ធ្លាប់ដឹងអត់ថា ប្រាសាទមេបុណ្យខាងលិច មានកន្លែងវាស់ទឹកដ៏សុក្រឹត មិនចាញ់សម័យឥឡូវ?

2017-06-29 03:10:27
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នភ្ញៀវទេសចរ ដែលទៅលេងកម្សាន្តនៅបារាយណ៍ខាងលិច ក្នុងទឹកដីអង្គរសៀមរាប រមែងចោលកន្ទុយភ្នែកទៅដីទួលមួយ ដែលប្រជាពលរដ្ឋនៅក្នុងតំបន់តែងហៅថាកោះមេបុណ្យ។ តាមពិតនៅលើកោះនេះ ដូនតាខ្មែរបានសាងសង់សំណង់ប្រាសាទដ៏អស្ចារ្យមួយនោះ គឺប្រាសាទមេបុណ្យខាងលិច ដើម្បីឧទ្ទិសដល់ព្រះវិស្ណុ ក្នុងព្រហ្មញ្ញសាសនា។

- ចុចអាន៖ ប្រាសាទមេបុណ្យខាងលិច ជួសជុលឡើងវិញ ក្រោយជំនួយពីមូលនិធិតូតាល់

បារាយណ៍ ខេត្តសៀមរាប

លោក ហង្ស ពៅ អគ្គនាយករងអាជ្ញាធរអប្សរា ទទួលបន្ទុកធនធានទឹក និងការងារជួសជុលប្រាសាទមេបុណ្យ បានឲ្យដឹងថា ក្រៅពីឧទ្ទិសដល់សាសនា ប្រាសាទមេបុណ្យត្រូវបានដូនតាខ្មែរសាងសង់ឡើងដើម្បីតាមដានបម្រែបម្រួលទឹកក្នុងបារាយណ៍ ដែលមានវិសាលភាពរហូតដល់ ៥៦លានម៉ែត្រគីប។

លោក ហង្ស ពៅ អគ្គនាយករងអាជ្ញាធរអប្សរា

“បើប្រៀបធៀបនឹងសម័យទំនើបនាពេលបច្ចុប្បន្ន ប្រាសាទមេបុណ្យ បានប្រើប្រាស់បច្ចេកទេសដូចជាសម័យនេះដែរ គឺដូនតាខ្មែរបានជីកអណ្ដូងដើម្បីវាស់ទឹកឲ្យបានសុក្រឹត ព្រោះបើវាស់ទឹកខាងក្រៅ សូម្បីតែរលកក៏អាចធ្វើឲ្យខុសដែរ។ ដូចជាបារាយណ៍ខាងលិចនេះ មានបណ្ដោយដល់ទៅ៨ គីឡូម៉ែត្រ និង ទទឹង ២,២ គីឡូម៉ែត្រ ដូច្នេះបើវាស់ខុសតែ ២ ឬ៣លី ក៏អាចនឹងខុសចំនួនទឹកដល់ទៅរាប់សិបម៉ឺនម៉ែត្រគីបឯណោះ។ តែបើយើងវាស់ទឹក ដែលមានក្នុងអណ្ដូងនៃប្រាសាទមេបុណ្យវិញ គឺវាមិនមានរលកទេ ហើយមានភាពសុក្រឹត្យបំផុត។”

តាមការបញ្ជាក់ពីលោក ហង្ស ពៅ បច្ចុប្បន្នអាជ្ញាធរអប្សរា និងសាលាបារាំងចុងបូព៌ា កំពុងជួសជុល និង រៀបចំឡើងវិញនូវប្រាសាទមេបុណ្យ។ គិតមកទល់ពេលនេះ ការដ្ឋានជួសជុលធ្វើឡើងបានរយៈពេល ៥ឆ្នាំមកហើយ និងត្រូវបញ្ចប់នៅក្នុងឆ្នាំ ២០១៩ ខាងមុខ។

មេបុណ្យខាងលិច ជាសំណង់ប្រាសាទផ្សំឡើងដោយកំពែងមួយជាន់ធ្វើអំពីថ្មភក់ ហ៊ុមព័ទ្ធដោយស្រះទឹកធំមួយ ដែលគេជីកនៅលើដីទួលនោះ។ កំពែងខាងកើតត្រូវបានរចនាជាថែវ មានបង្អួចធំល្មមស្ថិតនៅដាច់ៗពីគ្នា និងមានគោបុរៈចូលចំនួនបី មួយនៅចំកណ្ដាល និង ពីរទៀតនៅចុងសងខាងថែវ។

នៅចំកណ្ដាលស្រះទឹកខាងក្នុងមានសំណង់ប្រាសាទធ្វើពីថ្មភក់មានរាងមូលប្រៀបដូចជាអណ្ដូងទឹក មានអង្កត់ផ្ចិតប្រមាណ ៣ម៉ែត្រ។ ភ្ញៀវទេសចរអាចនឹងទៅទស្សនាកម្សាន្តនៅប្រាសាទមេបុណ្យខាងលិចដោយមធ្យោបាយយានយន្តនៅក្នុងរដូវប្រាំង និងត្រូវប្រើប្រាស់កាណូតចម្លងនៅរដូវវស្សា។ នេះជាផ្នែកមួយនៃវប្បធម៌ និងអរិយធម៌ ដ៏ពិសិដ្ឋរបស់កម្ពុជា។