កន្ធាយក្បាលកង្កែប សត្វកម្របំផុតលើពិភពលោក មាននៅកម្ពុជា ជិតផុតពូជហើយព្រោះ.....

2017-06-23 02:27:47
ចំនួនមតិ 0 | ចំនួនចែករំលែក 0

ចន្លោះមិនឃើញ

សត្វកន្ធាយក្បាលកង្កែប នៅខេត្តក្រចេះ កំពុងតែប្រឈមមុខនឹងការបាត់បង់ ដោយសារតែនាំចេញទៅលក់នៅវៀតណាមនិងចិន។ នេះបើតាមការឱ្យដឹងពីក្រុមអ្នកអភិរក្សសត្វព្រៃ WCS។

កន្ធាយក្បាលកង្កែប ឬរមិច ជាប្រភេទសត្វកម្ររងគ្រោះជិតដាច់ពូជ ដែលត្រូវបានដាក់ចូលក្នុងបញ្ជីក្រហមរបស់អង្គការអន្តរជាតិខាងអភិរក្សសត្វព្រៃពិភពលោក IUCN។ នៅស្រុកខ្មែរ សត្វប្រភេទនេះ មាននៅសល់មួយចំនួន ក្នុងខេត្តក្រចេះនិងស្ទឹងត្រែង ប៉ុន្តែកំពុងប្រឈមនឹងកាត់តែផុតពូជថែមទៀត។

បើទោះបី សត្វកន្ធាយក្បាលកង្កែប ជាសត្វកម្រ ហើយគេមិនងាយនឹងនេសាទបានក៏ដោយ តែសត្វនេះ ត្រូវអ្នកអភិរក្សសត្វ រាយការណ៍ថា វាកំពុងតែត្រូវប៉ាន់សម្រាប់ការនាំចេញទៅលក់នៅប្រទេសចិន និងវៀតណាម សម្រាប់ការចម្អិនធ្វើម្ហូបនៅតាមភោជនីយដ្ឋាន។ នៅក្នុងទីផ្សារងងឹត កន្ធាយប្រភេទនេះ លក់បានកម្រិតថ្លៃគួរសម គឺ ក្នុងមួយគីឡូក្រាម តម្លៃជាង១០ដុល្លារ។ ហើយកន្ធាយក្បាលកង្កែប ដែលធំបំផុត ក៏អាចមានទម្ងន់ រហូតដល់ប្រមាណជិត៥០គីឡូក្រាមឯណោះ។

សត្វកន្ធាយក្បាលកង្កែប អ្នកនៅស្រុកខ្មែរមួយចំនួន ច្រើនហៅថា ល្មិច ឬរមិច តែដោយសារតែសត្វកន្ធាយនេះ មានក្បាលទម្រង់ដូចសត្វកង្កែប ទើបគេច្រើនតែហៅឈ្មោះវាម្យ៉ាងទៀត ថា សត្វកន្ធាយក្បាលកង្កែប ទៅវិញ។ សត្វនេះ មានទំហំធំនិងរាងរូវ ស្រដៀងដូចសត្វអណ្តើកដែរ គ្រាន់តែស្នូកវាទន់។

សព្វថ្ងៃនេះ ក្រៅពីប្រឈមមុខនឹងការបាត់បង់ដោយសារតែការនាំចេញទៅលក់នៅបរទេស សត្វកន្ធាយក្បាលកង្កែបនេះ ក៏កំពុងតែប្រឈមនឹងបញ្ហាមនុស្ស នេសាទ និងចាប់យកពងកូនរបស់វា ហើយកត្តាធម្មជាតិប្រែប្រួលអាកាសធាតុ ក៏ធ្វើឲ្យពងកូនរបស់វាងាប់ ឬមិនញាស់ថ្មី ព្រមទាំងប្រឈមមុខនឹងសត្វដទៃផ្សេងៗទៀត ស៊ីពងកូនរបស់វាផងដែរ។ នេះបើតាមការបញ្ជាក់ឲ្យដឹងពីលោក ស៊ុន យឿន មន្ត្រីសម្របសម្រួលគម្រោងអភិរក្សសត្វកន្ធាយក្បាលកង្កែបរបស់អង្គការ WCS។

បើតាមមន្ត្រីជំនាញ ប្រភេទសត្វកន្ធាយក្បាលកង្កែបនេះ មានវត្តមានភាគច្រើននៅអាស៊ីអាគ្នេយ៍ តួយ៉ាង នៅកម្ពុជាដែលមានចំនួនច្រើនជាងប្រទេសជិតខាង ដូចជា ថៃ ឡាវ វៀតណាម ភូមា ឥណ្ឌូណេស៊ី ម៉ាឡេស៊ី និងហ្វីលីពីន ហើយក្រៅពីនេះ មានមួយចំនួន នៅចិន ឥណ្ឌា បង់ក្លាដែស និងប៉ាពូអាស៊ីហ្គីណេ។

យ៉ាងណាក្ដីអង្គការអភិរក្សអន្តរជាតិ CI បានធ្វើកិច្ចការថែរក្សាអភិរក្សសត្វនេះ នៅក្នុងខេត្តក្រចេះនិងស្ទឹងត្រែង អស់ជាង១០ឆ្នាំមកហើយ។ ទើបតែឆ្នាំ២០១៧នេះ ត្រូវអង្គការសមាគមអភិរក្សសត្វព្រៃ WCS ត្រូវបន្តកាន់គម្រោងអភិរក្សនេះបន្ត។ ចំណែក មន្ទីររដ្ឋបាលជលផលខេត្ត និងអាជ្ញាធរមូលដ្ឋាន ក៏បានផ្ដើមចាប់អារម្មណ៍យកចិត្តទុកដាក់ ដោយបានចូលរួមព្រលែងសត្វកន្ធាយនេះ ប្រមាណ១៥០ក្បាលឲ្យចូលទៅនៅក្នុងធម្មជាតិវិញ នៅថ្ងៃទៅ២១មិថុនា កន្លងទៅ៕

អត្ថបទ៖ ថោ ច័ន្ទឬទ្ធិ

ប្រភព៖ វិទ្យុបារាំងអន្តរជាតិ