ស្ទើរមិនជឿ! រកឃើញវត្ថុបុរាណមានតម្លៃ របស់ Nazi ជាច្រើន លាក់នៅក្រោយ ទ្វារសម្ងាត់មួយ

2017-06-21 01:51:32
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ ប៉ូលិសបានរកឃើញ វត្ថុបុរាណមានតម្លៃជាច្រើន របស់ពួកណាស៊ី (Nazi) ដែលត្រូវបានគេលាក់ នៅខាងក្រោយទូសៀវភៅ និងទ្វារសម្ងាត់មួយ នៅក្នុងទីក្រុង Buenos Aires ប្រទេសអាហ្សង់ទីន។

វត្ថុបុរាណត្រូវបានគេរកឃើញ សរុបចំនួន ៧៥ នៅទីកន្លែងខាងលើ ដែលជាសារមន្ទីរផ្ទាល់ខ្លួនមួយ ហើយវត្ថុទាំងនោះមានដូចជា កាំភ្លើងខ្លី មានស្លាកសញ្ញាណាស៊ី (Nazi) , កូនកាំបិតស្នៀត , មេដាយសង្គ្រាម , ពានរង្វាន់ , រូបមេដឹកនាំណាស៊ី Adolf Hitler , បន្ទាត់ , ត្រីវិស័យ , ឧបករណ៍សម្រាប់វាស់ទំហំខួរក្បាលមនុស្ស និង វត្ថុជាច្រើនទៀត។

វត្ថុបុរាណមួយចំនួន នៅស្ថិតក្នុងប្រអប់ដើមនៅឡើយ ដូចជា គ្រឿងភ្លេងផ្លុំអារម៉ូនីកា (Harmonica) និងប្រដាប់ផ្គុំសម្រាប់ក្មេងលេង ជាដើម។ ទោះបីជាយ៉ាងណា ក្រុមអាជ្ញាធរមិនបានបញ្ចេញព័ត៌មានលម្អិត អំពីទីកន្លែងដែលធ្វើការរឹបអូស ឬ អត្តសញ្ញាណរបស់ម្ចាស់វត្ថុបុរាណទាំងនោះឡើយ ហើយក៏មិនបានបង្ហាញពី វិធីដែលធ្វើឲ្យពួកគេដឹងពីកន្លែងលាក់វត្ថុបុរាណទាំងនោះដែរ។ ប៉ុន្តែ ពួកគេបានឲ្យដឹងថា ពួកគេបានឆ្មក់ចូលទីតាំងចំនួន ៣ កន្លែង។

ក្រៅពីវត្ថុបុរាណខាងលើ សាកសពសត្វមិនរលួយ និង សិល្បៈចិនមួយចំនួន ក៏ត្រូវបានគេរកឃើញផងដែរ។ ក្រុមអាជ្ញាធរ បាននិយាយថា វាទំនងជាទុកសម្រាប់លក់នៅលើទីផ្សារងងឹត។

គួរឲ្យដឹងថា បន្ទាប់ពីសង្គ្រាមលោកលើកទី ២ បានបញ្ចប់ទៅ ពួកណាស៊ី បានរួចខ្លួនពីការកាត់ទោស នៅឯប្រទេសអាហ្សង់ទីន ដោយប្រធានាធិបតី លោក Juan Perón បានផ្ដល់ឲ្យពួកគេនូវឱកាស ដើម្បីចាប់ផ្ដើមកសាងជីវិតថ្មី។ បច្ចុប្បន្ន កូនចៅអាល្លឺម៉ង់ ជាង ៣,៥ លាននាក់ កំពុងរស់នៅក្នុងប្រទេសអាមេរិកខាងត្បូង៕