ក្រុមហ៊ុនម៉ូតូ Harley សង់រោងចក្រនៅប្រទេសថៃ
- 2017-05-27 04:01:03
- ចំនួនមតិ 0 | ចំនួនចែករំលែក 0
ក្រុមហ៊ុនម៉ូតូ Harley សង់រោងចក្រនៅប្រទេសថៃ
ចន្លោះមិនឃើញ
ក្រុមហ៊ុនផលិតម៉ូតូ Harley-Davidson កំពុងតែសាងសង់រោងចក្រដំឡើងម៉ូតូមួយកន្លែងនៅប្រទេសថៃ ដើម្បីផ្គត់ផ្គង់ការលក់នៅប្រទេសចិន និង ទីផ្សារក្នុងតំបន់អាស៊ីអាគ្នេយ៍។
ក្រុមហ៊ុនរំពឹងថានឹងចាប់ផ្ដើមការដំឡើងម៉ូតូនៅប្រទេសថៃជាលើកដំបូងនៅចុងឆ្នាំ ២០១៨។ រោងចក្រដែលគេសង់ឡើងនេះស្គាល់ថាជារោងចក្រដំឡើង ដែលគេនឹងដំឡើងម៉ូតូដោយប្រើគ្រឿងបន្លាស់ដឹកមកពីសហរដ្ឋអាមេរិក។
កន្លងទៅម៉ូតូ Harley ភាគច្រើនគឺនាំចេញពីអាមេរិកផ្ទាល់ ហើយទីផ្សារមួយចំនួនមានកំណត់អត្រាពន្ធនាំចេញ/នាំចូលខ្ពស់ ហេតុនេះធ្វើឲ្យតម្លៃម៉ូតូ Harley ឡើងខ្ពស់ទៅតាមហ្នឹងដែរ ដែលអតិថិជនមួយចំនួនមិនអាចឈោងចាប់បាន។ ដោយឡែកប្រទេសថៃមានអត្រាពន្ធ ៦០% លើការនាំចូលម៉ូតូ ប៉ុន្តែពន្ធនេះនឹងលែងមានសម្រាប់ម៉ូតូ Harley ដែលដំឡើងនៅប្រទេសថៃផ្ទាល់ ដូចនេះតម្លៃម៉ូតូអាចនឹងធូរថ្លៃសម្រាប់ទីផ្សារប្រទេសថៃ។
គួរបញ្ជាក់ថាក្រុមហ៊ុន Harley-Davidson មានរោងចក្រផលិតម៉ូតូចំនួន ៥ ក្នុងរដ្ឋចំនួន ៣ រួមមានរដ្ឋ Wisconsin, រដ្ឋ Missouri និង រដ្ឋ Pennsylvania។ ចំណែករោងចក្រដំឡើងមានចំនួនពីរដែលមានទីតាំងនៅប្រទេសឥណ្ឌា និង ប្រេស៊ីល ដែលរោងចក្រទាំងពីរសុទ្ធតែពឹងផ្អែកលើគ្រឿងបន្លាស់ដែលនាំចូលពីសហរដ្ឋអាមេរិកផ្ទាល់ដូចគ្នា៕
ចុចអាន៖
មើលការវិវត្តរថយន្ត Porsche 911 ពីគ្រឿងទីមួយ ដល់ទីមួយលាន
MSI នឹងបញ្ចេញបច្ចេកវិទ្យាថ្មីក្នុងព្រឹត្តិការណ៍ដ៏ធំមួយនៅតៃវ៉ាន់
អនាគតអ្នកបើកឡានដឹកទំនិញនឹងដាច់អាជីព បើបច្ចេកវិទ្យាវិវត្តដល់ដំណាក់កាលចុងក្រោយ