ទៀតហើយៗ! កូរ៉េខាងជើង បាញ់មីស៊ីលប្រភេទថ្មីច្រើនគ្រាប់ នៅព្រឹកនេះ
- 2017-06-08 00:48:38
- ចំនួនមតិ 0 | ចំនួនចែករំលែក 0
ទៀតហើយៗ! កូរ៉េខាងជើង បាញ់មីស៊ីលប្រភេទថ្មីច្រើនគ្រាប់ នៅព្រឹកនេះ
ចន្លោះមិនឃើញ
កូរ៉េខាងជើង បានបាញ់មីស៊ីលជាច្រើនគ្រាប់ ដែលហាក់បីដូចជាគ្រាប់មីស៊ីលប្រភេទ land-to-ship ចេញពីឆ្នេរសមុទ្រភាគខាងកើត នៅព្រឹកថ្ងៃព្រហស្បតិ៍ ទី០៨ នេះ។ នេះបើតាមការឲ្យដឹងពី មន្ត្រីយោធារបស់ប្រទេសកូរ៉េខាងត្បូង។
ជាមួយគ្នានេះដែរ បើតាមការឲ្យដឹងពី មន្ត្រីការពារជាតិអាមេរិកម្នាក់ ប្រាប់ទៅកាន់សារព័ត៌មាន CNN បានឲ្យដឹងថា គ្រាប់មីស៊ីលសរុបចំនួន ៤ គ្រាប់ បានបាញ់ចេញពីឆ្នេរសមុទ្រ នៃទីក្រុង Wonsan ខេត្ត Gangwon ប្រទេសកូរ៉េខាងជើង។ គ្រាប់មីស៊ីលទាំងនោះ ហោះបានចម្ងាយប្រមាណជា ២០០ គីឡូម៉ែត្រ។
គួរឲ្យដឹងថា ទីក្រុង Wonsan មានចម្ងាយប្រមាណជា ១៨០ គីឡូម៉ែត្រប៉ុណ្ណោះ ពីទីក្រុងសេអ៊ូល ប្រទេសកូរ៉េខាងត្បូង។
ទោះបីជាយ៉ាងណាក៏ដោយ មន្ត្រីអាមេរិក បាននិយាយថា គ្រាប់មីស៊ីលទាំងនោះមិនមានសមត្ថភាព អាចបង្កគ្រោះថ្នាក់នៅរយៈចម្ងាយឆ្ងាយបានឡើយ។
គួរបញ្ជាក់ថា ការបាញ់មីស៊ីលប្រភេទថ្មីច្រើនគ្រាប់នៅព្រឹកនេះ គឺជាការសាកល្បងគ្រាប់មីស៊ីល លើកទី ៤ ហើយរបស់កូរ៉េខាងជើង ចាប់តាំងពី លោក ម៊ូន ជេអ៊ីន (Moon Jae-In) ប្រធានាធិបតីកូរ៉េខាងត្បូងថ្មី ចូលកាន់តំណែង កាលពីថ្ងៃទី១០ ខែឧសភា កន្លងទៅនេះ។
មិនតែប៉ុណ្ណោះ ការបាញ់សាកល្បងគ្រាប់មីស៊ីលចុងក្រោយបង្អស់នេះ បានធ្វើឡើង ត្រឹមរយៈពេលមិនដល់ ១ សប្ដាហ៍ផង បន្ទាប់ពីក្រុមប្រឹក្សាសន្តិសុខនៃអង្គការសហប្រជាជាតិ បានអនុម័តដាក់ទណ្ឌកម្មថ្មី ទៅលើកូរ៉េខាងជើង ក្រោយពេលប្រទេសមួយនេះ បាននិយាយថា នឹងបន្តកម្មវិធីនុយក្លេអ៊ែរ និងអាវុធរបស់ខ្លួន ដោយមិនពន្យារពេលឡើយ។
ក្រុមប្រឹក្សាសន្តិសុខនៃអង្គការសហប្រជាជាតិ បានដាក់ទណ្ឌកម្មបន្ថែមលើកូរ៉េខាងជើង ដោយហាមឃាត់ការធ្វើដំណើរ និង រឹបអូសយកទ្រព្យសម្បត្តិ ពីមន្ត្រីជាន់ខ្ពស់កូរ៉េខាងជើង រួមទាំងស្ថាប័នរដ្ឋណា ដែលចូលរួមជាមួយកម្មវិធីអាវុធនុយក្លេអ៊ែរនោះ៕