សេង ពិសិដ្ឋ៖ ឱ្យកូនរៀនសាលាថ្លៃ មិនមែនជាការផ្ដល់ភាពកក់ក្ដៅដល់កូនទេ
- 2017-06-13 07:05:57
- ចំនួនមតិ 0 | ចំនួនចែករំលែក 0
សេង ពិសិដ្ឋ៖ ឱ្យកូនរៀនសាលាថ្លៃ មិនមែនជាការផ្ដល់ភាពកក់ក្ដៅដល់កូនទេ
ចន្លោះមិនឃើញ
នៅក្នុងសន្និសីទសារព័ត៌មានជុំវិញ ការរៀបចំពិព័រណ៍កុមារ និងគ្រួសារលើកទី៤ នេះ លោក សេង ពិសិដ្ឋ នាយកប្រតិបត្តិក្រុមហ៊ុនអនុស្សារៀបចំពិព័រណ៍ បាននិយាយយ៉ាងដូច្នេះថា៖ "តាមពិតទៅការបញ្ជូនកូនឱ្យទៅរៀនសាលាថ្លៃ មិនមែនជាផ្ដល់ភាពកក់ក្ដៅឱ្យកូន ដូចដែលឪពុកម្ដាយមួយចំនួនយល់ឃើញនោះទេ។ ប៉ុន្តែការចំណាយពេលវេលាជាមួយកូន បង្កើតឱ្យមានភាពស្និទ្ធស្នាលជាមួយកូន ទើបជាការផ្ដល់ភាពកក់ក្ដៅ និងសុភមង្គលដ៏ពិតប្រាកដឱ្យកូន។"
នាយកប្រតិបត្តិវ័យក្មេងរូបសង្ហារនេះ បន្តទៀតថា ឪពុកម្ដាយភាគច្រើនរវល់ជាមួយនឹងការរកស៊ី ធ្វើការខ្លាំងពេក រហូតដល់ថ្នាក់គ្មានពេលវេលាឱ្យកូនទាល់តែសោះ ហើយកូនក៏ខ្វះភាពកក់ក្ដៅ ការថែទាំពីឪពុកម្ដាយ។ លោកលើកទៀតថា ការផ្ដល់ពេលវេលាខ្លះឱ្យកូនដូចជាការនិទានរឿងឱ្យកូនស្ដាប់ បណ្ដុះកូនឱ្យមានទម្លាប់អានសៀវភៅ ជាដើម។ ទាំងនេះហើយជាអ្វីដែលឪពុកម្ដាយគ្រប់រូបគួរពិចារណា។
ដោយមានការយល់ឃើញបែបនេះហើយ ទើបក្រុមហ៊ុនរបស់លោកបានបង្កើតនូវកម្មវិធីពិព័រណ៍កុមារ និងគ្រួសារនេះឡើង គឺដើម្បីឱ្យកូនៗ និងឪពុកម្ដាយបានជុំគ្នា មានភាពស្និទ្ធស្នាលនឹងគ្នា មានឱកាសបង្កើតអនុស្សាវរីយ៍ល្អៗជាមួយកូន។ បើតាមការឱ្យដឹងពីលោក សេង ពិសិដ្ឋ ពិព័រណ៍កុមារ និងគ្រួសារលើកទី ៤នេះ មានកម្មវិធីជាច្រើនគួរឱ្យចាប់អារម្មណ៍ និងខុសប្លែកពីបណ្ដាឆ្នាំមុន ក្នុងនោះរួមមាន៖ ការប្រឡងក្រងសក់របស់ប្អូនៗកុមារី ការប្រកួតវារម៉ារ៉ាតុងចំពោះក្មេងតូចៗមិនទាន់ចេះដើរ ការប្រកួតផ្នែកអក្សរសាស្ត្រមានជាការសូត្រកំណាព្យ និទានរឿង ប្រកួតសូត្រមេលេខ និងកម្មវិធីកម្សាន្តជាច្រើនទៀត មានច្រៀង រាំ បង្ហាញម៉ូតជាដើម។
តាមការបញ្ជាក់របស់នាយកប្រតិបត្តិក្រុមហ៊ុនអនុស្សារៀបចំពិព័រណ៍ បានឱ្យដឹងទៀតថា នៅក្នុងកម្មវិធីក៏មានការចូលរួមពីបណ្ដាក្រុមហ៊ុនជាច្រើន រហូតដល់ជិត ២០០ក្រុមហ៊ុន ព្រមជាមួយនឹងការបញ្ចុះតម្លៃយ៉ាងពិសេសក្នុងថ្ងៃនោះផ្ទាល់តែម្ដង ចាប់ពី ៥០%ឡើងទៅ។ លោករំពឹងថាក្នុងឆ្នាំនេះ នឹងមានការចូលរួមប្រមាណជាង ២ម៉ឺននាក់ពីសំណាក់ឪពុកម្ដាយ និងកុមារកម្ពុជាទាំងអស់។
គួរបញ្ជាក់ដែរថា ពិព័រណ៍កុមារ និងគ្រួសារលើកទី៤ នឹងរៀបចំឡើងនៅថ្ងៃទី ១៧ ១៨ ខែមិថុនា ឆ្នាំ ២០១៧ ចាប់ពីម៉ោង ៨ព្រឹករហូតដល់ម៉ោង ៨យប់ នៅអគារពិព័រណ៍កោះពេជ្រខាងមុខនេះ៕