បែកធ្លាយ សាច់ឆ្កែ ត្រូវគេបន្លំជា សាច់មាន់ លក់ពេញលើកោះបាលី ឲ្យភ្ញៀវទេសចរ
- 2017-06-22 04:03:19
- ចំនួនមតិ 0 | ចំនួនចែករំលែក 0
បែកធ្លាយ សាច់ឆ្កែ ត្រូវគេបន្លំជា សាច់មាន់ លក់ពេញលើកោះបាលី ឲ្យភ្ញៀវទេសចរ
ចន្លោះមិនឃើញ
ភ្ញៀវទេសចរជាច្រើន នៅលើកោះបាលី (Bali) របស់ប្រទេសឥណ្ឌូនេស៊ី បានទទួលទានសាច់ឆ្កែ និងគាំទ្រការជួញដូរដ៏ឃោរឃៅនេះ ទាំងមិនដឹងខ្លួន បន្ទាប់ពីអ្នកលក់នៅទីនោះ បានយកសាច់ឆ្កែ បន្លំថាជាសាច់មាន់អាំងដោតចង្កាក់ លក់ព្រោងព្រាតនៅលើកោះនោះ។ នេះបើយោងតាមសារព័ត៌មាន Dailymail ដែលបានចុះផ្សាយ កាលពីថ្ងៃច័ន្ទ កន្លងទៅនេះ។
ខ្សែវីដេអូដ៏គួរឲ្យភ្ញាក់ផ្អើលមួយ ដែលប្រមាញ់បានដោយ ក្រុមអ្នកស្រលាញ់សត្វអូស្ត្រាលី Animals Australia នៅលើកោះដ៏មានប្រជាប្រិយភាពនោះ បានបង្ហាញឲ្យឃើញ សត្វឆ្កែជាច្រើនក្បាល ត្រូវគេចាប់ចងមាត់ និងធ្វើបាបយ៉ាងឃោរឃៅ មុនពេលកាប់សម្លាប់ពួកវា យកមកបន្លំលក់ជាសាច់មាន់ ឲ្យភ្ញៀវទេសចរនៅទីនោះ។
វីដេអូខាងលើត្រូវបានចាក់ផ្សាយបន្តផ្ទាល់ នៅក្នុងកម្មវិធី 7.30 របស់ទូរទស្សន៍ ABC កាលពីយប់ថ្ងៃច័ន្ទ កន្លងទៅនេះ ដោយបង្ហាញឲ្យឃើញពីសកម្មភាព អ្នកលក់ដើរសំដៅទៅរកភ្ញៀវទេសចរមួយក្រុម នៅលើឆ្នេរ Double Six Beach នៃកោះបាលី។
«តម្លៃ ១ ដុល្លារ... សាច់មាន់អាំងដោតចង្កាក់... មិនមែនសាច់ឆ្កែទេ»។ អ្នកលក់ស្រែកហៅឲ្យពួកគេជួយទិញ ដោយបង្ហាញសាច់ដោតចង្កាក់ជាច្រើន នៅក្នុងប្រអប់មួយ ដែលមានសរសេរអក្សរអង់គ្លេសថា «Sate»។
គួរបញ្ជាក់ថា Sate (ឥណ្ឌូនេស៊ី) ឬ Satai (ម៉ាឡេស៊ី) ឬអាចហៅម្យ៉ាងទៀតថា Satay គឺជាអាហារបែបអាស៊ីអាគ្នេយ៍មួយប្រភេទ ដែលមានបំណែកសាច់តូចៗ ដោតចង្កាក់ឈើអាំង ហើយគេទទួលទានជាមួយទឹកជ្រលក់។
ផ្ទុយទៅវិញ នៅពេលដែលអ្នកស៊ើបអង្កេតរបស់ ក្រុម Animals Australia ដើរចូលទៅសួរអ្នកលក់នោះ រូបគេក៏បានសារភាព និងឆ្លើយថា «វាជាសាច់ឆ្កែ»។
ទោះបីជាយ៉ាងណា មនុស្សមួយចំនួននៅលើកោះបាលី ជឿជាក់ថា សត្វឆ្កែ គឺជាជម្រើសអាហារដ៏មានសុខភាពមួយ និងបង្កើនភាពអង់អាចសម្រាប់បុរស ហើយមានតម្លៃថោកទៀតផង៕
សូមទស្សនាវិដេអូខាងក្រោម៖