហ្វតែម្ដងព្រោះខ្លាចមិនមានកម្លាំងគ្រប់គ្រាន់។

កីឡាករ ចាន់ រតនា

កីឡាករ ចាន់ រតនា បច្ចុប្បន្នជាគ្រូបង្វឹកប្រដាល់គុនខ្មែរនៅក្លឹបសិល្បៈ។ កីឡាកររូបនេះបាត់មុខពីសង្វៀនប្រដាល់សេរីប្រហែលជា៣ឆ្នាំមកហើយ ព្រោះជាប់កុងត្រាជាមួយកម្មវិធីលំដាប់ថ្នាក់អន្តរជាតិ One Championships។ រតនា នឹងត្រូវឡើងសង្វៀនបាយ័នស្ទឹងមានជ័យនៅថ្ងៃទី២៨ ខែឧសភា ឆ្នាំ២០១៧ខាងមុខនេះចាប់ពីម៉ោង៦ល្ងាចតទៅ៕

អត្ថបទ៖ នួន ស៊ីណា