ឥណ្ឌាធ្វើយុទ្ធនាការ «អត់ពាក់មួកសុវត្ថិភាព អត់ចាក់សាំងឲ្យ»

2017-07-07 03:53:15
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាធរស្នើអ្នកលក់ កុំលក់សាំងឲ្យអ្នកដំណើរ បើមិនពាក់មួកសុវត្ថិភាព
យុទ្ធនាការនេះធ្លាប់ធ្វើកាលឆ្នាំមុន ដោយកាត់បន្ថយគ្រោះអ្នកជិះម៉ូតូបាន ៤០%
យុទ្ធនាការទទួលការស្វាគមន៍ និងសហការពីអ្នកលក់សាំងទាំងអស់ក្នុងក្រុង

ប៉ូលិសចរាចរណ៍ឥណ្ឌាសម្រេចដាក់ចេញយុទ្ធនាការម្ដងទៀតក្នុងគោលបំណងបង្កើនការយល់ដឹងអំពីសុវត្ថិភាពតាមដងផ្លូវពេលបើកបរ គឺគ្មានមួកសុវត្ថិភាព មិនចាក់សាំងឲ្យ (No Helmet No Petrol)។

យុទ្ធនាការនេះ ធ្វើឡើងដើម្បីកាត់បន្ថយក្រុមអ្នកធ្វើដំណើរតាមម៉ូតូដែលមិនពាក់មួកសុវត្ថិភាព ដោយតែងតែជួបគ្រោះថ្នាក់បាត់បង់ជីវិតត្រង់ក្បាល។ យុទ្ធនាការខាងលើ ដាក់ចេញដោយអាជ្ញាធរស្រុក Kangra និងធ្លាប់អនុវត្តដំបូងនៅទីក្រុង Dharamshala រដ្ឋ Himachal Pradesh កាលពីខែសីហា ឆ្នាំ ២០១៦។ ប៉ូលិសស្រុកបានស្នើដល់គ្រប់ម្ចាស់កន្លែងលក់សាំង កុំលក់សាំងឲ្យអ្នកដំណើររូបណាម្នាក់ឲ្យសោះ ប្រសិនបើពួកគេមិនពាក់មួកសុវត្ថិភាព។

មន្ត្រីដដែលរៀបរាប់ថា "យើងនឹងបើកកិច្ចប្រជុំជាមួយម្ចាស់កន្លែងលក់សាំងទាំងអស់ក្នុងស្រុក។ ពួកគេក៏មានឆន្ទៈជួយប៉ូលិសក្នុងយុទ្ធនាការនេះដែរ"។ ជាលទ្ធផល យុទ្ធនាការឆ្នាំមុនបានជួយកាត់បន្ថយគ្រោះថ្នាក់ចរាចរណ៍បង្កឡើងដោយម៉ូតូបានចំនួន ៤០% ផងដែរ។

ប្រភពខាងលើអះអាងថា សាំងក្នុងស្រុកប្រមាណ ៤០% លក់ឲ្យអ្នកដំណើរជិះម៉ូតូ។ ក្នុងចំណោមអ្នកជិះម៉ូតូទាំងអស់ក្នុងស្រុកមានជាង ៩០% ហើយបានពាក់មួកសុវត្ថិភាពត្រឹមត្រូវ។ ពេលនេះប៉ូលិសសម្រេចធ្វើយុទ្ធនាការម្ដងទៀត នៅទូទាំងក្រុង Dharamshala រដ្ឋដដែល៕