តុលាការអាមេរិកកាត់ទោសខុសជាប់គុក ១៧ឆ្នាំ ព្រោះមុខមាត់ដូចជនសង្ស័យ
- 2017-06-13 07:59:52
- ចំនួនមតិ 0 | ចំនួនចែករំលែក 0
តុលាការអាមេរិកកាត់ទោសខុសជាប់គុក ១៧ឆ្នាំ ព្រោះមុខមាត់ដូចជនសង្ស័យ
ចន្លោះមិនឃើញ
លោក Richard Jones ជាជនជាតិអាមេរិក បានជាប់ពន្ធនាគាររយៈពេល ១៧ឆ្នាំ ក្រោមបទចោទថាបានប្រព្រឹត្តិបទឧក្រិដ្ឋ តែលោកតែងតែបដិសេធម្ដងហើយម្ដងទៀត។
កាលពីថ្ងៃព្រហស្បតិ៍សប្ដាហ៍មុន លោក Jones ត្រូវបានដោះលែងឲ្យមានសេរីភាពឡើងវិញ ក្រោយសាក្សីជាច្រើននាក់ប្រាប់ថា ពួកគេបានឃើញបុរសម្នាក់មានមុខមាត់ដូចគ្នាទៅនឹងលោក Jones។ មេធាវីរបស់លោកក៏រកឃើញថា គាត់មានមុខមាត់ស្ទើរតែដូចជនសង្ស័យបេះបិទ ហើយឈ្មោះក៏ស្រដៀងគ្នាទៀត។
លោក Jones ប្រាប់ថា នៅពេលឃើញរូបថត លោកមានអារម្មណ៍ភ្ញាក់ផ្អើលខ្លាំងដោយសារតែមុខមាត់ដូចខ្លួនពេក ធ្វើឲ្យគេងាយយល់ច្រឡំ។ លោក Jones រស់នៅទីក្រុង Kansas រដ្ឋ Missouri សហរដ្ឋអាមេរិក ត្រូវបានចោទប្រកាន់ករណីប្លន់ក្នុងឆ្នាំ ១៩៩៩។
ប៉ុន្តែ Jones បានស្បថថា ខ្លួនមិនបានប្រព្រឹត្តិរឿងទាំងនេះឡើយ ព្រោះពេលកើតហេតុ ខ្លួនស្នាក់នៅក្នុងផ្ទះ។ ទោះយ៉ាងណា តុលាការបានសម្រេចទោសឲ្យជាប់ពន្ធនាគារចំនួន ១៩ឆ្នាំ ទាំងគាត់មានកូនតូចអាយុពីរបីខែម្នាក់ផង។
ការទើបបែកធ្លាយ គឺនៅក្នុងឆ្នាំ ២០១៥ លោក Jones បានទទួលដំណឹងពីអ្នកទោសផ្សេងទៀតក្នុងពន្ធនាគារ Lansing Correctional Facility ថាមានបុរសម្នាក់មានមុខមាត់ដូចលោកខ្លាំងណាស់ និងឈ្មោះស្រដៀងគ្នា គឺឈ្មោះ Ricky ហើយសកម្មក្នុងអំពើឆក់ប្លន់។ ក្រោយមក លោក Jones បានទាក់ទងទៅមេធាវីនៅសាលាច្បាប់ University of Kansas Law School ឲ្យជួយរកយុត្តិធម៌។
ក្រុមមេធាវីបានតាមដានបុរសជាជនសង្ស័យ Ricky Amos ដែលរស់នៅទីក្រុង Kansas ដូចគ្នា។ បន្ថែមលើនេះ Ricky មានកម្ពស់ និងទម្ងន់ប្រហាក់ប្រហែលគ្នាទៀតជាមួយលោក Jones និងមានអាយុប្អូនមួយឆ្នាំ។ ប៉ុន្តែ Ricky បានបដិសេធការជាប់ពាក់ព័ន្ធនានា។ យ៉ាងណាក្ដី បច្ចុប្បន្ន Ricky កំពុងជាប់ពន្ធនាគារស្រាប់ជាមួយបទល្មើសផ្លូវភេទ ប្លន់ និងលាក់ទុកគ្រឿងញៀនជាដើម។ ដោយសារតែការប្រមូលភស្តុតាងជាង ២ឆ្នាំ មេធាវីថ្មីរបស់លោក គឺអ្នកស្រី Alice Craig បានជួយឲ្យលោកចេញផុតពីការចោទប្រកាន់ដោយជោគជ័យ។
ក្រោយដោះលែង សប្បុរសជនបានរៃអង្គាសប្រាក់តាមអនឡាញបានប្រមាណ ១ម៉ឺនដុល្លារត្រឹមរយៈពេល ២ថ្ងៃ ហើយលោកក៏គ្រោងនឹងដាក់ពាក្យបណ្ដឹងប្ដឹងបកវិញផងដែរ៕