៤ ចំណុចនេះហើយ ទើបពិភពលោកទាំងមូលឱ្យងារកម្ពុជា ជាព្រះរាជាណាចក្រអច្ឆរិយ

2017-05-28 02:48:54
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមរយៈទំព័រហ្វេសប៊ុកផ្លូវការរបស់ ក្រសួងទេសចរណ៍បានឱ្យដឹងថា កាលពីខែឧសភា ឆ្នាំ២០១៦កន្លងមក លោក Anton Caragea ប្រធានក្រុមប្រឹក្សាទេសចរណ៍ និងពាណិជ្ជកម្មអឺរ៉ុប (European Council on Tourism and Trade) និងលោក Mircea Constantinescu ប្រធានបណ្ឌិតសភាទេសចរណ៍អឺរ៉ុប (European Tourism Academy) បានធ្វើដំណើរផ្ទាល់មកកម្ពុជាមកប្រកាសកម្ពុជាជាគោលដៅទេសចរណ៍ល្អបំផុតលើពិភពលោកសម្រាប់ឆ្នាំ២០១៦ (2016 World Best Destination) និងជាគោលដៅទេសចរណ៍វប្បធម៌ដ៏ពេញនិយម (Favorite Cultural Destination Distinction 2016) ដោយចាត់ទុកព្រះរាជាណាចក្រកម្ពុជា ជាព្រះរាជាណាចក្រអច្ឆរិយលើ៤ចំណុចគឺ៖

១.អច្ឆរិយភាពខាងវប្បធម៌ ជាពិសេសប្រាសាទអង្គរវត្ត ដែលជាស្នាដៃរបស់មនុស្សខ្មែរតំណាងឲ្យមនុស្សជាតិទាំងមូល និងអច្ឆរិយភាពខាងធម្មជាតិ។

២. បឹងទន្លេសាបដ៏ធំនៅអាស៊ីដែលមានទឹកហូរត្រលប់ ដែលគ្មានពីរលើពិភពលោក។

៣. ភាពពិសេសរបស់ព្រះពុទ្ធសាសនានៅកម្ពុជា ដែលមិនត្រឹមតែអប់រំមនុស្សឲ្យក្លាយជាពុទ្ធសាសនិកប៉ុណ្ណោះទេ តែថែមអប់រំមនុស្សទូទៅឲ្យធ្វើតែអំពើល្អ។

៤.ភាពញញឹមរួសរាយរាក់ទាក់របស់ប្រជាជនកម្ពុជា ដែលលោក Anton Caragea បានគូសបញ្ជាក់ថា បើចង់ឃើញភាពញញឹមរួសរាយរាក់ទាក់ពិតប្រាកដរបស់មនុស្សគឺត្រូវមកកម្ពុជា។

គួរបញ្ជាក់ថា កាលពីថ្មីៗ កន្លងទៅ នេះក្រោយការចូលរួមបោះឆ្នោតពីភ្ញៀវទេសចររាប់លាននាក់ជុំវិញពិភពលោក គេហទំព័រដ៏ល្បីល្បាញ TripAdvisor បានផ្តល់ចំណាត់ថ្នាក់លេខ១ដល់ប្រាសាទអង្គរវត្តរបស់កម្ពុជា ជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតរបស់ពិភពលោកសម្រាប់ឆ្នាំ២០១៧នេះ។ នេះជាមោទនភាពមួយរបស់ជាតិខ្មែរយើងទាំងមូល ដែលអង្គរវត្តរបស់កម្ពុជាទទួលបានការគាំទ្រពីបណ្តាប្រជាជនជុំវិញពិភពលោក៕