ក្រោយជួបការខ្វះខាត ពេលនេះវិទ្យាល័យព្រះយុគន្ធរ ទទួលបានការឧបត្ថម្ភហើយ

2017-05-24 08:17:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីចូលរួមចំណែកដោយឥតឈប់ឈរដល់ការអភិវឌ្ឍសង្គម តាមរយៈការលើកកម្ពស់វិស័យអប់រំ បន្ថែមពីលើគម្រោងបណ្ណាល័យ ថ្ងៃនេះប្រាសាក់បានឧបត្ថម្ភ បង់ និងកៅអីថ្មដុសចំនួន ១០ ឈុត និងសម្ភារសិក្សាមួយចំនួនជូនដល់វិទ្យាល័យព្រះយុគន្ធរ ក្រោយជួបការខ្វះខាត។

លោក នង ប៊ុនហេង នាយកវិទ្យាល័យព្រះយុគន្ធរ បាននិយាយថា៖ "ខ្ញុំសូមសម្ដែងនូវសេចក្តីអំណរគុណយ៉ាងជ្រាលជ្រៅ ចំពោះប្រាសាក់ ដែលបានផ្តល់សម្ភារទាំងនេះដើម្បីឆ្លើយតបតាមតម្រូវការខ្វះខាតរបស់យើងខ្ញុំ។ យើងខ្ញុំសន្យាថា យើងនឹងប្រើប្រាស់សម្ភារទាំងនេះឲ្យអស់លទ្ធភាព និងថែរក្សាឲ្យបានយូរគង់អង្វែង "។

ថ្លែងនៅក្នុងពិធីនេះ លោក ស៊ូ វណ្ណថន នាយកប្រតិបត្តិគ្រប់គ្រងធនធានមនុស្សនៃគ្រឹះស្ថានមីក្រូហិរញ្ញវត្ថុប្រាសាក់ បានលើកឡើងពីការប្តេជ្ញាចិត្តរបស់ប្រាសាក់ក្នុងការសម្រេចគោលដៅផ្នែកសង្គមរបស់ខ្លួន។ លោកបានឲ្យដឹងថា៖ "ប្រាសាក់មានសេចក្តីរីករាយក្នុងការជួយលើកកម្ពស់វិស័យអប់រំនៅក្នុងប្រទេសកម្ពុជាយើង។ ពិធីប្រគល់បង់ កៅអីថ្មដុស និងសម្ភារសិក្សាមួយចំនួននៅថ្ងៃនេះ គឺបានឆ្លុះបញ្ចាំងពីទំនួលខុសត្រូវរបស់យើងចំពោះសង្គម"។

លោក ស៊ូ វណ្ណថន បានបន្ថែមទៀតថា៖ "ប្រាសាក់បានប្រើប្រាស់ប្រាក់ចំណេញមួយចំនួនជូនសហគមន៍ និងអតិថិជនតាមរយៈគម្រោងអភិវឌ្ឍសង្គមជាច្រើនដូចជា កម្មវិធីជំនួយសង្គ្រោះបន្ទាន់សម្រាប់អតិថិជនដែលទទួលរងគ្រោះថ្នាក់ ឬ ជួបគ្រោះមហន្តរាយធម្មជាតិ ឧបត្ថម្ភនិងបរិច្ចាគក្នុងកិច្ចការសង្គមនិងមនុស្សធម៌ផ្សេងៗ ជាពិសេសបានសាងសង់អគារបណ្ណាល័យ និងបំពាក់សម្ភារបណ្ណាល័យនៅតាមសាលាបឋមសិក្សា អនុវិទ្យាល័យ និងវិទ្យាល័យនានានៅតាមតំបន់ជនបទនៃប្រទេសកម្ពុជា។ ជាចុងបញ្ចប់ លោក វណ្ណថន បានផ្តល់ដំបូន្មានល្អៗដល់សិស្សានុសិស្សដែលកំពុងតែសិក្សានៅវិទ្យាល័យព្រះយុគន្ធរ ឲ្យខិតខំប្រឹងប្រែងរៀនសូត្រ និងអភិវឌ្ឍខ្លួនឲ្យមានសមត្ថភាពគ្រប់គ្រាន់ ដើម្បីសម្រេចក្តីបំណងដ៏ត្រចះត្រចង់នាពេលអនាគត៕