គីម ជុងណាម ស្ពាយប្រាក់រាប់ម៉ឺនដុល្លារ ពេលត្រូវគេលួចធ្វើឃាត
- 2017-06-12 06:13:58
- ចំនួនមតិ 0 | ចំនួនចែករំលែក 0
គីម ជុងណាម ស្ពាយប្រាក់រាប់ម៉ឺនដុល្លារ ពេលត្រូវគេលួចធ្វើឃាត
ចន្លោះមិនឃើញ
គីម ជុងណាម ជាបងប្រុសម្ដាយទីទៃរបស់មេដឹកនាំកូរ៉េខាងជើង គីម ជុងអ៊ុន ត្រូវគេរាយការណ៍ថា បានស្ពាយប្រាក់ ១២ម៉ឺនដុល្លារ អំឡុងពេលគេលួចធ្វើឃាតនៅព្រលានយន្តហោះ ប្រទេសម៉ាឡេស៊ី កាលពីខែកុម្ភៈកន្លងទៅ។ នេះបើតាមការចុះផ្សាយរបស់សារព័ត៌មានជប៉ុន Asahi ស្រង់សម្ដីពីអាជ្ញាធរម៉ាឡេស៊ី សុំមិនបញ្ជាក់អត្តសញ្ញាណម្នាក់ដែលស្និតនឹងការស៊ើបអង្កេត។
ប្រភពដដែលផ្សាយថា គីម ជុងណាម បានជួបជាមួយបុរសជនជាតិអាមេរិកម្នាក់ ដែលទំនងជាជាប់ពាក់ព័ន្ធនឹងភ្នាក់ងារស៊ើបអង្កេតអាមេរិក រយៈពេល ៤ថ្ងៃ មុនពេលស្លាប់។
គីម ជុងណាម ត្រូវគេជឿថា បានជួបជនជាតិអាមេរិកខាងលើ លើកចុងក្រោយរយៈពេល ២ម៉ោង នៅសណ្ឋាគារមួយ ក្នុងប្រទេសម៉ាឡេស៊ី និងទទួលប្រាក់ ១២ម៉ឺនដុល្លារ។ Asahi បន្តថា អាជ្ញាធរម៉ាឡេស៊ី ជឿថា គីម ជុងណាម ប្រហែលជាត្រូវគេផ្ដល់ឲ្យថ្លៃព័ត៌មានណាមួយ ព្រោះគេមិនឃើញមានធនាគារក្នុងប្រទេសណាដកចំនួនដ៏ច្រើនបែបនេះទេ។
ការស៊ើបអង្កេតអះអាងថា គេឃើញក្រដាសប្រាក់ភាគច្រើន ១០០ដុល្លារ និង ៤ដុំធំៗ ព្រមទាំងមាន កុុំព្យុរទ័រយួរដៃមួយគ្រឿង និងទូរសព្ទ ២គ្រឿង។
កូនប្រុសច្បងរបស់អតីតមេដឹកនាំ គីម ជុង អ៊ីល ត្រូវបាននារី ២នាក់ មានជនជាតិវៀតណាមម្នាក់ និងជនជាតិឥណ្ឌូណេស៊ីម្នាក់ លួចធ្វើឃាតដោយដាក់ថ្នាំគីមីគ្របមុខប្រភេទ VX នៅថ្ងៃទី ១៣កុម្ភៈ ឆ្នាំ ២០១៧ រួចបានស្លាប់ពេលបញ្ជូនទៅមន្ទីរពេទ្យ។ រដ្ឋាភិបាលកូរ៉េខាងត្បូងបានចោទលោក គីម ជុងអ៊ុន ស្ថិតនៅពីក្រោយការធ្វើឃាតនេះ៕