ឈឿន ឆៃដែន ប្រឡូកប្រដាល់វិញក្រោយ របួសជង្គង់បាត់មុខជាងកន្លះឆ្នាំ
- 2017-06-16 02:34:06
- ចំនួនមតិ 0 | ចំនួនចែករំលែក 0
ឈឿន ឆៃដែន ប្រឡូកប្រដាល់វិញក្រោយ របួសជង្គង់បាត់មុខជាងកន្លះឆ្នាំ
ចន្លោះមិនឃើញ
អ្នកប្រដាល់ដើមកំណើតមកពីខេត្តបាត់ដំបង ឈឿន ឆៃដែន សម្រេចចូលប្រឡូកក្នុងវិស័យប្រដាល់ឡើងវិញក្រោយរបួសជង្គង់ធូរស្រាលនិងជាសះស្បើយស្ទើរ១០០ភាគរយ ដើម្បីជីវភាពគ្រួសារនិងចិត្តគំនិតនៅតែស្រឡាញ់ប្រដាល់។
កីឡាករ ឈឿន ឆៃដែន បាននិយាយឲ្យដឹងថា បច្ចុប្បន្ននេះគេចូលក្លឹបហ្វឹកហាត់ប្រដាល់ឡើងវិញហើយ បន្ទាប់ពីឈប់ប្រកួតអស់រយៈពេលប្រហែលជាងកន្លះឆ្នាំកន្លងទៅ។ ក្រោយចំណាយពេលព្យាបាលជង្គង់អស់មួយរយៈពេលកន្លងមក ហើយធូរស្រាលអាចឡើងប្រកួតវិញបាន ទើបគេសម្រេចចូលសង្វៀនវិញតែម្ដង ជើងខ្លាំងរូបនេះទម្លាក់ទម្ងន់មកត្រឹម ៦០គីឡក្រាមវិញម្ដង។
អ្នកប្រដាល់រូបនេះបន្ថែមទៀតថា ហេតុតែខ្លួនទម្លាក់ទម្ងន់ដូចនេះដោយសារថា របួសរបស់ខ្លួននៅមិនទាន់ជាស្រួលបួលនៅឡើយ ប្រភេទទម្ងន់ ៦០គីឡូក្រាមនេះមិនសូវជាមានកីឡាករខ្លាំងហួសសមត្ថភាពខ្លួននោះឡើយ គេអាចនឹងទប់ទល់បានទាំងកម្លាំងនិងស្នៀតប្រយុទ្ធ។ បើនិយាយពីទម្ងន់ចាស់ ៦៣.៥ វិញគឺសំបូរកីឡាករល្អៗច្រើន ហើយគេចាញ់កម្លាំងកីឡាករទាំងនោះ ទោះជាមានក្បាច់ប្រយុទ្ធប្រហាក់ប្រហែលគ្នាក៏ដោយឲ្យតែចាញ់កម្លាំងដៃគូហើយពិបាកនឹងប្រកួតឈ្នះគេណាស់។
ឈឿន ឆៃដែន ជាកីឡាករមកពីក្លឹបនិរោធមានជ័យ គេបាត់មុខពីសង្វៀនប្រដាល់តាំងពីចាញ់ការប្រកួតនាកម្មវិធីជម្រុះដណ្ដើមខ្សែក្រវាត់ គូបូតា រដូវការទី៦ តាំងពីឆ្នាំ២០១៦មកម្ល៉េះ។ ដោយឡែកនៅចុងសប្ដាហ៍នេះ ជើងខ្លាំងរូបនេះត្រូវឡើងប្រកួតមិត្តភាពជាមួយអ្នកប្រដាល់ឆ្លងដែនមកប្រទេសថៃ តែដោយសារមានជំងឺផ្ដាសាយធំធ្វើឲ្យអាក់ខានវិញ៕