នេះឃ្លីបបង្ហាញការពិតថា ក្រុងពាលីភាពយន្តខ្មែរយើងមួយ មិនមែនធ្វើឲ្យតែរួចៗទេ

2017-06-02 03:01:03
ចំនួនមតិ 0 | ចំនួនចែករំលែក 0

ចន្លោះមិនឃើញ

រាល់ពេលមុនចេញ សកម្មភាពថតរឿង ផលិតកម្មនីមួយៗរមែងធ្វើពិធីក្រុងពាលីតាមទំនៀមដើម្បីសុំសេចក្ដីសុខសប្បាយដល់ក្រុមការងារទាំងអស់ ដែលពិធីទាំងនោះ ច្រើនធ្វើត្រឹមពិធីក្រុងពាលីមួយ លើកលែងតែភាពយន្តមួយមានចំណងជើងថា "អាគមស្បែកដាច" បានបញ្ចូលនូវពិធីប្រពៃណីជាច្រើនទៀត កម្រនឹងបានឃើញ។

១.ដំបូងឡើយភាពយន្ត "អាគមស្បែកដាច" របស់ផលិតកម្មទេពនិករ បានចាប់ផ្ដើមក្រុងពាលីតាមទំនៀម ដើម្បីសុំសេចក្ដីសុខដល់ក្រុមផលិតដែលខាងផលិតកម្ម និងតួសម្ដែង។ ពិធីនេះ ក៏គេឃើញមានក្នុងកម្មវិធីបើកការដ្ឋានសាងសង់អ្វីមួយដែរ ដើម្បីសុំឲ្យដំណើរការសាងសង់ ឬផលិតប្រព្រឹត្តបានរលូន ចៀសផុតពីរឿងមិនល្អទាំងឡាយ។

ចំណុចគួរចាប់អារម្មណ៍ក្នុងពិធីកាលពីទី១២ ឧសភា នោះ គឺលោកអាចារ្យ តេង ចន្ធី បានចាប់ផ្ដើមការងាររបស់ខ្លួនដោយការឧទ្ទិសអញ្ជើញបារមីទាំងឡាយឲ្យមកស្ថិត ក៏ជាគាំទ្រពិធី ជាមួយការបញ្ចេញសំឡេងខ្លាំងៗ រំពងពិធី កម្រនឹងឃើញ។

២.កម្មវិធីទី២ដែលគេឃើញក្នុងថ្ងៃរឿងខ្មែរខាងលើនេះដែរ គឺពិធី "បើកញាណ"។ តាមពិធីអ្នកគ្រូ វណ្ណថា មហាតេជះ ដែលជាអ្នកចេះដឹងផ្នែកទំនៀមទម្លាប់មួយរូប ព្រមជាអ្នករៀបចំកម្មវិធីមួយនេះផង បានឲ្យដឹងថា ពិធីនេះ គឺដើម្បីបើកញាណ បើកព្រះនេត្រឲ្យរូបបដិមា "ជ័យវរ្ម័នទី៧" និងអញ្ជើញបារមីព្រះអង្គឲ្យមកសណ្ឋិតក្នុងបដិមាតំណាងព្រះអង្គ តាមរបៀបសាសនា។

៣. កម្មវិធីនេះ ក៏កម្រនឹងឃើញមានក្នុងពិធីក្រុងពាលីភាពយន្តក្នុងស្រុកដែរ គឺពិធីគោរពភ្លេងជាតិ។ កម្មវិធីនេះ គេឃើញមានសិល្បករ ក្រុមការងារផលិតទាំងអស់ស្មិងស្មាធិ៍គោរពផ្សេងជាតិយ៉ាងខ្ជាប់ខ្ជួន។

៤.ក្រៅពីកម្មវិធីខាងលើ នៅមានកម្មវិធីរាំរបាំជូនពរទៀត ក៏ត្រូវបានរៀបចំឡើងយ៉ាងកម្រក្នុងកម្មវិធីដូចគ្នានេះដែរ។

ពិធីទាំងអស់ គឺសុទ្ធជាទំនៀមរបស់ខ្មែរ ដូចដែលលោក លឹម សាខន អ្នកដឹកនាំរឿង "អាគមស្បែកដាច" ប្រាប់ថា លោកចង់គាស់រំលើង ក៏ដូចជាចូលរួមអភិរក្សអ្វីដែលជារបស់ខ្មែរ តាមរយៈការបញ្ជ្រាបឲ្យប្រជាពលរដ្ឋខ្មែរបានដឹង និងស្គាល់នូវសម្បត្តិវប្បធម៌ខ្មែរ។ លោក បន្តថា នោះក៏ជាមូលហេតុដែលផលិតកម្មនៃរឿងខាងលើសម្រេចយកឈ្មោះ "ទេពនិករ" ធ្វើជាពាណិជ្ជនាមដែរ។

លោក ថ្លែងថា “ទេពនិករ គឺជាអាទិទេព តំណាងឲ្យភាពអច្ឆរិយ អីចឹងបានយើងយករូបនេះធ្វើជាតំណាង ពេលដែលយើងចេញទៅ គឺតំណាងឲ្យខ្មែរយើងតែម្ដង"៕

*មិនមែនលំៗទេ...!

*អត្ថបទច្រើនទៀតពីភាពយន្តខ្មែរយើង

*ទស្សនា Trailer ខ្មែរយើងច្រើនទៀត

អត្ថបទ៖ ទារិកា