ផ្ទុះយ៉ាងសាហាវ នៅក្បែរសាលាមត្តេយ្យមួយ ស្លាប់និងរបួស ជាង៧០នាក់
- 2017-06-16 01:06:04
- ចំនួនមតិ 0 | ចំនួនចែករំលែក 0
ផ្ទុះយ៉ាងសាហាវ នៅក្បែរសាលាមត្តេយ្យមួយ ស្លាប់និងរបួស ជាង៧០នាក់
ចន្លោះមិនឃើញ
យ៉ាងហោចណាស់មនុស្សចំនួន ៨ នាក់បានស្លាប់ និង ៦៥ នាក់ផ្សេងទៀតរងរបួស ដោយក្នុងនោះរួមមានកុមារផងដែរ បន្ទាប់ពីមានហេតុការណ៍បំផ្ទុះយ៉ាងសាហាវមួយ នៅក្បែរសាលាមត្តេយ្យមួយកន្លែង ស្ថិតនៅក្នុងស្រុក Fengxian ភាគខាងកើតប្រទេសចិន កាលពីថ្ងៃព្រហស្បតិ៍ ម្សិលមិញនេះ។
បើយោងតាមសារព័ត៌មាន CCTV របស់ប្រទេសចិន បានឲ្យដឹងថា ជនរងគ្រោះចំនួន ២ នាក់បានស្លាប់នៅនឹងកន្លែងកើតហេតុ ខណៈ ៦ នាក់ផ្សេងទៀត បានស្លាប់នៅមន្ទីរពេទ្យ ហើយមានមនុស្ស ៩ នាក់កំពុងស្ថិតក្នុងអាការៈធ្ងន់ធ្ងរ។
ទោះបីជាយ៉ាងណា មិនមានកូនសិស្ស ឬគ្រូបង្រៀន នៅឯសាលាមត្តេយ្យខាងលើបាត់បង់ជីវិតឡើយ ដោយសារតែពេលនោះ ពួកគេកំពុងរៀន។ នេះបើយោងតាមរដ្ឋាភិបាលស្រុក Fengxian ប្រាប់ឲ្យដឹង នៅលើបណ្ដាញសង្គម Weibo។
ប៉ូលិសស្រុក Fengxian បានឲ្យដឹងថា ហេតុការណ៍ផ្ទុះខាងលើបានកើតឡើង នៅចំពីមុខក្លោងទ្វានៃសាលាមត្តេយ្យ Chuangxin Kindergarten នៅវេលាម៉ោង ៤ និង ៥០ នាទីល្ងាច។
យ៉ាងណាមិញ គេបានកំណត់មុខសញ្ញាជនសង្ស័យម្នាក់ នៅក្នុងហេតុការណ៍ដ៏គួរឲ្យរន្ធត់ខាងលើ បើទោះបីជាគេមិនទាន់ដឹងពីមូលហេតុ នៃការបំផ្ទុះនោះពិតប្រាកដក៏ដោយ។ នេះបើយោងតាមសារព័ត៌មាន ABCNews៕
សូមទស្សនាវីដេអូទាំងអស់គ្នា៖