អាជ្ញាធរសៀមរាប គ្រោងដាក់កាមេរ៉ាសុវត្ថិភាព ៣០ បន្ថែមជុំវិញតំបន់ផាប់ស្ទ្រីត
- 2017-07-17 03:58:34
- ចំនួនមតិ 0 | ចំនួនចែករំលែក 0
អាជ្ញាធរសៀមរាប គ្រោងដាក់កាមេរ៉ាសុវត្ថិភាព ៣០ បន្ថែមជុំវិញតំបន់ផាប់ស្ទ្រីត
ចន្លោះមិនឃើញ
នាយករដ្ឋបាលសាលាខេត្តសៀមរាប លោក នួន ពុទ្ធារ៉ា បានឲ្យ Sabay ដឹងថា អាជ្ញាធរខេត្តសៀមរាបគ្រោងនឹងបង្កើនកាមេរ៉ាសុវត្ថិភាពចំនួន៣០បន្ថែមទៀត លើកាមេរ៉ាចំនួន ២៣ ដែលមានស្រាប់កំពុងដាក់នៅតាមទីតាំងសំខាន់ៗជុំវិញតំបន់ផាប់ស្ទ្រីត។
ការដាក់បន្ថែមកាមេរ៉ាសុវត្ថិភាពឲ្យកើនសរុបដល់ ៥៣ទីតាំង គឺដើម្បីពង្រឹងការគ្រប់គ្រងសន្តិសុខ និងសណ្ដាប់ធ្នាប់នៅតំបន់ ដែលមានភ្ញៀវទេសចរគ្រប់ជាតិសាសន៍ ទៅលេងកម្សាន្តនាពេលរាត្រីមួយនេះ។
អ្នកស្រី ដួង ថាវរី ស្នងការរងនគរបាលខេត្តសៀមរាប ទទួលបន្ទុកប្រធានក្រុមទី៧ នៃទីបញ្ជាការស្រាលឈរជើងនៅតំបន់ផាប់ស្ទ្រីត បានឲ្យដឹងថា ការដាក់កាមេរ៉ាសុវត្ថិភាពនៅជុំវិញតំបន់ផាប់ស្ទ្រីតពិតជាមានសារៈសំខាន់សម្រាប់ការងារគ្រប់គ្រងសន្តិសុខ សណ្ដាប់ធ្នាប់នៅតំបន់នេះ ព្រោះកងកម្លាំងប្រចាំការអាចស្រាវជ្រាវឡើងវិញនូវរឿងហេតុដែលកើតឡើង ឬការបាត់បង់ទ្រព្យសម្បត្តិរបស់ភ្ញៀវទេសចរជាដើម។ ជាមួយគ្នា កាមេរ៉ាសុវត្ថិភាព ក៏បានផ្ដល់ភាពងាយស្រួលក្នុងការបញ្ជូនព័ត៌មានពីការកកស្ទះចរាចរណ៍ផងដែរ។
គួរបញ្ជាក់ថា ក្នុងមួយរាត្រីមានភ្ញៀវទេសចរទាំងជាតិ និងអន្តរជាតិ ទៅលេងកម្សាន្តនៅតំបន់ផាប់ស្ទ្រីតចន្លោះពី៣ ទៅ៥ពាន់នាក់ ហើយប្រសិនបើថ្ងៃបុណ្យទានធំៗ ចំនួនភ្ញៀវទៅលេងតំបន់ភ្លើងចម្រុះពណ៌នេះនឹងកើនឡើងដល់ច្រើនម៉ឺននាក់។ នេះបើតាមការបញ្ជាក់បន្ថែមពីលោក នួន ពុទ្ធារ៉ា នាយករដ្ឋបាលសាលាខេត្តសៀមរាប៕