សេង ពិសិដ្ឋ៖ រៀបការពេលមានលុយខ្លួនឯងទើបមានមោទនភាព
- 2017-07-15 04:39:42
- ចំនួនមតិ 0 | ចំនួនចែករំលែក 0
សេង ពិសិដ្ឋ៖ រៀបការពេលមានលុយខ្លួនឯងទើបមានមោទនភាព
ចន្លោះមិនឃើញ
"នៅពេលដែលយើងរៀបការមោទនភាពរបស់យើងមួយ គឺយើងមានលុយរៀបចំខ្លួនឯង ដោយរំខាន ឫពឹងពាក់ឪពុកម្ដាយតិចតួចបំផុត"។ នេះជាការលើកឡើងរបស់របស់ សេង ពិសិដ្ឋ នាយកប្រតិបត្តិក្រុមហ៊ុន អនុស្សាររៀបចំពិព័រណ៍ និយាយមកកាន់ Sabay ក្នុងសន្និសីទសារព័ត៌មានជុំវិញកម្មវិធីពិព័រណ៍អាពាហ៍ពិពាហ៍។
នាយកប្រតិបត្តិវ័យក្មេងរូបនេះ បន្តទៀតថា ក្នុងមួយជីវិតឪពុកម្ដាយ គឺធ្វើអ្វីៗដើម្បីកូនលះបង់គ្រប់បែបយ៉ាង ជួនកាល លោកទាំងពីរមិនទាន់ទាំងមានអ្វីដុំកំភួនផង ដូចជាដី ផ្ទះរស់នៅសមរម្យ ស្រាប់តែត្រូវរៀបចំមង្គលការឱ្យកូនអស់ពីខ្លួនទៀត។ លោក បន្ថែមទៀតថា ស្ទើរពេញមួយជីវិតរបស់ឪពុកម្ដាយ ខំសន្សំលុយទុកខ្លះ តែចុងក្រោយអស់ដោយសារកូន។ ដូច្នេះហើយ មិនគួររៀបការទាំងមិនទាន់មានលទ្ធភាពគ្រប់គ្រាន់បែបនេះទេ ព្រោះក្រោយរៀបការហើយជីវិតក៏មិនអាចរស់នៅស្រួលដែរ។
លោក សេង ពិសិដ្ឋ និយាយថា យុវជនគួររៀនសន្សំលុយទាំងពីរនាក់ បើសិនជាមានគម្រោងចង់រៀបការជាមួយគ្នា ហើយរៀបចំឱ្យសមល្មមតាមលទ្ធភាព មិនបាច់ទៅហក់លោតដូចគេទេ ព្រោះជីវិតប្ដីប្រពន្ធរស់នៅមានសុភមង្គលមិនមែនអាស្រ័យលើមង្គលការតូច ឬធំឡើយ។ ជាពិសេសខាងស្រីក៏មិនត្រូវពឹងផ្អែកទាំងស្រុងលើខាងប្រុសដែរ ត្រូវជួយគ្នាសន្សំលុយ និងរៀបចំផែនការឱ្យបានច្បាស់លាស់មុនសម្រេចចិត្តចូលរោងការ។
"មានអ្វីជាលំនឹងក្នុងជីវិតសិនចាំរៀបការ ហើយសួរថាបានលុយមកពីណាការខ្លួនឯង? ចម្លើយតែមួយគត់គឺការសន្សំ កាត់បន្ថយការចំណាយមិនចាំបាច់ កុំប្រើរបស់ប្រេនអត់ប្រយោជន៍ យកលុយទៅរកស៊ី បង្កើនចំណូល នោះហើយទើបជាជម្រើសល្អបំផុត ចំពោះអ្នកមានគម្រោងចង់រៀបការ។" លោក សេង ពិសិដ្ឋ និយាយបន្ថែម។
ចុងក្រោយស្ថាបនិកក្រុមហ៊ុន អនុស្សាររៀបចំពិព័រណ៍និយាយថា រៀបការនៅពេលមានអ្វីគ្រប់យ៉ាង មិនរំខានឪពុកម្ដាយ ហើយរៀបការមិនមែនមកពីកាលៈទេសៈ រៀបការដោយមានផែនការ ជជែកពិភាក្សាគ្នាច្បាស់លាស់ នោះទើបជាមង្គលការដ៏មានន័យបំផុត៕