ចិញ្ចឹមទាយកពងលក់ចំណូលកប់ អ្នកធ្វើការសុំខ្មាស

2017-06-26 04:46:56
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ខឹម សារឿន កសិករចិញ្ចឹមទាយកពងលក់ រស់នៅភូមិក្រាំងធ្នង់ ឃុំរវៀង ស្រុកសំរោង ខេត្តតាកែវ បានប្រាប់ថា ចំណូលពីការលក់ពងទាក្នុងមួយខែៗគឺទទួលបានច្រើន ដែលជួយឱ្យគ្រួសារលោកមានជីវភាពធូរធារជាងមុន។

លោក ខឹម សារឿន

កសិករសម្បុរស្រអែមខាងលើបានលើកឡើងថា លោកចិញ្ចឹមទាយកពងលក់នេះគឺចិញ្ចឹមតាមបែបធម្មជាតិសុទ្ធសាធអស់រយៈពេល៧ឆ្នាំមកហើយ ដោយធ្វើការបម្លាស់ទីពីកន្លែងមួយទៅកន្លែងមួយទៀតជាបន្តបន្ទាប់តាមរដូវ ដើម្បីឱ្យទារកចំណីស៊ី ដែលពេលខ្លះទៅដល់សៀមរាប ប៉ោយប៉ែត តំបន់ប្រាំ បន្ទាយមានជ័យក៏មាន។

លោក សារឿន ថ្លែងដូច្នេះ "ខ្ញុំចិញ្ចឹមហ្នឹង ចិញ្ចឹមតាមធម្មជាតិសុទ្ធ អត់មានប្រើចំណីទេ អីចឹងហើយគេចូលចិត្តមកទិញច្រើន តាំងពីអ្នកនៅភ្នំពេញ អស់លោក ឯកឧត្ដមអីក៏មានដែរ ព្រោះគេចូលចិត្តរបស់ធម្មជាតិ។"

កសិករវ័យ៤៨ឆ្នាំបន្ថែមថា "ឥលូវហ្នឹង...ខ្ញុំចិញ្ចឹមទាមេ ១ ៩០០ ក្បាល ហើយក្នុងម៉ាង៉ៃៗ(មួយថ្ងៃៗ)... អាចប្រមូលពងបានពី ១ ៦០០ ទៅ ១ ៧០០ពង ព្រោះឥលូវវាខ្សត់ចំណីធម្មជាតិ ប៉ុន្តែបើសំបូរចំណីវិញអាចប្រមូលបានជាង ១ ៨០០ ពងអីនោះ បាត់តែ២០ទៅ៣០ពងអីទេ។"

ចំពោះតម្លៃវិញនៅរដូវសំបូរពងទា ពង១គ្រាប់អាចលក់បានត្រឹម២៧០ទៅ២៨០រៀលប៉ុណ្ណោះ ដោយឡែករដូវខ្សត់ពងទា ចាប់ពីខែ៧ដល់ដើមខែ១១ ពង១គ្រាប់អាចលក់បានរហូតដល់៤០០រៀល។ ជាមធ្យមក្នុងមួយថ្ងៃ លោកអាចទទួលបានចំណួលចន្លោះពី ៦០ម៉ឺនរៀល ទៅ៨០ម៉ឺនរៀល ដែលចំណូលសរុបនៅក្នុងមួយខែជាង២០លានរៀលឬប្រហែល៥ពាន់ដុល្លារ។

ថ្វីត្បិតតែរបរនេះ ផ្ដល់ចំណូលខ្ពស់ក៏ពិតមែន ប៉ុន្តែលោកពុំបាននៅផ្ទះជួបជុំគ្រួសារដូចគេទេ។ ពីទៅបីខែទើបលោកអាចឆ្លៀតទៅសម្រាកនៅផ្ទះបានមួយយប់ នេះក៏ព្រោះតែខ្លាចទាដើរវង្វេងចូលវ៉ូងគេផ្សេង ឬមានគេលួចទាក់ចាប់យក៕

ចុចអាន៖