ឆៃ សារ៉ា លើកចំណុចខ្លាំងរបស់ ឌីម៉ា មុនប៉ះគ្នានៅវគ្គផ្ដាច់ព្រ័ត្រ

2017-06-16 01:56:23
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករមានឈ្មោះបោះសំឡេងគួរសមក្នុងវិស័យប្រដាល់គុនខ្មែរ ឆៃ សារ៉ា លើកឡើងពីចំណុចល្អៗមួយចំនួនរបស់កីឡាករ ឃីម ឌីម៉ា ដែលជាដៃគូរបស់ខ្លួនត្រូវប៉ះគ្នានៅវគ្គផ្ដាច់ព្រ័ត្រខ្សែក្រវាត់គោជលទម្ងន់ ៦៣.៥ គីឡូក្រាម។

កីឡាករ ឆៃ សារ៉ា

ឆៃ សារ៉ា បានប្រាប់ឲ្យដឹងថា តាមការសង្កេតមើលពីការប្រកួតរបស់ជើងខ្លាំងជួរមុខ ឃីម ឌីម៉ា នាពេលកន្លងមក មានចំណុចល្អច្រើនដូចជា សន្ទុះនៃការវ៉ៃចេញល្អ មានក្បាច់និងបច្ចេកទេសខ្ពស់ ហើយអ្វីដែលជាចំណុចពិសេសមួយទៀតនោះ គឺកីឡាករមកពីខេត្តបន្ទាយមានជ័យរូបនេះតែងតែគ្រប់គ្រងស្ថានភាពក្នុងពេលប្រកួតបានល្អជានិច្ច។

សិស្សរួមគ្រូនិងកីឡាករ ម៉ឺន សុភា រូបនេះបន្តទៀតថា ការប៉ះជាមួយ ឃីម ឌីម៉ា នេះជាលើកទី១ហើយសម្រាប់គេ ពីមុនមកមិនដែលជួបគ្នានោះឡើយ ដល់ពេលជួបគ្នាគឺនៅវគ្គផ្ដាច់ព្រ័ត្រតែម្ដង។ បើទោះជាមើលឃើញពីសមត្ថភាពដៃរបស់ខ្លួនខ្លាំងដូចនេះក៏ដោយ ឆៃ សារ៉ា ប្ដេជ្ញានឹងខំប្រឹងប្រែងហ្វឹកហាត់ដើម្បីដណ្ដើមជ័យជម្នះនៅវគ្គផ្ដាច់ព្រ័ត្រនេះឲ្យបាន។

កីឡាករ ឆៃ សារ៉ា

កីឡាករ ឆៃ សារ៉ា ក្រហម ហ្វានិមិត្ត ខៀវ

កីឡាករ ឆៃ សារ៉ា ប្រកួតចុងក្រោយឈ្នះកីឡាករថៃ ហ្វានិមិត្ត ដោយពិន្ទុនាវគ្គពាក់កណ្ដាលផ្ដាច់ព្រ័ត្រខ្សែក្រវាត់គោជលរបស់សង្វៀន CNC។ ជើងខ្លាំងរូបនេះនឹងត្រូវជួប ឃីម ឌីម៉ា នៅវគ្គផ្ដាច់ព្រ័ត្រនាថ្ងៃទី២៤ មិថុនា ឆ្នាំ២០១៧ វេលាម៉ោង ៦ល្ងាចតទៅ៕

អត្ថបទ៖ នួន ស៊ីណា