ស៊យធំហើយ! បើគិតថារៀបចំមុខផ្ទះស្ដុករញ៉េរញ៉ៃពេក អាចរកស៊ីឡើងនោះ

2017-07-17 07:40:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីឲ្យរកស៊ីមានបាន អ្នកមិនត្រូវរៀបចំទីធ្លាមុខផ្ទះស្ដុកពេក ឬមានរបស់របរច្រើនពេកនោះទេ។ នេះបើតាមសម្ដី ឡុង ណាលី អ្នកគ្រូហុងស៊ុយលេចមុខជាប្រចាំនៅទូរទស្សន៍ PNN និយាយក្នុងកម្មវិធីជួបជុំកូនសិស្សនៃស្ថាប័ន ម៉ាស្ទ័រ ណាលី ហុងស៊ុយ នៅល្ងាចថ្ងៃទី១៥ កក្កដា សណ្ឋាគារភ្នំពេញ។

ក្នុងពិធីជួបជុំនេះមានការចូលរួមពីកូនសិស្សជំនិតៗប្រមាណ ១០០ នាក់ ដែលជាអ្នករកស៊ីតូចធំ ព្រមទាំងតារាៗមួយចំនួនផងដែរ ដោយក្នុងនោះមានអ្នកខ្លះមកពីខេត្តដើម្បីចូលរួមតែម្ដង ព្រោះក្រៅពីការញ៉ាំអាហារ រាំលេងសប្បាយ ក៏បង្រៀនបង្ការស៊យ និងមូលដ្ឋានគ្រឹះហុងស៊ុយផងដែរ។

គ្រូហុងស៊ុយវ័យ ៣៨ឆ្នាំ ជាអគ្គនាយកស្ថាប័នម៉ាស្ទ័រ ណាលី ហុងស៊ុយ ដែលបញ្ចប់ការសិក្សាពីបរទេសនេះ បានប្រាប់ពីវិធីបង្ការស៊យថា កត្តាមនុស្សរួមចំណែក ៣០% កត្តាព្រហ្មលិខិត(ថ្ងៃខែឆ្នាំកំណើត) ៣០% កត្តាហុងស៊ុយ ៣០% និងកត្តាលេខទូរសព្ទ ១០% ហើយស៊យកើតមានបើកត្តាណាមួយអន់ថយ។ ដូចនេះ បើដឹងថាកត្តាណាធ្លាក់ចុះហើយនោះ អ្នកគួរធ្វើអ្វីឲ្យកត្តាទាំង ៣ ផ្សេងទៀតឡើងខ្លាំង ដើម្បីជួយយោងគ្នា។

យ៉ាងណាក្ដី អ្នកគ្រូក៏បានរំលឹកថា មុននឹងឈានទៅកែព្រហ្មលិខិត ឬហុងស៊ុយ អ្នកគួរតែកែកត្តាមនុស្ស គឺខ្លួនឯងជាមុនសិន ព្រោះទោះបីជាកត្តាទាំង ២ នេះល្អប៉ុណ្ណាក៏ដោយ បើខ្លួនឯងមិនធ្វើអី មិនចេះអីនោះក៏មិនអាចនាំលាភសំណាងមកបានដែរ៕