ផាន់ វិទ្យា៖ ទាំងក្មេង ទាំងសង្ហា បញ្ចប់ការសិក្សានៅសាលាយោធាដ៏ល្បីរបស់អាមេរិក
- 2017-05-30 06:08:13
- ចំនួនមតិ 0 | ចំនួនចែករំលែក 0
ផាន់ វិទ្យា៖ ទាំងក្មេង ទាំងសង្ហា បញ្ចប់ការសិក្សានៅសាលាយោធាដ៏ល្បីរបស់អាមេរិក
ចន្លោះមិនឃើញ
ជាមោទនភាពថ្មីមួយទៀតសម្រាប់ប្រទេសកម្ពុជា ដែលយុវជនវ័យក្មេងរបស់កម្ពុជាមួយរូបទៀតគឺលោក ផាន់ វិទ្យាទើបតែបញ្ចប់ការសិក្សា និង ទទួលបានសញ្ញាប័ត្រផ្នែកវិទ្យាសាស្ត្រនយោបាយពីសាលាយោធាដ៏ល្បីរបស់សហរដ្ឋអាមេរិក The United States Naval Academy ក្រោយពីសិក្សាអស់រយៈពេល ៤ ឆ្នាំមក។
ក្នុងបទសម្ភាសន៍ជាមួយនឹងក្រុមការងារ Sabay យុវជនវ័យ២៣ ឆ្នាំរូបនេះបានថ្លែងថា តាំងពីតូចមក លោកស្រលាញ់វិស័យយោធា និង ចង់បម្រើដល់ប្រទេសជាតិយ៉ាងខ្លាំង។ ម្ល៉ោះហើយ លោកបានចូលទៅសិក្សានៅសកលវិទ្យាល័យការពារជាតិរបស់ប្រទេសកម្ពុជា និង បានបម្រើការងារនៅកងកម្លាំងពិសេសប្រឆាំងភេរវកម្មចំនួន២ឆ្នាំ។ ក្រោយមក លោកក៏បានដាក់ពាក្យស្នើសុំអាហារូបករណ៍ទៅរៀននៅឯសាលាយោធារបស់អាមេរិកតែម្ដង តាមរយៈស្ថានទូតអាមេរិកដែលបានផ្ដល់អោយ។
យុវជនដែលមានស្រុកកំណើតនៅទីក្រុងភ្នំពេញរូបនេះ បានបន្ថែមទៀតថា តាមរយៈការខំប្រឹងប្រែងក្នុងការប្រកួតប្រជែង ទីបំផុត លោកក៏បានជាប់អាហារូបករណ៍ទៅរៀននៅអាមេរិកក្នុងឆ្នាំ ២០១៣ ហើយចំណាយរយៈពេល៤ឆ្នាំ ដើម្បីសិក្សានៅទីនោះ។ ពាក់កណ្ដាលឆ្នាំ ២០១៧នេះ លោកក៏បានបញ្ចប់ការសិក្សាដោយទទួលបានបរិញ្ញាបត្រផ្នែកវិទ្យាសាស្ត្រនយោបាយ (Bachelor of Science Major in Political Science ) ដោយក្ដីរំភើបក្រៃលែង។
វីទ្យាបានបន្តថា នៅទីនោះក៏មាននិស្សិតកម្ពុជាចំនួន២រូបទៀតផងដែរ ដែលកំពុងសិក្សា ចំណែកលោកបានបញ្ចប់ការសិក្សារួចរាល់មុន និង ទើបបានត្រឡប់មកដល់ប្រទេសកម្ពុជាក្នុងពេលថ្មីៗនេះឯង។ ចំពោះការសិក្សានៅទីនោះវិញ លោកបានប្រាប់អោយដឹងថាមានភាពតឹងតែង ម៉ត់ចត់ និង មានវិន័យខ្ពស់មិនថាទាំងការសិក្សា ឬ ការហ្វឹកហាត់នោះទេ។ ដូចនេះវាតម្រូវអោយសិស្សមានភាពរឹងមាំ ឆ្លាតវ័យ មានភាពតស៊ូ និង គោរពបទបញ្ជាអោយបានខ្ជាប់ខ្ជួន ព្រោះទីនោះគឺជាសាលាយោធាមួយដ៏ល្បីរបស់អាមេរិក និង ក្នុងពិភពលោកទៀតផង។
គួរបញ្ជាក់ផងដែរថាកន្លងមក ក៏មាននិស្សិតកម្ពុជាមួយចំនួនផងដែរដែលបានបញ្ចប់ការសិក្សាពីសាលាយោធាល្បីៗនៅក្រៅប្រទេស តួយ៉ាងដូចជា ឯក ឧត្តម ហ៊ុន ម៉ាណែត បុត្រារបស់សម្ដេចតេជោហ៊ុនសែនជាដើមដែលបានបញ្ចប់ការសិក្សានៅសាលាដ៏ល្បី Military Academy at West Point របស់សហរដ្ឋអាមេរិក។