កែប្រែការមើលងាយ ទៅជាកម្លាំងចិត្ត (រឿងពិតរបស់និស្សិត IT)

2017-06-23 04:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលនៅរៀនវិទ្យាល័យ យុវជន ហ.រ.ត ជាសិស្សម្នាក់ដែលរៀនខ្សោយមែនទែនសឹងតែថាសិស្ស ៥០ នាក់ គេទទួលលេខ ៤៩ ទៅហើយ ថែមទាំងមានការឌឺដងពីមិត្តរួមថ្នាក់ទៀត ប៉ុន្តែក្រោយមកមានរឿងដែលនឹកស្មានមិនដល់។

រូបតំណាង

យុវជន ហ.រ.ត មានចំណូលចិត្តផ្នែកវិទ្យាសាស្ត្រ ច្រើនជាងមុខវិជ្ជាចំណេះដឹងទូទៅកាលនៅរៀនវិទ្យាល័យ ជាពិសេសជំនាញវិទ្យាសាស្ត្រកុំព្យូទ័រ ឬហៅតាមការនិយមថា IT។ ដោយសារចូលចិត្តការស្រាវជ្រាវ គេហ៊ានដាក់ពាក្យចូលធ្វើការបុគ្គលិកហាត់ការផ្នែក Web Developer(អ្នកអភិវឌ្ឍន៍វិបសាយ) នៅក្នុងក្រុមហ៊ុនមួយកន្លែងនៅរាជធានីភ្នំពេញ តាំងពីថ្នាក់ទី ១១ មកម្ល៉េះ។

រឿងដែលមិននឹកស្មានគឺ អ្នកដែលស្គាល់ ហ.រ.ត ដែលរៀនជាមួយនៅថ្នាក់វិទ្យាល័យទាំងប៉ុន្មាន ពួកគេមិនដែលចាប់អារម្មណ៍និងជំនាញរបស់ ហ.រ.ត ផ្ទុយទៅវិញ ពួកគេតែងតែមើលងាយនឹងមិនសូវនិយាយរកគេឡើយ ពួកគេតែងតែឌឺដងថា ហ.រ.ត ជាមនុស្សមិនបានការ គ្មានកំណើតទៅរៀនអាយធីនិងរៀនធ្វើអី រៀនហើយមកបញ្ចូលបទចម្រៀងទៅ វាគ្មានបានការអីទេ។

ដោយសារសម្ដីដែលពួកគេនិយាយធ្វើឲ្យ យុវជន ហ.រ.ត ខឹងខ្លាំងមែនទែនពេលខ្លះគេអង្គុយគិតតែឯងថា ហេតុអ្វីបានជាគេមើលងាយ មិនឲ្យតម្លៃលើជំនាញនេះសោះ ទាំងដែលការរស់នៅរបស់គេ ៩០ ភាគរយត្រូវការ IT ទៅហើយ។

តាំងពីពេលនោះមក យុវជន ហ.រ.ត មិនដែលរវល់នឹងសម្ដីរបស់ពួកគេឡើយព្រោះយុវជន ហ.រ.ត ដឹងថាពួកគេប្រាកដជាមិនស្គាល់ ថាអ្វីទៅដែលហៅថា IT នោះទេ ដូចនេះយុវជន ហ.រ.ត មានតែខំសិក្សាបន្ថែមលើជំនាញមួយនេះ ឲ្យកាន់តែរីកចម្រើន។

រហូតមកដល់ពេលនេះអ្វីដែលចេញមកពីការខិតខំអស់រយៈពេលជាច្រើនឆ្នាំ យុវជន ហ.រ.ត បានជោគជ័យក្នុងជំហ៊ានទីមួយហើយ។ សព្វថ្ងៃយុវជន ហ.រ.ត ជានិស្សិត IT ឆ្នាំទី២ នៃសកលវិទ្យាល័យមួយ ហើយក៏កំពុងបម្រើការជាបុគ្គលិកផ្នែក Network Administrator នៅក្នុងក្រុមហ៊ុនឯកជនមួយផងដែរ ទោះបីយុវជន ហ.រ.ត រៀនមិនទាន់ចប់ក្ដី តែបទពិសោធន៍និងអ្វីដែលគេចេះក៏មិនចាញ់អ្នកដែលរៀនបានលេខមួយក្នុងថ្នាក់ដែរ។

ជាចុងក្រោយ យុវជន ហ.រ.ត បានផ្ដាំអរគុណចំពោះអ្នកដែលធ្លាប់មើលងាយគេកន្លងមក ដែលបានឲ្យវាក្លាយទៅការផ្ដល់ជាកម្លាំងចិត្តឲ្យរូបគេ ដើរមកដល់ពេលនេះ។

តម្លៃអប់រំ៖

មនុស្សម្នាក់ៗ មានចំណូលចិត្តខុសគ្នា មានជំនាញផ្សេងគ្នា បើយើងធ្វើមិនបានមានគេធ្វើបាន ដូចនេះកុំវាយតម្លៃមនុស្សតាមសំបកក្រៅ៕

អានបន្ត៖

អត្ថបទ៖ ហ.រ.ត