គ្រូពេទ្យចិត្តធម៌បរិច្ចាគឈាមអស់ ២៦លីត្រ ដើម្បីជួយសង្គ្រោះអ្នកជំងឺមិនធ្លាប់ស្គាល់គ្នាសោះ

2017-06-16 04:40:32
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកគ្រូពេទ្យម្នាក់បម្រើការនៅមន្ទីរពេទ្យ Tongji ទីក្រុងវូហាន ខេត្តហ៊ូបេ ប្រទេសចិន បានបរិច្ចាគឈាមអស់ប្រមាណ ២៦ ៩០០មីលីលីត្រ ឬស្មើនឹង ២៦,៩លីត្រ រយៈពេល ២៣ឆ្នាំ កំពុងទទួលការកោតសរសើរ និងភ្ញាក់ផ្អើលពីមហាជន។

លោកគ្រូពេទ្យ Zheng Kai កំពុងធ្វើការ

អំពើល្អរបស់គ្រូពេទ្យរូបនេះ បានរក្សាទុកជារឿងអាថ៌កំបាំងពុំមានមិត្តរួមការងារណាម្នាក់ដឹងឡើយ រហូតមន្ទីរពេទ្យរបស់លោកបានទទួលលិខិតសរសើរពីមជ្ឈមណ្ឌលផ្ដល់ឈាម Wuhan Blood Center (WBC) កាលពីថ្ងៃទី ១៤មិថុនាកន្លងទៅ ដែលជាទិវាបរិច្ចាគឈាមពិភពលោក World Blood Donor Day ។

លោកគ្រូពេទ្យមានឈ្មោះ Zheng Kai បានចាប់ផ្ដើមបរិច្ចាគលើកដំបូងក្នុងឆ្នាំ ១៩៩៤ ពោលគឺចាប់តាំងពីជានិស្សិតពេទ្យឆ្នាំទី ១។ គាត់បានបរិច្ចាគលើកទីមួយចំនួន ៤០០មីលីលីត្រ តាមការស្នើរបស់មិត្តម្នាក់។ បន្ទាប់ពីបរិច្ចាគឈាមលើកទី ២ នៅឆ្នាំបន្ទាប់ លោក Zheng ដឹងថាខ្លួនពិបាកនឹងបញ្ឈប់ការបរិច្ចាគឈាមខ្លាំងណាស់ ព្រោះធ្វើឲ្យលោកសប្បាយរីករាយនឹងជួយអ្នកដទៃ។

នៅឆ្នាំបន្តបន្ទាប់ លោកបានបរិច្ចាគឈាមជាមធ្យម ៣ដងក្នុងមួយឆ្នាំ និងមិនដែលខានឡើយរយៈពេល ២៣ឆ្នាំមកនេះ។ បើយោងទៅតាមមជ្ឈមណ្ឌល WBC រៀបរាប់ថា គ្រូពេទ្យ Zheng បរិច្ចាគឈាមម្ដងៗបានចំនួនយ៉ាងច្រើនអតិបរមា ទោះបីជាពេលខ្លះគាត់មានសុខភាពមិនសូវល្អក៏ដោយ។

លោក Zheng និយាយថា "ជួនកាលអ្នកជំងឺបាត់បង់ជីវិត ព្រោះមិនមានឈាមជួយសង្គ្រោះទាន់ពេលវេលា"។ លោកតែងតែទទួលបានលិខិតសរសើរជាច្រើនពីមជ្ឈមណ្ឌល។ លោកបន្តថា "ការបរិច្ចាគឈាម តម្រូវឲ្យយើងមានសុខភាពល្អ ហើយខ្ញុំសម្រេចដើរទៅធ្វើការ ៨គីឡូម៉ែត្ររៀងរាល់ថ្ងៃ"។ ពេលសម្រាកពីការងារ លោកទៅហាត់ប្រាណសាច់ដុំបន្ថែមទៀត រហូតទទួលបានសាច់ដុំពោះ ៦កង់។

លោកបានបង្ហាញក្ដីសង្ឃឹមថា នឹងមានមនុស្សកាន់តែច្រើនចូលរួមជួយបរិច្ចាគឈាមដើម្បីសង្គ្រោះអ្នកដែលត្រូវការ "ការបរិច្ចាគឈាមមិនមានគ្រោះថ្នាក់ឡើយ ថែមទាំងជួយសម្អាតឈាមក្នុងខ្លួនបានទៀតផង"៕