ព្រឹត្តិការណ៍និយាយជាសាធារណៈ Ignite Phnom Penh
- 2017-06-20 09:44:02
- ចំនួនមតិ 0 | ចំនួនចែករំលែក 0
ព្រឹត្តិការណ៍និយាយជាសាធារណៈ Ignite Phnom Penh
ចន្លោះមិនឃើញ
Ignite Talks គឺជាកម្មវិធីនិយាយជាសាធារណៈមួយ ដែលបានបង្កើតឡើង នៅឆ្នាំ 2006 នៅ ទីក្រុងស៊ាថល រដ្ឋវ៉ាស៊ីនតោន សហរដ្ឋអាមេរិក ដោយលោក Brady Forrest និង លោក Bre Pettis។ ដប់ឆ្នាំមកនេះ Ignite Talks ត្រូវបានប្រារព្ធធ្វើឡើង នៅប្រទេសបារាំង អង់គ្លេស កូរ៉េខាងត្បូង ជប៉ុន ឥណ្ឌា អូស្ត្រាលី ប្រេស៊ីល អេហ្សីប និង តំបន់ផ្សេងៗជុំវិញពិភពលោក សរុបជាង 350 កន្លែង។
Ignite Talks ត្រូវបាននាំយកមកព្រះរាជាណាចក្រកម្ពុជាយើងនេះក្រោមឈ្មោះថា Ignite Phnom Penh ដែលនឹងប្រារព្ធធើ្វឡើងជាលើកទី២ នៅថ្ងៃទី ២៥ ខែមិថុនា ឆ្នាំ ២០១៧ ខាងមុខ នេះ នៅសាលាមជ្ឈមណ្ឌលវប្បធម៌កម្ពុជាកូរ៉េ (CKCC) ចាប់ពីម៉ោង ១២ ថ្ងៃត្រង់ ដល់ ៥ រសៀល។
Ignite Phnom Penh ដែលប្រារព្ធធ្វើឡើងនាខែធ្នូ ឆ្នាំ ២០១៦ កន្លងមក ត្រូវបានទទួលការគាំទ្រ និងចូលរួមពីសិស្សនិសិត្ស និងបុគ្គលិកតាមសាលា, មហាវិទ្យាល័យ និង គ្រឹះស្ថាន ផ្សេងៗជាច្រើន ដែលមានរួមមានអ្នកចូលរួមប្រមាណជាង ៧០០ នាក់។
Ignite Phnom Penh ត្រូវបានរៀបចំឡើងដោយយុវជនស្ម័គ្រចិត្ដមួយក្រុម ដែលមាន សមាជិក ក្រុមចំនួន ៨នាក់ ដែលក្នុងនោះមានលោក ជា សុខហ៊ី (ហៅ Bill) ជាអ្នកដឹកនាំក្រុម។
យោងតាម ប្រសាសន៏របស់ លោក សុខហ៊ី បានអោយដឹងថា គោលបំណងដែលនាំកម្មវិធី នេះមកកម្ពុជាគឺចង់ ពង្រឹងសមត្ថភាព នៃការនិយាយជាសាធារណៈដល់ប្រជាជនគ្រប់រូប និងផ្ដល់ ឱកាសអោយ សិស្សានុសិស្ស យុវជន និងកូនខ្មែរទាំងអស់អាចឡើងនិយាយពីគំនិតរបស់ខ្លួន ដែលចង់ចែករំលែក ទៅ សាធារណៈជនទាំងឡាយ។
ប្រធានបទមានពាក់ព័ន្ធទៅនឹងវិស័យអប់រំ ការលើកទឺកចិត្ដ ការចែករំលែកអំពីភាពជោគជ័យ ក្ដីស្រមៃ និងគោលដៅរបស់ខ្លួន។ ចំណុចពិសេសរបស់ កម្មវិធី Ignite Phnom Penh គឺ វាគ្មិន នីមួយៗត្រូវធ្វើបទបង្ហាញក្នុងរយៈពេលត្រឹមតែ 5 នាទី និងស្លាយ (Slide) ចំនួន 20។ ចំណុចនេះ គឺតម្រូវអោយវាគ្មិននីមួយៗមានការត្រៀមរៀបចំខ្លួនយ៉ាងល្អ និងមានកម្រិតពិបាកខ្ពស់។ អាស្រ័យ ហេតុនេះ វាគ្មិនទទួលបានបទពិសោធថ្មី ដែលជួយអោយពួកគាត់អាចគ្រប់គ្រង ពេលវេលា ក្នុងការធ្វើបទបង្ហាញអោយបានល្អ។
កម្មវិធីនេះមានការចូលរួមពីសំណាក់វាគ្មិនចំនួន 15 រូបមកពីគ្រប់ស្ថាប័ន ដោយមានវាគ្មិនមួយចំនួន ជា អ្នកដែលមានបទពិសោធន៍នៅក្នុងសង្គមជាច្រើនឆ្នាំ និងវាគ្មិនមួយចំនួនទៀតគឺជា សិស្សានុសិស្ស ដែលមកពីសាកលវិទ្យាល័យ និងវិទ្យាល័យនានានៅក្នុងទីក្រុងភ្នំពេញ ដែលនឹងចែក រំលែកនូវបទពិសោធន៍ និងចំណេះដឹងរបស់ខ្លួនក្នុងកម្មវិធីនេះ។
មិនត្រឹមតែប៉ុណ្ណោះ Ignite Phnom Penh 2017ឆ្នាំនេះត្រូវបានទទួលការគាំទ្រពី សំណាក់ ស្ថាប័ន ជាច្រើន ក្នុងនោះមានក្រុមហ៊ុន Smart Axata ដែលបានចូលរួមគាំទ្រ ជាអ្នកឩបត្ថម្ភធំ ក្នុងកម្មវិធីនេះ។
Ignite Phnom Penh វាចាខ្លីតែខ្លឹម ស្វាគមន៍សាធារណៈជនទាំងឡាយ មកចូលរួមទទួលយក បទពិសោធន៍ថ្មីនេះ។
លោកអ្នកអាចទទួលបានព័ត៌មានថ្មីៗ ដោយចូលទៅកាន់ទំព័រហ្វេសប៊ុក របស់កម្មវិធីនេះដែលមានឈ្មោះថា Ignite Phnom Penh ឬតាមគេហទំព័រ www.ignitephnompenh.com ៕