បុរសថៃបំផ្ទុះគ្រាប់បែកក្នុងមន្ទីរពេទ្យកក្រើកក្រុងបាងកក ព្រោះចង់សងសឹកកងទ័ព

2017-06-21 00:55:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ជនសង្ស័យជាបុរសជនជាតិថៃ បានសារភាពជាសាធារណៈកាលពីថ្ងៃអង្គារ ទី ២០ មិថុនាម្សិលមិញថា ការបំផ្ទុះគ្រាប់បែកមួយគ្រាប់ក្នុងមន្ទីរពេទ្យកាលពីខែមុន ព្រោះតែចង់សងសឹកលើយោធាដែលតែងតែធ្វើរដ្ឋប្រហារញឹកញាប់។

ការបំផ្ទុះបានកើតឡើងចំពេលគម្រប់ខួប ៣ឆ្នាំ នៃរដ្ឋប្រហាររបស់រដ្ឋាភិបាលថ្ងៃទី ២២ឧសភា ដោយវាយប្រហារលើបន្ទប់រង់ចាំពិសេស VIP ក្នុងមន្ទីរពេទ្យគ្រប់គ្រងដោយយោធាក្នុងទីក្រុងបាងកក និងបណ្ដាលឲ្យរបួសមនុស្ស ២១នាក់។

លោកនាយករដ្ឋមន្ត្រីថៃ ប្រាក់យុទ្ធ ចាន់អូឆា ធ្លាប់សង្ស័យថា ប្រហែលជាជនបំផ្ទុះខឹងសម្បារនឹងការក្ដោបអំណាចរបស់ខ្លួន។

ជនសង្ស័យមានឈ្មោះ Wattana Phumret អាយុ ៦២ឆ្នាំ បានរៀបរាប់ប្រាប់អាជ្ញាធរពីរបៀបបង្កើតគ្រាប់បែកច្នៃយ៉ាងលម្អិតដែលបានទុកចោលក្នុងថូផ្កានៅមន្ទីរពេទ្យឃីងមង្គុត។

លោកសារភាពថា ខ្លួនបានទទួលការលើកទឹកចិត្តពីក្រុមអ្នកស្អប់រដ្ឋាភិបាលជាច្រើនទៀត ព្រោះរដ្ឋប្រហារធ្វើឲ្យមហន្តរាយដល់សេដ្ឋកិច្ច និងបានរឹតបន្តឹងដល់សិទ្ធិរបស់ប្រជាជន"។ តែលោកបានសុំទោសដល់ជនរងគ្រោះទាំងអស់ផងដែរ។

គួររម្លឹកថា ចាប់តាំងពីឆ្នាំ ១៩៣២ យោធាថៃបានធ្វើរដ្ឋប្រហារដោយជោគជ័យចំនួន ១២លើក ដោយបានធ្វើឲ្យមានការតវ៉ាបង្ហូរឈាម និងស្លាប់មនុស្សមួយចំនួន៕