សម្ដីគ្រូកម្ពុជា និងគ្រូអាហ្វហ្គានីស្ថាន មុនប៉ះគ្នាល្ងាចនេះ
- 2017-06-13 02:08:27
- ចំនួនមតិ 0 | ចំនួនចែករំលែក 0
សម្ដីគ្រូកម្ពុជា និងគ្រូអាហ្វហ្គានីស្ថាន មុនប៉ះគ្នាល្ងាចនេះ
ចន្លោះមិនឃើញ
លោក Leonardo Vitorino គ្រូបង្វឹកកម្ពុជា និងលោក Otto Martin Pfister គ្រូបង្វឹកអាហ្វហ្គានីស្ថានបង្ហាញទស្សនៈរៀងៗខ្លួនក្នុងការត្រៀមជួបគ្នាវេលាម៉ោង ៦:៣០ នាទីល្ងាចនេះនៅពហុកីឡដ្ឋានជាតិ សម្រាប់ការប្រកួតជម្រុះលើកទី២ ក្នុងពូល C នៃពានរង្វាន់ AFC Asian Cup 2019។
លោក Leonardo បាននិយាយក្នុងសន្និសីទកាសែតកាលពីម្សិលមិញថា ក្រុមភ្ញៀវមានកីឡាករល្អៗ ពិសេសពួកគេលេងនៅក្រៅប្រទេសច្រើននាក់។ ជាការពិតជំនួបនេះគឺជាប្រកួតដ៏ពិបាកមួយសម្រាប់កម្ពុជា បើទោះដៃគូមានកម្រិតសមត្ថភាពមិនលើកកម្ពុជាច្រើនក៏ដោយ។
លោកបន្ថែមថា ទោះជាយ៉ាងណាម្ចាស់ផ្ទះបានត្រៀមខ្លួនយ៉ាងល្អ ដែលធ្វើឲ្យកីឡាករគ្រប់រូបមានជំនឿចិត្តអាចធ្វើបានល្អ។ លោកជឿថា ប្រសិនបើកូនក្រុមទាំងអស់ប្រឹងប្រែងក្នុងការប្រកួតឲ្យបាន ១០០% នោះនឹងអាចទទួលបានលទ្ធផលជាក់ជាមិនខាន។
ងាកទៅលោក Otto Martin Pfister បានលើកឡើងដែរថា កម្ពុជាមានភាពរីកចំរើនច្រើន ដែលធ្វើឲ្យក្រុមរបស់លោកមិនអាចមើលស្រាលបានឡើយ។ លោកគិតថា ជំនួបនេះនឹងអាចធ្វើឲ្យអ្នកគាំទ្រជក់ចិត្តជាមួយការប្រកួត ដោយសារក្រុមទាំងពីរមានកម្រិតប្រហាក់ប្រហែលគ្នា។
គ្រូបង្វឹកអាហ្វហ្គានីស្ថានរូបនេះបន្ថែមថា ក្រោយតាមដានការប្រកួតរបស់កម្ពុជាកន្លងមក ធ្វើឲ្យលោកគិតថាក្ដីរំពឹងឈ្នះម្ចាស់ផ្ទះមិនមានច្រើនទេត្រឹម ៥០%ប៉ុណ្ណោះ។ ចំពោះតិចនិកលេងរបស់គ្រូបង្វឹកគ្មានគ្រូណាល្អជាងគ្រូណាទេ បើធៀបរវាងរូបលោក និងគ្រូបង្វឹកកម្ពុជា។
ពានរង្វាន់នេះកម្ពុជាបានប្រកួតសន្សំពិន្ទុ១លើករួចហើយដោយចាញ់ហ្សកដានី ៧-០ ខណៈក្រុមអាហ្វហ្គានីស្ថានឆ្លងកាត់មួយប្រកួតដូចគ្នាពួកគេធ្វើបានត្រឹមស្មើ វៀតណាម ១-១ នៅទឹកដីអាហ្វហ្គានីស្ថាន៕