មិនស្ដាប់ការណែនាំ សាក់រួចងូតទឹក ត្រូវមេរោគស៊ីសាច់ដល់ស្លាប់
- 2017-06-05 04:40:22
- ចំនួនមតិ 0 | ចំនួនចែករំលែក 0
មិនស្ដាប់ការណែនាំ សាក់រួចងូតទឹក ត្រូវមេរោគស៊ីសាច់ដល់ស្លាប់
ចន្លោះមិនឃើញ
បុរសមកពីរដ្ឋតិចសាស់ សហរដ្ឋអាមេរិក បានបាត់បង់ជីវិត បន្ទាប់ពីដំបៅក្លាយក្រោយចាក់សាក់រួចថ្មីៗទៅហែលទឹកសមុទ្រ។
បុរសរូបនេះមានអាយុ ៣១ឆ្នាំ មិនអើពើនឹងការណែនាំរបស់អ្នកចាក់សាក់ដោយប្រាប់ថា អំឡុងពេល ២សប្ដាហ៍បន្ទាប់ពីចាក់សាក់ មិនត្រូវហែលទឹកសមុទ្រ ឬទឹកអាងឡើយ តែបុរសរងគ្រោះមិនធ្វើតាម។
បើតាមប្រភព បុរសខាងលើបានទៅសាក់នៅហាងមួយកន្លែង លើកំភួនជើងម្ខាងជារូបដៃសំពះ ឈឺឆ្កាង និងពាក្យថា "Jesus is my life” រួចបានទៅហែលទឹកនៅឈូងសមុទ្រម៉ិកស៊ីកូ កាលទើបសាក់បាន ៥ថ្ងៃ។
អ្នកចាក់សាក់ តែងតែណែនាំអតិថិជនឲ្យជៀសវាងការស្រក់ទឹកខ្មៅលើមុខរបួសសាក់ថ្មីៗ ហែលទឹក ត្រូវកម្ដៅព្រះអាទិត្យខ្លាំង ព្រោះអាចឆ្លងមេរោគកាចសាហាវ។ គ្រូពេទ្យរបស់អ្នកជំងឺដដែលរៀបរាប់ថា បាក់តេរីបានឆ្លងត្រង់មុខរបួសសាក់ រួចបង្កជាដំបៅក្លាយចេញពណ៌ខ្មៅជាំ គួបផ្សំនឹងជនរងគ្រោះកើតជំងឺថ្លើមរ៉ាំរ៉ៃស្រាប់។
បន្ទាប់ពីធ្វើកោសល្យវិច័យគ្រូពេទ្យ រកឃើញបាក់តេរី Vibrio vulnificus រួចបំលែងជាមេរោគឆ្លង vibriosis ដែលមានប្រភពចេញពីឆ្នេរសមុទ្រពិតប្រាកដមែន។ ជាការពញ្ញាក់ស្មារតី បងប្អូនដែលចូលចិត្តសាក់ ត្រូវស្ដាប់តាមការណែនាំរបស់អ្នកជំនាញ ជៀសវាងជួបគ្រោះថ្នាក់ដូចខាងលើ៕