ធ្លាយឈ្មោះតារាខ្មែរ ៨រូប កំពុងរៀបចំឯកសារចូលទូតអាមេរិក

2017-06-26 03:41:25
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងតិចមានសិល្បករសិល្បៈការិនីខ្មែរចំនួន៨រូបដែលសុទ្ធសឹងតែជាតារាចម្រៀង កំពុងត្រូវបានSponser នៅប្រទេសសហរដ្ឋអាមេរិក រៀបចំឯកសារចូលស្ថានទូតដើម្បីធ្វើការសម្ភាស នេះបើតាមការបង្ហើបឲ្យដឹងពីលោក ជាង លីម ប្រធានក្រុមហ៊ុន Khmer Entertainment of America,Inc ដែលជាអ្នកធានា តារាចម្រៀងទាំងនោះចេញទៅ។

លោក ជាង លីម បានរៀបរាប់ឲ្យដឹងថា សិល្បករសិល្បៈការិនីខ្មែរចំនួន៨រូបនោះមាន លោក នៅ ស៊ីនឿន កញ្ញា ផាត់ ស្រីពេជ្រ (ហៅ អាម៉ៅ) កញ្ញា ឆោម ច័ន្ទនេត (ហៅ សូដាណេ) លោក ពិន សេកមាស លោក រ័ត្ន សុភ័ក្ត្រា (ហៅ រ័ត្ន មករា ) កញ្ញា ម៉ុក អានិត កញ្ញា កែវ សៀងហៃ និង លោក នាង សំណាង។ " ឥឡូវហ្នឹងឯកសារយើងរៀបចំរួចហើយ អាចដាក់ចូលស្ថានទូតនៅចុងខែ ៩ ឬ ដើមខែ១០នេះ ហើយចង់ឲ្យពួកគាត់មកច្រៀងនៅ រដូវភ្ជុំបិណ្ឌ និង អុំទូកអកអំបុកខាងមុខនេះ" ប្រធានក្រុមហ៊ុន Khmer Entertainment of America,Inc ខាងលើថ្លែងតាមទូរសព្ទពីអាមេរិកប្រាប់ Sabay។

តារាចម្រៀងទាំង៨រូបខាងលើ អាចទៅរយៈពេល៣ទៅ៦ខែ អាស្រ័យលើសន្ទុះនៃការគាំទ្រ របស់ប្រជាជនខ្មែរនៅទីនោះ ។ លោក ជាង លីម បន្តថា ក្រុមហ៊ុនរបស់លោក មានផែនការ រៀបចំតារាចម្រៀងទាំងអស់នោះ ដើរច្រៀងស្ទើរគ្រប់រដ្ឋទាំងអស់ ក្នុងសហរដ្ឋអាមេរិក ពិសេសរដ្ឋដែលមានប្រជាជនខ្មែរយើងរស់នៅច្រើនជាងគេ។

តាមការវាយតម្លៃពីមហាជនមួយចំនួនតារាចម្រៀងទាំង៨រូបដែលបានបង្ហាញខាងលើ ហាក់ដូចជាមិនសូវជាមានប្រជាប្រិយភាពខ្លាំងប៉ុន្មាននោះឡើយសម្រាប់ទីផ្សារក្នុងស្រុក ដូចនេះការយកពូកគាត់ទៅអាចម្ចាស់ Sponser មិនចំណេញច្រើន ចំណុចនេះលោក ជាង លីម បញ្ជាក់ថា ក្រុមហ៊ុនរបស់លោកចង់ផ្ដល់ឱកាសឲ្យតារាចម្រៀងថ្មីមានឱកាសចេញទៅច្រៀងនៅក្រៅប្រទេស កុំឲ្យចេញទៅតែតារាដដែល ម្យ៉ាងនៅខ្មែរនៅអាមេរិកចូលចិត្តស្ដាប់បទចម្រៀងពីដើមៗច្រើន អីចឹងតារាចម្រៀងទាំងនោះចេះច្រៀងបទចម្រៀងទាំងអស់នោះឲ្យបានច្រើនគឺ គ្រប់គ្រាន់ហើយ។

លោក ជាង លីម បច្ចុប្បន្នលោកបានឲ្យតារាចម្រៀងទាំង៨រូបខាងលើ ហាត់សមឲ្យបានច្រើនមុននឹងចេញទៅ នៅបទរាំវង្ស រាំក្បាច់ សារ៉ាវ៉ាន់ ជាដើម ដើម្បីច្រៀង បម្រើអារម្មណ៍បងប្អូនខ្មែរនៅទីនោះ ។

ម៉ុក អានីត

ចំពោះថា តើអាចចេញទៅបានដូចបំណងឬយ៉ាងណា? លោក ជាង លីម មិនមានការបារម្ភឡើយ ដោយលោកបានលើកឡើងថា ក្រុមហ៊ុន Khmer Entertainment of America,Inc ដែលបង្កើតឡើងតាំងពីឆ្នាំ ២០០៥ មក ធ្លាប់បានធានាតារាចម្រៀងទៅច្រៀងនៅសហរដ្ឋអាមេរិកច្រើនលើកណាស់ មិនដែលមានបញ្ហាឡើយ។

លោកបានរៀបរាប់បន្ថែមថា តារាចម្រៀងដែលធ្លាប់ធានាទៅច្រៀងកន្លងទៅ មានដូចជា លោក ឆន សុវណ្ណារាជ កញ្ញា សុគន្ធ និសា អ្នកនាង ឈួន សុវណ្ណឆៃ អ្នកនាង ឈួន ស្រីម៉ៅ អ្នកនាង ទូច ស្រីល័ក្ខ នាយ ប្លាកទិន នាយក្រិន អ្នកនាង ប្រិមប្រិយ អ្នកនាង យ៉ុង ចន្ទ័សុធារី អ្នកនាង និង លោក ប្រាក់ អរុណ ជាដើម។ ដោយពួកគេមួយចំនួនបច្ចុប្បន្នកំពុងច្រៀងនៅសហរដ្ឋអាមេរិកនៅឡើយ។ លោក ជាង លីម សង្ឃឹមយ៉ាងមុតមាំថា តារាទាំង ៨ រូបខាងលើ ច្បាស់ជាបានចេញទៅឆាប់ៗនេះ តាមការគ្រោងទុក ជាក់ជាមិនខាន ព្រោះបងប្អូនខ្មែរនៅអាមេរិកកំពុងតែទន្ទឹងរង់ចាំ៕

ចុចអាន