ចប់ត្រឹមបាក់ឌុប ប្រើដើមទុន ៣៥ដុល្លារ រកស៊ីចំណេញរាប់ពាន់ក្នុង១ខែ

2017-07-07 02:45:09
ចំនួនមតិ 0 | ចំនួនចែករំលែក 0

ចន្លោះមិនឃើញ

រៀនចប់ត្រឹមបាក់ឌុប ចេញធ្វើការឱ្យគេជាច្រើនកន្លែងរហូតបែកគំនិតចង់រកស៊ី
ចាប់ផ្ដើមដំបូង ប្រើដើមទុនត្រឹម ៣៥ដុល្លារទិញសម្ភារៈរៀបចំដេគ័រ
ផ្ដើមពីការរៀនសូត្រ ការសង្កេត ពីរបៀបរកស៊ី តាមរយៈការងារពីមួយកន្លែងទៅមួយកន្លែង ហ៊ានប្រថុយទើបអាចរកស៊ីបាន

"បាទនិយាយឱ្យអស់ទៅចាប់ផ្ដើមរកស៊ីដំបូងខ្ញុំត្រៀមលុយ ១០០ដុល្លារ តែជាក់ស្ដែងអស់តែ ៣៥ទេរហូតជោគជ័យមកដល់សព្វថ្ងៃ"។ នេះជាសម្ដីរបស់ម្ចាស់អាជីវកម្មវ័យក្មេង ឈួន ស៊ីរ៉ាដួងភិរម្យ ហៅ ឆាងម៉ាង និយាយមកកាន់ Sabay ទាំងញញឹមញញែម។

យុវជនមានស្រុកកំណើតនៅរាជធានីភ្នំពេញរូបនេះ ប្រាប់ថា លោករៀនចប់ត្រឹមថ្នាក់បាក់ឌុបប៉ុណ្ណោះ ក្នុងឆ្នាំ ២០០៣ តែដោយសារជាមនុស្សតែងសង្វាតចង់បានលុយ លោកបានបន្តការសិក្សាថ្នាក់បរិញ្ញាបត្រជិតមួយឆ្នាំក៏ចេញរកការងារធ្វើ ហើយសម្រេចចិត្តបញ្ចប់ការសិក្សាតែម្ដង។ ស៊ីរ៉ាដួងភិរម្យ ប្រាប់ថា ការងារអ្វីក៏លោកធ្វើដែរមិនរើសនោះទេ ទាំងជាបុគ្គលិកផ្នែកលក់ ផ្នែកដឹកជញ្ជូន អ្នកលក់ស៊ីមកាតជាដើម។ ក្រោយមកទៀត លោកក៏បានចូលបម្រើការងារជាមេការក្នុង ហាងខារ៉ាអូខេមួយ ហើយក៏ជាចំណុចចាប់ផ្ដើមដែលលោក ចាប់ផ្ដើមបែកគំនិតរកស៊ីនៅពេលនោះ ជាអ្នកដេគ័រក្នុងកម្មវិធីខួបកំណើត។

ដោយសារមានឧបនិស្ស័យចូលចិត្តភាពច្នៃប្រឌិតតុបតែង និងមានលុយក្នុងដៃ ១០០ដុល្លារផង ស៊ីរ៉ាដួងភិរម្យ ក៏ប្រថុយចាប់ផ្ដើមទិញរបស់របរដើម្បីបង្កើតអាជីវកម្មដែលធ្លាប់បានសិក្សាពីគេខ្លះៗ។ មកដល់ចំណុចនេះលោកនិយាយថា ពីដំបូងតាមការមើលគេរៀបចំកន្លងមក លោកគិតថា ប្រហែលត្រូវប្រើដើមទុន អស់រាប់ពាន់ដុល្លារ ហើយប៉ុន្តែនៅពេលចាប់ផ្ដើមអស់ត្រឹម ៣៥ដុល្លារប៉ុណ្ណោះ។ ស៊ីរ៉ាដួងភិរម្យ និយាយថា៖ "បាទកាលហ្នឹងខ្ញុំទិញតុមួយតែ ១០ដុល្លារទេ ស្បៃក្រណាត់សារូមួយអស់តែ ៣៥០០រៀល ថូផ្កា ២ ប៉ោងៗមួយកញ្ចប់ ១ដុល្លារ យាយទៅលុយខ្ញុំត្រៀម ១០០ដុល្លារប្រើអស់តែ ៣៥ដុល្លារទេ"។

យុវជនមានមានគំនិតជាសហគ្រិនភាពតាំងពីវ័យក្មេងរូបនេះប្រាប់បន្តទៀតថា ចាប់ផ្ដើមដំបូងលោកសុំអនុញ្ញាតម្ចាស់ហាងខារ៉ាអូខេ ដែលលោកកំពុងតែធ្វើការរៀបចំ ហើយចែកភាគលាភគ្នា តែក្រោយមក ដោយសារថ្វីដៃនៃការតុបតែងលម្អរបស់លោកមានភាពទាក់ទាញ ទើបមានអតិថិជនទាក់ទងទៅរៀបចំជាបន្តបន្ទាប់។ បន្ទាប់មកភ្ញៀវរត់មករកលោកជាហូរហែ ទើបលោកសម្រេចចិត្ត លាឈប់ពីកន្លែងការងារហើយចាប់ផ្ដើមអាជីវកម្មដេគ័រនេះមួយទំហឹងចាប់ពីពេលនោះ។

ស្ថាបនិក Chang Decor រូបនេះប្រាប់ថា ចំពោះការឈានជើងចូលទីផ្សារដំបូង លោកគិតតម្លៃមួយកម្មវិធីត្រឹម ៤០ដុល្លារ ឬ៣៥ដុល្លារទេ ពោលគឺឱ្យតែមានអតិថិជន។ បន្ទាប់ពីកើនប្រាក់ចំណូល ស៊ីរ៉ាដួងភិរម្យ ចាប់ផ្ដើមទិញសម្ភារៈដេគ័របន្ថែមរហូត និងរៀបចំឱ្យកាន់តែស្អាត និងទ្រង់ទ្រាយធំជាងមុន ដើម្បីអាចបានថ្លៃបានខ្ពស់។ ជាការពិតពីមួយរោងបានថ្លៃត្រឹម ៤០ដុល្លារ រហូតកើនដល់ ១០០ដុល្លារ ទៅ ១៥០ដុល្លារក្នុងការរៀបចំម្ដងៗ។ ក្នុងនោះប្រាក់ចំណេញយ៉ាងតិចណាស់ ៨០ដុល្លារដែរក្នុងមួយរោង។ មកដល់បច្ចុប្បន្ននេះ លោកអាចរកប្រាក់ចំណេញបានពី ១០០០ដុល្លារ ទៅ ១៥០០ដុល្លារក្នុងមួយខែៗ។

ពីសិស្សរៀនចប់ត្រឹមបាក់ឌុប និងអ្នកធ្វើការមិនរើសមុខ ស៊ីរ៉ាដួងភិរម្យ ប្រាប់ថា ចំណុចដែលលោកឈានមកដល់សព្វថ្ងៃរហូតមានជីវភាពធូរធារ គឺផ្ដើមពីការរៀនសូត្រ ការសង្កេត ពីរបៀបរកស៊ី តាមរយៈការងារពីមួយកន្លែងទៅមួយកន្លែងនេះហើយ។ ជាពិសេសគឺការហ៊ានប្រថុយ ហ៊ានចាប់ផ្ដើម និងគំនិតច្នៃប្រឌិត ក៏ជារឿងមិនអាចខ្វះបាន។ នេះជាមតិចុងក្រោយទៅកាន់យុវជន ពីអ្នកធ្វើអាជីវកម្មផ្ដើមពីលុយ ៣៥ដុល្លារ៕

ចុចអានអត្ថបទពាក់ព័ន្ធ៖

អត្ថបទ៖ វឌ្ឍនៈ