ឡុង សុភី៖ ចង់ស្គាល់សង្វៀននៅថៃ ជាងប្រាក់តម្លៃខ្លួន ព្រោះបានច្រើនជាងខ្មែរមិនដល់១០០ដុល្លារផង
- 2017-07-12 02:34:00
- ចំនួនមតិ 0 | ចំនួនចែករំលែក 0
ឡុង សុភី៖ ចង់ស្គាល់សង្វៀននៅថៃ ជាងប្រាក់តម្លៃខ្លួន ព្រោះបានច្រើនជាងខ្មែរមិនដល់១០០ដុល្លារផង
ចន្លោះមិនឃើញ
អ្នកប្រដាល់ល្បីឈ្មោះរបស់កម្ពុជាដែលឧស្សាហ៍ឃើញមុខតាមសង្វៀននានាស្ទើររាល់សប្ដាហ៍ ឡុង សុភី ថាខ្លួនពិតជាចង់ទៅចូលរួមប្រកួតនៅប្រទេសព្រោះចង់ដឹងថានៅតាមសង្វៀនធំៗរបស់គេវាខុសប្លែកពីកម្ពុជាយ៉ាងណា។
កីឡាករ ឡុង សុភី បានឲ្យដឹងថា បើនិយាយពីការទៅចូលរួមប្រកួតតាមសង្វៀនធំៗនៅប្រទេសថៃ ខ្លួនពិតជាមិនធ្លាប់នោះទេ ហើយការចេញទៅប្រកួតនៅថ្ងៃទី១៥ ខែកក្កដា ប៉ុន្មានថ្ងៃទៀតនេះជាលើកទី១របស់ខ្លួន។ ប៉ុន្តែបើការប្រកួតនៅប្រទេសថៃជាយៗ ព្រំប្រទល់នោះ សុភី ធ្លាប់ទៅប្រកួតបាន ២-៣ដងដែរ តែគ្រាន់តែកម្មវិធីប្រដាល់តូចតាចប៉ុណ្ណោះ។
អ្នកលេងជង្គង់ខាងលើបន្តថា បើនិយាយពីប្រាក់តម្លៃខ្លួនរបស់គេនាការប្រកួតថ្ងៃទី១៥នៅថៃនេះ មិនបានច្រើននោះទេគឺលើសប្រាក់តម្លៃខ្លួននៅកម្ពុជាប្រហែលជិត១០០$។ តែអ្វីដែលជំរុញឲ្យខ្លួនចេញទៅប្រកួតនៅទីនោះ គឺដោយសារចង់ដឹងថារបៀបវ៉ៃពិន្ទុនៅប្រទេសថៃនេះវាយ៉ាងណា សមត្ថភាពកីឡាករខ្លាំងៗដែលបង្ហាញមុខកម្មវិធីធំៗនេះវាកម្រិតណា។
សុភី បន្ថែមទៀតថា ជាពិសេសនោះលោកចង់ ដឹងថាតើអ្នកប្រដាល់ខ្លាំងៗរបស់ថៃ គេហ្វឹកហាត់ខុសពីកម្ពុជាយ៉ាងណាខ្លះ ព្រោះថាវិស័យប្រដាល់ថៃរីកចម្រើនលំដាប់ពិភពលោកទៅហើយនាពេលបច្ចុប្បន្ននេះ។ ការចេញទៅប្រកួតលើកនេះអាចថា ជាការល្អសម្រាប់គេដែលស្វែងរកបទពិសោធនបន្ថែមទៀតសម្រាប់អាជីពប្រដាល់របស់ខ្លួន។
កីឡាករ ឡុង សុភី ជាកូនសិស្សលោកគ្រូ ឡុង សាលវ័ន្ត ហើយគេជាជើងខ្លាំងនិងជាម្ចាស់ខ្សែក្រវាត់ច្រើនគ្រឿង។ ជើងខ្លាំងរូបនេះនឹងត្រូវឡើងប្រឈមជាមួយអ្នកប្រដាល់ថៃ Saensatharn នៅសង្វៀន Thai Fight ឯប្រទេសថៃ ថ្ងៃទី១៥ កក្កដា ២០១៧ ខាងមុខនេះ៕